Mga kanhi pulis maoy mipatay sa pulis ug sa Citom?
Pagkadelikado baya ning mga panahona kay sa managlahing dagkung kaso sa pagpamusil-patay pulos mga natangtang pagkapulis maoy gitumbok sa mga saksi.
Si dismissed PO3 Geoffrey Borinaga positibong giila sa mga testigo nga maoy nag-inusara nga mipusil-patay kang traffic enforcer Armando Daligdig ug gani napasakaan na siya og kaso.
Samtang kagahapon sa buntag, gipahibawo ko ni Cebu City Police Director Mariano Natuel Jr. nga ang duha ka mga responsable sa pagpusil-patay kang PO2 Gerlito Estremos mao ang laing dismissed police officer og usa ka Ian Canseco.
Posible nga tungod sa drugas maoy naingnan sa pagpatay ni PO2 Estremos kay ang duha ka suspect pulos nalambigit sa illegal nga drugas.
Kagahapon nanawag ko ni Natuel tungod kay sa kadaghang testigo nga mitabi sa pagpatay ni traffic enforcer Daligdig, bugtong ang guwardiya ra gyud ang nakuhaan og affidavit sa kapolisan.
Gipasabot himoon sa opisyal nga naningkamot sila pagkonbinse sa uban apan namalibad kay mahadlok na.
Maningkamot sila si Natuel nga ilang makonbinse ang usa ka kawani sa korte pag-execute og affidavit aron paglig-on og samot sa kaso batok kang Borinaga.
Maglaum ko nga dili siya mobalibad kay ang pagsaksi tipik ug kabahin sa iyang moral obligation unya insulto sab kaayo sa kaugalingon kay kun magdumili siya kay anaa siya nangempleyo sa judiciary.
* * *
Akong tubagon si Gabby Malagar sa napublikar niyang lindog sa Banat News niadtong Lunes nga nagkuwestiyon sa among pagdala karon sa Newsmen Basketball Association of Cebu (NBAC) human wa modula ang TV-5 kay dunay usa ka player nga dili padulaon kay giprotestahan sa kadaghanan kay dili qualified.
Ngan nga akoy presidente sa NBAC obligado ko nga mopaklaro sa isyu nga way kapin ug kulang.
Akong iklaro nga way politika sa NBAC tungod kay way mga politiko nga nagdumala ug akong iklaro nga dunay klarong lagda ang NBAC kun kinsa ang mga kuwalipikado nga makadula.
Ako sang iklaro ni Gabby nga wa intawon mahangol sa publicity ang GMA-7/dySS nga pirmeng champion. Amo lang gipruyba nga may katakos kami ug himsog among panglawas.
Sa punto sa lindog ni Gabby misimpatiya siya sa TV-5 nga wa makadula pinaagi sa among treasurer sa NBAC nga si Rudy Quimod nga nagpalaban kaniya ug sa misponsor sa uniporme sa TV-5 nga amigo sab diay ni Gabby.
Ambot kun nahibawo ba si Gabby last year nga bisan daghan ang misupak ug mikuwestiyon sa mga players sa TV-5 kay dili mga kuwalipikado base sa NBAC rules, gitugtan gihapon sa board sa NBAC ang TV-5 nga makadula “on conditional status” aron lang gyud sila makadula agig kaluoy.
Dihang nagpadayon ang elimination last year kaming Sir Bobby Inoferio, NBAC commissioner ang nahilam-os sa daghang protesta gikan sa lain-laing team batok sa TV-5. Hangtud nga miresulta gyud nga ang TV-5 maoy mibangga kanamo sa GMA-7/dySS sa finals. Pero sa best-of-three nga championship diha sa Cebu Coliseum wa gyud silay nadag-an.
Karong tuiga nga “NBAC 2013 tournament,” sa wa pa mi nag-opening niadtong June 2, dunay formal written protest ang GMA-7/dySS og gisuportahan kini sa ubang teams nga mikuwestiyon sa mga players sa TV-5 ug CCTN-47.
Dihang amo kining gituki sa board, gihatagan na lang og higayon nga makadula gihapon ang ubang mga players sa CCTN-47 ug TV-5 ngan nga makit-an sa beat assignments o field bisan driver ug assistant cameramen gawas kang Wilbert Taborada of TV-5 nga anaa ra sa engineering department (TOC) nga wa makit-i sa mga tigbalita sa field bisan kausa ug mismo ilang mga kauban sa TV-5 mikompirmar gyud sa estado ni Wilbert nga di gyud puwedeng makadula sa NBAC.
Nasayod na tanang taga-media including Gabby Malagar sa policy sa NBAC nga dili gyud intawon makadula ang taga-engineering department.
Ang mga kuwalipikado nga makadula kadtong mga sakop sa media nga naka-trabaho na og six months ug direktang involved sa news sama sa: News commentators, news anchors, columnists, sports writers, reporters, news editors sa print media ilabina kadtong mo-field, cameramen ug mga photographers. Sa rules dili makadula ang mga drivers ug assistant cameramen.
Niining mga puntoha napasabot na si Rudy Quimod nga di makadula si Taborada ug mirespeto siya sa desisyon ug amo pang gi- accommodate iyang hangyo nga ang ipuli ni Taborada ilang bag-o nga cameraman kay makit-an man sa field sa mga reporters bisan wa pa makatrabaho sulod sa unom ka buwan.
Apan natingala na lang mi nga mipahibawo si Rudy Quimod nga ila gyung giinsister si Taborada nga makadula unya kun di padulaon di na lang sila modula ug kini maoy ilang estado karon nga mao ang pagpangluod.
Nganong pakasad-on man ang NBAC board sa pagpangluod ni Rudy Quimod nga sa unang bahin ultimo iyang mga players nga mga kauban sa TV-5 nasuko niya kay bisag dunay mga kuwalipikado nilang kauban nga makadula iinsister gyud ang dili kuwalipikado?
Sama sa giingon ni Sir Bobby Inoferio nga wa sab siya makasabot nganong gisakripisyo ni Rudy Quimod ang tibuok team sa usa lang ka player unya opisyal pa siya.
Isip aktibo pa ko niining paugnat sa kusog namong mga tigbalita katungdanan sab nakong ipatuman kun unsay lagda ug unsay kabulahanan sa mayoriya aron hapsay kining among liga nga langkuban sa mga tinuod ug desente nga mga tigbalita.
Kutob sa makaya obligado kaming tanan nga motuman sa lagda sa NBAC aron way gubot.
Sa kaso sa TV-5 wa gyud namo sila gi-single out kay bisan ang akong kauban sa Cebu Daily News nga si Ador Mayol akong gibalibaran sa iyang hangyo nga makadula ang ilang taga information technology department bisan kuwang na sila og mga players nga maoy hinungdan nga nakig-merge sila sa The Freeman nga puwerte gyud hinuong lig-ona.
Laing mga factual issue nga di lang ang taga-TV-5 nasugamak sa NBAC rules mao sab ang taga ABS-CBN/dyAB kay nabalibaran sa sayo pa ilang hangyo nga padulaon ilang mga drivers.
Bisan ang taga-Bombo Radyo, mirespeto sab kay wa nila giinsister nga padulaon ilang driver nga mo-report on air sa presyo sa merkado matag kadlawon.
Ang ako lang mao nga magpadayon unta ang NBAC nga way daghang kuskos balungos. Akong gihangyo ang tanan nga magkahiusa ta pinaagi sa pagpaubos ug pagtuman sa insaktong mga lagda.
Mabuhay ang NBAC!
