Dunay tinunto sa PNP Academy?

“Quitters never win.” Kini gyud maoy insaktong panultihon nga atong tamdan niadtong mga panahon sa atong pagka estudyante sa higayon nga moagi kita og mga rigid trainings sa scouting, Citizens’ Army Training-1 ug sa Reserve Officers’ Training Course ilabina kun magtinguha kita nga  mahimong opisyal.

Mao nga maka simpatiya ko sa tulo ka mga batan-ong Sugbuanon kun tinuod man nga sila gipangtangtang isip mga kadete sa Philippine National Police Academy (PNPA) bisan way igong rason ug bisan interesado silang makahuman.

Ang tulo ka mga kadete nga sila si Venus Canoy Acedillo, Christopher Ylagan Ruiz Jr. ug Kerbee Abay Torrefiel midangop na sa korte ug miinsister sa ilang giduso nga kasong mandamus and damages batok sa mga opisyales sa PNPA nga gipugos gyud sila sa pagpapirma sa pro-forma nga resignation letter aron taktakon.

Ang tulo ka mga kadete nga buot nga mopadayon sa PNPA ug nagtinguha nga maapil sa batch 2017 giabagan ni manlalaban Christopher Ruiz kinsa amahan sa usa sa mga kadete nga kihante nga si Christopher Jr.

Dihang akong gituki ning maong isyu sa akong programa sa radyo niadtong Lunes sa gabii, ang amahan namahayag ug mikuwestiyon sa mga binuhatan sa PNPA  nga gitangtang iyang anak ug ang laing duha ka mga Sugbuanong kadete nga unta nakapasar na man sa written, medical, dental, psychological ug sa uban pang examinations.

Gawas pa, miingon ang abogado nga nakagasto na siya og mga P30 mil pagpalit sa gikinahanglan sa iyang anak sa PNPA.

Matud niya nga ang deperensiya lang gyud kay nakahunong  pagdagan sa 5 ka kilometro nga road run sa unang adlaw isip baptism of fire kay nanagsakit ang tiyan ug nakasuka tungod kay wa makatarong sa pagpaniudto.

Matud pa sa abogado nga bisan buot pa sa mga bata nga mopadayon pagdagan aron motiwas apan gipangbunlot ug gipangguroy sa ilang upper class paingon sa ambulance ug gipangdala sa building ug didto  gipa-eksamen ug  miresulta nga  physically fit gyud sila sa training.

Apan taliwa sa resulta gipagawsan sila og General Order nga pangtaktakon ang tulo uban  sa laing 80 kapin.

Wa nila dawata ang General Order apan wa silay nahimo kay matud pa gihadlok na sila sa mga kadagkoan sa PNPA ug gi-pressure sila pag-ayo.

Nagplano pa gani siya nga mokiha og kasong libel kay gibutang pa sa Facebook nga ni-quit iyang anak ug duna pay gipangpublikar nga naulawan iyang anak.

* * *

Maayo kay makamaong maminaw sa mga sugyot gikan natong mga yanong Sugbuanon sila si outgoing Gov. Gwendolyn Garcia ug incoming Governor Hilario Davide III.

Akong gibalik-balik sa akong radio program sa dySS Super Radyo ug gipatik kini sa akong lindong dinhi sa Cebu Daily News nga ang labing nindot nga himoon ni Gwen mao ang pagtunol personal sa iyang liderato ngadto kang Junjun ug posibleng mahitabo kini kun way laing suspension batok kang Gwen.

Magpasalamat ko nga madayon karong Biyernes ang turnover ceremony sa liderato diha sa Kapitolyo agig pagpakita sa mga Sugbuanon nga makamao kitang moangkon og kapildihan ug batonan ang batasan sa pagkamapahiubsanon ug pagrespeto sa modala sa renda sa pangagamhanan.

Kagahapon sa buntag mainiton nga gidawat ni Gwen si Junjun diha sa iyang opisina ug gisuroy nila ang mga lain-laing buhatan diha sa Kapitolyo.

Dunay saad si Gwen nga andam kining motabang ug mosuporta sa liderato ni Junjun.

Pagkanindot paminawon nga ingon  ani  unta ang mahitabo sa tanang lugar bisan sa barangay level taliwa sa kainit sa milabayng eleksiyon ug regardless sa political affiliation.

Sama sa akong giingon nga human na ang eleksiyon ug panahon na nga mag-uliay sa maayong kabubot-on ang atong mga politiko ug maghiusa na og estoryahon na nato ang kaayohan sa Sugbo.

Kinahanglang ipakita gyud natong mga Sugbuanon ang mga maayong hiyas nga kabilin pa sa atong mga katigulangan.

* * *

Puwerteng suwertiha nilang Dr. Rico Medina uban sa iyang pamilya, driver ug escort nga wa ma unsa dihang gipangbanhigan niadtong Lunes sa kadlawon.

Kinahanglang imbestigahon kini ug tarong nila ni Cebu City Police Director Mariano Natuel Jr. aron maklaro kining tanan ug maglaum ko nga moabag sila si Dr. Medina sa imbestigasyon.

Dako ko og pagtoo nga negosyo ang hinungdan ning tanan.