X

Wala na siguroy laing letra sa alphabet nga may dalang tanghaga sama sa letra nga X.

Kumon nga panultihon sa mga treasure hunter ang “X marks the spot.” Apan sa mga exam, kun sayop ang atong nasuwat nga tubag markahan kini og X sa mo check niani.

Ang X mao usay gigamit nga symbol sa multiplication. Sama sa 7 X 5 = 45.

Sa Algebra, kasagaran kining gigamit  pagrepresentar sa wa pa mahibaw-i. O sa Ininglis pa, the unknown. Ug tugod tingali niani nga kun dunay madanihon nga binuhat nga dili hitsuraan i-describe kini nga may “X Factor.” Dunay talent search nga “X Factor” pero kontest kini sa kanta ug dili sa personalidad.

Gihinganlan ang X-ray og ingon kay wa makahibawo ang nakadiskobre niani kun unsa kini.

Ang X mahimong isuwat ubos sa usa ka artikulo o sugilanon para mopasabot nga nahuman na kini. Usahay para pagpaniguro nga makit-an kini tulo ka X ang isuwat.

Sa middle ages ang X nga masuwat sa usa ka envelope nagtimailahn og usa ka halok o kiss. Karon hinuon nahimo na nga hug o gakos ang X mao nga ang XOXO nagpasabot og hugs and kisses diin ang O na maoy kiss.

Ang mga pelikula nga mopakitag pakighilawas nga way tabuntabon panagaan og X nga rating sa mga censor. Apan para padasig sa mananan-aw ang mga tighimo og ingon niani nga pelikula migamit sa pulong nga “Tripple X.” Nagpasabot nga mas ngilngig ang pasundayag,

Ug tungod tingali sa pangilngigay nga implication ang mga marketing department sa mga camera hilig kaayo mogamit sa letrang X. Ang Canon, pananglitan, dunay Kiss X, G1 X, SX50 HS ug 1DX. Ang Panasonic dunay GX1 ug LX7. Ug karon duna nay “X series” ang Fujifilm sama sa X Pro 1, X100s, X20 ug uban pa. X-Men ang tawag nila sa mogamit og Fuji X series nga camera.

Klaro kaayo ang allusion niani sa X-Men sa Marvel Comic books nga gihimoan na og daghan kaayong pelikula. Morag dili kauban silang Malcolm X ug Madame X sa X-Men.

Sa Roman numerals nagpasabot og 10. Mao nga ang XXX nangahulogan og 30.

Sama sa Norwegian ug ingon man sa Binisaya ang X isulat pinaagi sa duha ka letra nga k ug s. Ang Mexico pananglitan masulat nga Meksiko. Apan ang X sa Kinatsila nga gigamit sa mga lugar sama sa Mexico “h” man paminawon.

Gibutang ang mga bukog nga gaporma og X sa asido kinuyogan og kalabera agig pahimangno apan wala kini makapaminos sa interes sa mga tawo sa letra ng X.