Naglibog ko kun nganong nagpakahilom si out-going Cebu Gov. Gwendolyn Garcia ngadto sa mga sakop sa media ug wa motubag niining mga pangagpas niining iyang pagpa-recall sa leave of absence sa mga department heads sa Kapitolyo.
Dunay mga halang kaayong punto nga gituhoan nga si Gwen mohimog mga magic transaction niining pipila na lang ka adlaw sa iyang paglingkod sama sa pag-isyu og tseke aron bayran ang mga gipangutangan ug ang pagpa-release sa minilyong salapi nga pundo sa iyang amahan nga si out-going Congressman Pabling Garcia aron ihapak didto sa kang Dumanjug Mayor Nelson Garcia nga iya rang igsoon.
Kining mga butanga kinahanglang mahatagan kini og katin-awan ni Gwen kay anaa baya ang panultihon nga kun sa iningles pa nga “silence means yes.” Kinahanglang matubag kini ni Governor Gwen.
Pero in fairness ni Gwen di na sab tingali mohimo og mga lakang sama sa gikabalak-an sa iyang mga kontra sa politika “out of delicadeza.” Para unsa kun himoon ni Gwen? Aron mosamot kadaut iyang ambisyon sa politka ug lumpagon og samot ang pamilyang Garcia?
Niining mga nahibiling mga adlaw ni Gwen mas nindot pang paminawon nga siya maoy mangunay sa pagpanghinlo sa iyang opisina ug andamon ang engrande nga paghangop ni Gov-elect Hilario Davide III alang sa proper turn-over isip pagpakita og maayong pamatasan, respeto ug ang hiyas sa pagkamapahiubsanon aron mapalig-on ang hiniusang Sugbo.
Kalimti na intawon ninyo ang milabayng eleksiyon ug magpadayon kitang manlimbasog ug makigbisog.
* * *
Nakonbikto man tuod sila si Allan Sinogat ug Lyndon Horandoy pag-ambush patay sa akong kababayan nga si late aissistant Cebu City prosecutor Patrick Osorio apan kuwang pa kini.
Kay hangtud karon gawasnon pa ang utok sa krimen ug ang nang-hire sa duha ka mga konbiktado.
Naglaum ang pamilyang Osorio pinaagi kang manlalaban Jesus Osorio nga masubay gyud sa mga awtoridad ang mastermind sa krimen ug itaral sa husgado.
Pero ambot lang kun kaya ba ang pagdakop sa utok sa krimen kay kasagaran sa mga dagkung kaso blangko gyud ang kapolisan.
* * *
Niadtong Sabado sa hapon atol sa among programang ”Dialogue on the Air” sa dySS Super Radyo gitribukar sa mga pulis nga nakiggubat sa ginadiling drugas nga medyo miusbaw gyud ang gidaghanon sa mga barangay dinhi sa Metro Cebu nga problema gyud kaayo sa drugas.
Sa akong kuwentada miabot na og 27 ka mga barangay ang angayng tutokan.
Dinhi sa dakbayan sa Sugbo miabot og 11 ka mga barangay ang grabeng paghitak sa drugas sumaa pa ni Senior Insp. Gerald Suquib hepe sa Cebu City Anti-Illegal Drugs Special Operation Task Group kon CAIDSOTG.
Nag-una sa iyang listahan ang Duljo-Fatima, Pasil, Ermita, Lorega, Calamba, Dita Pulangbato, T. Padilla, Tisa, Inayawan, Mambaling ug Kamagayan.
Samtang sa dakbayan sa Mandaue dunay unom ka mga barangay segun pa sa Deputy Chief sa CAIDSOTG nga si Senior Insp. Philip Siva ug kini gilangkoban sa Mantuyong, Guizo, Banilad, Bakilid, Tingub ug Cabangcalan.
Si Senior Insp. Rogelio Pineda Jr. hepe sa CAIDSOTG sa Lapu-Lapu City Police mibutyag nga dunay pito ka mga barangay ang ilang gi-monitor karon nga mao ang Marigondon, Maribago, Pajo, Agus, Punta Engano, Babag ug Kalawisan.
Didto sa Siudad sa Talisay, dunay tulo ka mga barangay nga mao ang Tangke, Bulacao ug Mananga segun pa ni Senior Insp. Allan Cuizon.
Ang subo lang kaayong palandungon niining kampanya sa mga tarong nga pulis kay dunay ilang mga kanhi kauban nga nangatangtang na sa serbisyo nga napunta niining matang sa negosyo ug duna say uban kanila nga nahimo na gyung protector sa mga druglord.
Bisan kadtong kidnapping nga nahitabo sa dakbayan sa Talisay dako gyud kaayo ang pagtuo sa kapolisan nga may koneksyon kadto sa drugas.
* * *
Haskang nindota gyud sa among duwa kagahapon sa nagpadayong aksiyon sa Newsmen Basketball Association (NBAC) diha sa Cebu Coliseum.
Sa among duwa sa GMA-7/dySS batok sa hiniusang puwersa sa Sunstar Daily ug dyMF Bombo Radyo puwerteng sikita gyud sa duwa gikan sa 1st ngadto sa 4th quarter.
Nakadaug man tuod mi, apan nagkagidlay sab kay nahutdan sa hangin ug way mga praktis.
Samtang sa 2nd game sayon rang gipilde ang ABS-CBN/dyAB sa team sa CCTN-47 tungod kay lima ra ka mga players ang mitunga unya halos kompleto ang CCTN-47.
Karong Domingo, June 30 nga maoy katapusan sa elimination round, 1st game ang Cebu Daily News/Freeman versus CCTN 47 (8 a.m. to 9 a.m.) samtang sa 2nd game (9 a.m. to 10 a.m.) magbangga ang ABS-CBN/dyAB versus Sunstar/Bombo Radyo ug posible nga adto na ang venue sa Cebu Eastern College (CEC) uban sa makabungog nga suporta sa mga tagdumala sa CEC nga sila si Sir Jeff Go, Sir Sammy Sia ug Sir John Maraat.
Gawas nga magpasalamat mi og dako sa mga buotan nga mga opisyales sa CEC, tim-os sab ming magpasalamat og dako sa Cokaliong Shipping Lines pinaagi sa Chief Executive Officer nga si Sir Chester Cokaliong ug sa Cebu Federation of Beat Journalists (CFBJ) nga gipangulohan ni Sir Elias Baquero.