Super Kawatan sa mall

Nakatawa ko sa alarma niadtong Lunes sa gabii sa Gaisano Tabunok, Talisay nga dunay tiil sa tawo nga nabulasot sa kisame sa ikaduhang andana nga maoy hinungdan nga nabulabog ang paglumlom didto sa kanahan.

Kun wa pa mabuwasot puwede adto ra siya magpuyo didto ug magpahimulos sa mga baligya sa tindahan sa tibuok niyang kinabuhi.

Pero bilib ko sa kaidlas kay bisag gi-unsa pagpa-aso ug bisag daghang mga guwardiya ug mga pulis nangresponde naka-eskapo gihapon pagka-alas-3 sa kadlawon niadtong Martes na.

Sa pagsuwat ning maong lindog wa pa hinganli ang responsable nga kasohan sa kapolisan.

Duha ra gyud kaha ka adlaw siya didto? Kapila na kaha kadto himoa sa kanahan ang pagpangawat og mga items sa sulod nga nagmata lang ug buntag ang mga guwardiya ug ang management sa mall.

Nadakpan pa to, tingalig dila ray way labod ug tingalig kadto maoy part 2 sa Gaisano Metro Colon!

* * *

Makapatagam gyud sa mga ginikanan kadtong nahitabo sa apo ni kanhi kongresista Jose “Dodong” Gullas nga nalumos-patay uban sa Korean national sa ilang field trip didto sa Bataan nga miresulta karon sa dinakpanay sa lima ka mga tinugyanan sa Cebu International School (CIS) nga gibasol sa hitabo nga sila si Tyler Herbst, Susan Rigby, Ma. Socorro Laplana, Leah Joy Cabanban ug Geronimo Alguno kinsa gipangtaral og kasong reckless imprudence resulting in homicide.

Wa gyud untay kaso ang taga-CIS kun wa pa madisgrasya sila si Kyle Gullas Weckman ug ang Korean national nga si Jae Hak “James” Jung.

Bisag kinsang mga ginikanan, mabalaka gyud sa mga anak nga mouban sa field trip ilabina sa mga lagyong lugar kay daghan nang panghitabo nga narisgo ang kinabuhi sa mga tinun-an.

Pero in fairness sa mga tunghaan karon nga mohimo og susamang kalihukan dublihon na gyud ang mga paningkamot aron way dautang mahitabo sa mga estudyante.

Way tawo nga gustog disgrasya!

* * *

Kumusta man tuod kadtong mga gipangtanom nga mga seedlings sa mga kawani sa Kapitolyo, sa ubang ahensiya sa gobyerno ug mga tinun-an sa mga nangaging katuigan sa “Run 2 plant”?

Nangabuhi ba ang gipangtanom o ba kaha gipasibsib na lang sa mga hayupan?

Wa ba mausik ang kahago, panahon ug resources sa gobyerno? Basig kutob ra sila sa pagtanom ug wa nay follow-up ug way namubo og tubig sa mga tanom.

Nindot ang programa nga tree planting basta gi-atiman sab intawon ang gipangtanom.

Pero unsa ka tinuod nga himoon nang binuwan ang tree planting activities sa mga kawani sa Kapitolyo?

Matud pa sa akong mga amigo nga wa silay supak bisag kada adlaw basta lang itayming sa ting-trabaho sa oras sa gobyerno kay di gyud makaya nila nga himoon sa Sabado or Domingo nga tinghakot nila og tubig ug tingbugha sa kahoy.

Ang uban sab nagkanayon nga mas maayong gamiton sa tree planting kadtong mga trabahante nga way klarong gamit sa opisina nga igo rang mokobra og suweldo matag kinsenas.

* * *

Bintaha gyud kaayo si Cebu Gov. Hilario Davide III kay kang Cebu City Mayor Michael Rama.

Sa Kapitolyo man gud nakuha ni Governor Davide ang mayoriya sa Hunta Probinsiyal itandi ni Mayor Rama nga dehado ang iyang partido sa konseho.

Wa gyuy laing mahimo si Rama gawas sa pakighiusa sa mga Bando Osmeña – Pundok Kauswagan councilors nga magtarong sila sa pagpangalagad sa taga-dakbayan sa Sugbo.

Sa plastada sa Kapitolyo dako kog pagtuo nga makab-ot ni Governor Davide ang iyang mga tinguha sa pagpalambo sa Sugbo tungod kay makita ang iyang pagkamatinud-anon ug way makababag sa Provincial Board.

Daghang nakadayeg ni Junjun dihang iyang gisugyot nga sayo na silang mag-flag raising matag Lunes ug ari na sa alas-7:30 aron inig tangka sa alas-8 diretso nag duko sa trabaho.

Unya iya sang gisugyot nga sal-akan og pangaliya sa Kahitas-an ang ilang flag raising nga labing importante.

Mosugyot lang sab ko, Gov nga kun may oras pa pakapini gyud nga manumpa ug mosaad ang mga kawani sa Kapitolyo nga magtinarong sa pangalagad ug dili magsigeg sibat-sibat ug magtsismis.