Dako kog pagtuo nga ang hinungdan sa pagpusil-patay kang Argao Municipal Councilor Joaquin Banosong niadtong Lunes sa hapon mao ang negosyo niini sa pagpautang diha sa public market sa barangay Lamakan.
Alang nako layo ra kaayo dinhi ang politika nga maoy naingnan kay bag-o pa nahuman ang eleksiyon ug gawas pa motapos na ang iyang termino karong petsa 30 pagkakonsehal unya layo pa kaayo ang 2016 election.
Nahibaw-an nga si Konsehal Banosong kanunay kining moanha sa merkado kay nagpadagan kini og lending unya dunay sinaligan diha sa maong merkado.
Kun mao man kini ang nakuhang kasayoran sa kapolisan, posible nga ang nagpapatay sa konsehal nga kanhi pulis mao ang mga dagkong utangan sa iyang lending.
Posible sab nga kapasanginlan ang mga kasosyo niya sa patigayon.
Bisan kini maoy mga dug-ol nga posibilidad, apan kinahanglang subayon kini pagtarong sa mga pulis basin duna pay laing mga lawom nga hinungdan sa pagpatay sa konsehal nga nag-edad og 65 anyos.
Ngan nga siya kanhi pulis, wa kahay mga pagpangdaugdaug nga iyang nahimo kaniadto ngadto sa iyang mga dinakpan o mga naengkuwentro sa mga nangaging katuigan?
* * *
Nabalaka ko sa ubang mga dispatchers dinhi sa Metro Cebu nga masusama sa duha ka mga dispatcher didto sa Saac, Buaya dakbayan sa Lapu-Lapu nga gipang-pusil patay niadtong Lunes sa gabii.
Ang mga biktima nga silingan ra ug hapit nagdungan sa ilang kamatayon mao sila si anhing Jomar Amemita ug Dale Casio nga pulos nag-edad og 23 anyos.
Akong nahibaw-an nga kining duha puwerteng mga isoga ug mangasuko pa kun hatagan sa mga driver og dos pesos.
Ang nakapait pa gyud niini kay dunay mga dispatchers nga manulis ug manglabnihay.
Dinhi lang sa dakbayan sa Sugbo nagpasad ang mga dispatchers. Ana man untay ordinansa ang ciudad pero kuwang sa implementasyon.
Unya maglibog lang sab ko kay bisan layo pa kaayo ang Pasko, anaa kining pundok sa mga gagmayng bata ug mga bayong-bayong ug mga dagko nag edad nga manganta sa mga pasahero sa jeepneys ug mga buses.
Mangasuko sab ni sila kun way mohatag. Asa man ang atong mga pulis paggukod niining pundoka? Nagmika?
* * *
Nalooy ko kang Bogo Regional Trial Court Judge Mario Trinidad nga nasumbagan sa tawong hubog nga iyang sugo-sugoon human iyang gibalibaran ang suspetsado nga si Charlie Alburo kinsa intresado kaayong moputol sa acacia tree nga duol ra sa bay sa huwes.
Si Alburo nga taga Basak Pardo nagtinguha nga putlon ang puno-an sa acacia tree aron kini maka-kuwarta.
Akong tan-aw nagkuwang si Judge Trinidad pagpasabot kang Alburo.
Ang katarungan sa huwes nga di ipaputol mao nga dili ilaha ang pun-an ug gawas pa maghatag kini og landong sa ilang bay.
Pero ang mas labing maayo unta nga katarungan sa huwes mao nga dili madali ang pagputol sa kahoy kun way pagtugot sa Department of Environment and Natural Resources ug puwede silang pangdakpon ug pangkasohan.
Unya in fairness kang Alburo dili sab siguro siya mataral sa kasong frustrated or attempted murder kay akong nakita nga tabla ra man kadto sa paregla unya way hinagiban ang dinakpan.
* * *
Nahug nga way lami kagahapon ang game 7 sa Eastern Conference Finals sa National Basketball Association (NBA) tali sa Miami Heat ug Indiana Pacers kay gilubong ug 23 puntos ang Pacers sa score nga 99 por 76.
Daghang komentaryo nga naingon ato ang hitabo tungod kay home court advantage sa Heat.
Maayo unta nga usbon ang paagi sa NBA sa mga mosunod nga seasons ilabina inig bangga na sa semi-finals diin ang venue adto na sa neutral nga lugar aron pagtangtang niiing home court advantage.
Pero ambot lang kun mausab pa ba ang ilang naandan ilabina nga ilang nakita nga mas makaayo kini sa NBA nga ma-promote sa tibuok kalibutan ang lugar sa team ug makapalig-on sa ilang ekonomiya tungod kay mokusog man ang negosyo kun asa dapita ang duwa sa NBA.