Way ikapasigarbo si Gen. Garbo sa mga Sugbuanon
Wa ko kasabot nganong karon pa gitribukar nilang Vice Gov. Agnes Magpale ug outgoing Police Regional Office in Central Visayas Chief Gen. Marcelo Garbo ang giingong death threats ni Magpale dihang naghinangat ang election.
Nagdrama ning duha ka mga opisyal aron pag-justify sa aksyon sa kapolisan nga atoa mipabor sa tanang mga kandidato sa Liberal Party (LP) ngan nga maoy nagdala sa renda sa Malacañang?
Gani akong nahibaw-an didto sa Tuburan nga alkanse gyud ang mga kandidato kontra sa LP kay matud pa sa akong mga tinubdan nga ang “goons” sa taga-LP mao mismo ang mga sakop sa Special Weapons and Tactics group sa Cebu City Police Office
Nigawas na kining isyuha dinhi sa akong lindog pero wa gyud imbestigaha ni General Garbo ug Cebu City Police Director Mariano Natuel Jr.
Nindot unta nga gitribukar ni Ma’am Agnes ug General Garbo ang death threats paghikadawat nila niadto aron wa nay daghang pagduda ang publiko nganong nagamit ang Philippine National Police sa politika.
Hinuon, normal kini sa Philippine politics nga kinsa kadtong partido nga hari sa Malacañang gamiton ang tanang government resources aron lang molampos sa personal nga interest.
Mao man sab ni ang gihimo kaniadto ni Presidente Gloria Macapagal Arroyo. Weather-weather lang.
***
Pagka-dalaygon sa liderato nila ni Gov. Hilario Davide III ug Vice Gov. Agnes Magpale nga paspas kaayong nakalimot sa bugno sa politika niadtong miaging Mayo 13.
Kini human ilang gi-welcome diha sa Kapitolyo ug gi-abi-abi ang mga mayor nga sakop sa “One Cebu Party” samtang nakig-courtesy call kanila isip mao nay mga haring gangis sa Kapitolyo.
Gawas niini, gihatagan og komitiba ang mga board members nga iya sa One Cebu party di sama sa Cebu City Hall nga wa hatagi ni Margot Osmeña nga taga-Bando Osmeña – Pundok Kauswagan sila si Cebu City Councilors Mary Ann Delos Santos ug Dave Tumulak.
Sama sa akong giingon nga kinahanglang ipadaplin gyud unta ang politika ug magtinabangay ug magkahiusa alang sa kabulahanan sa tibuok Sugbo.
* * *
Ngan nga taga-segundo distrito ko sa lalawigan sa Sugbo isip lumadnon nga taga-Dalaguete, mo-apelar ko ni kanhi governor ug kanhi kongresista nga si Noy Pablo Garcia nga ipabilin na lang diha sa Kapitolyo ang iyang priority development assistance fund nga mokabat og P72.9 million ug agig respeto makig-sit down kaniya si Governor Davide.
Total kuwarta man kini sa katawhan nga angayng pahimuslan namong taga-segundo distrito apil na si Governor Davide nga taga-Argao.
Kung bahin-bahinon kini equally sa 15 ka mga munisipyo sa 2nd district mogawas sa kuwentada nga makadawat og tag P4.86 million ang matag lungsod.
Di ko gusto nga igo nalang kaming manakla ug magpanglingo-lingo nga dili mapahimoslan namong taga-segundo distrito kinig dako nga kantidad nga may na lang unta magamit kini kaayo sa mga nanginahanglang mga kabus.
Pagkanindot nga kining kwartaha ibutang sa medical assistance alang niadtong wa gyuy ika-bayad sa chemotherapy, magnetic resonance imaging, pagpa-computed tomography kon CT scan ug uban pang mga mahalon nga medical and laboratory procedures.
Kun ibalik kining kwartaha didto sa House of Representatives unsa pa may garantiya nga mabalik kini sa segundo distrito sa Sugbo nga kanang kwarta alang gyud sa 2nd district?
Magpaabot ta sa wala? Alang nako, nga ang pinakanindot nga legacy nga ikabilin ni Noy Pabling karon mao ang pagtabang sa iyang mga ka-edad nga wa gyuy makoot panahon nga dalhon sa mga tambalanan.
Admittedly nasayangan ko nga napilde siya ni kongresista Willy Caminero tungod kay sa iyang paglingkod sa kongreso kaniadto, gi-representahan kami og lantip nga legislator nga respetado sa tanang sector.
Mangambot lang ko niining representation karon ni Caminero. Di ba kaha mobalik nga “committee on silence” na sab ang 2nd district?
* * *
Congratulations sa akong sano nga si kanhi Board Member Orvi Ortega nga siya gyuy gihimong provincial attorney sa lalawigan sa Sugbo ug kang Ma’am Ethel Natera nga maoy bag-ong public information officer sa Kapitolyo ug sa ubang mga department heads.
Dakung hagit kini kanila ug maglaum ko nga makaya nila ang pressure sa trabaho.
Nakatawa ko ni Ma’am Ethel niadtong miaging semana nga nabiktima sa intriga dihang gipasanginglan siya nga miabog sa mga reporters nga mismo ang mga reporters wa gyud mangreklamo kay nakasabot sila nga nakasamok sa mga bisita sa gobernador.
Kumbate mo diha way undangay.
