Daku nako’ng pasalamat sa akong mga bisita niadtong Sabado sa among programa’ng “Dialgoue on the Air” kay gawas nga migahin ug taas nga higayon, wa sab mamalibad sa among hangyo sa GMA-7 nga mo-rescue ug duha ka mga katabang sa panimay nga gipangtanggong sa ilang amo diha duol sa simbahan sa Alliance of Two Hearts sa may Banawa Guadalupe.
Sila si Police Supt. Milagros Soliano sa Police Regional Office (PRO-7); Rosemarie Salazar, women welfare specialist sa Department of Social Welfare and Development (DSWD-7); ug lawyer Joan Saniel Amit, executive director sa Children’s Legal Bureau maoy mi-abag ni Kapusong Lou-Anne Mae Rondina sa malampusong rescue operations sa duha ka katabang.
Magpasalamat ko sa ilang effort inabagan sa mga silingan ug ubang mga opisyales kay pagka-risgo gyud intawon sa duha ka mga katabang nga usa kanila minor de edad.
Ang nakapaet pa gyud kay nahutdan na sila ug konsumo sa sulod sa panimay kay taud-taud na’ng mibiyahe ug wa maka-uli ang mga amo.
Gani miingon ang mga silingan nga nabatasan na sa mga amo nga maoy say gihimo sa ilang mga kanhi katabang.
Simbako kun may sunog pa nga nahitabo sa panimay sa edaran nga mga amo, hurot ug kapaig ang duha.
Alang nako mas maayong tinud-on sa gobyerno kini’ng mga klase sa amo.
Maglaum ko nga ang duha ka mga katabang mo-execute ug affidavit aron mataral sa hukmanan sa kasong serious illegal detention.
* * *
Tangason kaayo ang damgo ni Cebu Vice Gov. Agnes Magpale sa iyang pagpalabang sa ordinansahon sa Provincial Board bahin sa “Anti-Tabloid Ordinance.”
Apan akong nakita nga may ponto si Magpale niini kay dili ikalimod nga dunay mga bastos nga hulagway nga atong makita diha sa mga display sa mga newsstand ilabina kini’ng gikan sa Manila.
Bisan ako nga makakita sa plastada sa mga hulagway makapadani ug makapalain sa huna-huna. Unsa na kaha intawon sa mga batan-on?
Di lang sab seguro isentro sa mga tabloid kini’ng maong ordinansahon kay dunay mga magazines, kalendaryo ug ubang mga pornographic materials nga nagkalat dinhi sa Sugbu nga may bastos nga mga pictures.
Gawas sa mga makadani kaayong estorya mugna sa tigsuwat sa mga tabloid kinahanglang maapil sab seguro paghisgot ang mga drama sa radyo nga makatintal sa mga tigpaminaw ilabina ang mga eksena nga madunggan ang mga igham ug agulo.
* * *
Makalolooy gyud ang mga estudyante sa Mandaue City College nga gidumala ni Dr. Paulus Cañete kun di masulbad sa gobyerno ang ilang problema nga dili kahatagan ug exams alang sa pag-angkon ug lisensiya sa ilang propesyon.
Dili gyud sala sa mga tinun-an nga diha mihuman sa ilang mga kurso kay nganong way taga Ched ug PRC nga mibabag sa sinugdanan.
In fairness nila ni Dr. Cañete dunay ilang mga tinun-an nga nakapasar sa board exams nga gihatag sa atong mga ehensiya sa gobyerno kaniadtu.
Akong nakita nga naipit lang gyud sa pamulitika kini’ng panghitabo karon nga pasirad-an ang Mandaue City College nga gidumala ni Cañete.
Ang maayo seguro’ng himoon sa atong mga politiko diha sa Mandaue ug sa tibuuk sixto distrito mao nga mag-estorya sila ug tarong ug apilon ang mga kadagkuan sa Ched ug PRC lakip na ang mga nagdumala sa managlahing Mandaue City College aron usahon kini’ng duha ka campus.
* * *
Dili ko makabasol ni Regional State Prosecutor Fernando Gubalane nga iyang monitoron si Piskal Mary Ann Castro inig balik niya ug trabaho gikan nga nasuspenso.
Normal kini sa bisan asang opisina nga bantayan ug obserbahan ang kawani nga napa-ubos sa silot.
Matud pa ni Gubalane nga bisan intrigahan siya ni Piskal Castro sa iyang pag-standby matag hapon sa Cebu City Prosecutor’s Office iya gihapon kini’ng himoon.
Kay kun di siya maka-monitor, tabla ra nga inutil si Gubalane sa iyang pagka RSP.
In fairness ni Castro, mas maayo sab tingali nga apilon ug monitor ni Gubalane ang ubang mga piskal nga tagsa na kaayo’ng makit-an ug ang mga personnel sa prosecution service nga dugay kaayong maabot inig ka buntag unya sayo kaayo’ng manguli inig ka hapon.