Problema sa kakuwang, sulbaron gyud
Sigurado ko nga daghan pa kaayong kuwang niining pag-able sa klase karong adlawa ilabina dinhi sa dakbayan sa Sugbo.
Sama sa kakulang og mga school buildings, kuwang og mga magtutudlo, kuwang og mga lingkuranan, kuwang sa mga libro ug uban pang mga kagamitan.
Hinuon, naanad na ang atong mga kadagkoan sa Department of Education (DepEd) pagsulbad niining mga butanga.
Kun mahimo adto na lang maklase ilawom sa punoan sa mangga ug adto sa opisina sa principal.
Ang laing paagi mao ang pagklase og half-day ug magklase hangtod sa gabii aron lang gyud pag-accommodate sa tanang tinun-an bahalag magsinardinas.
Kay unsaon duna untay budget nga P87 million sa kagamhanan sa dakbayan sa Sugbo pagtukod og mga school buildings nga niadto pang 2010 apan nababoy tungod sa politika ug bureaucratic red tape.
Pastilan ning atong mga local nga mga opisyales maayong pakungon ang ulo aron makamatikod kun unsa kaimportante ang pagtukod og mga school buildings niining mga panahona tungod sa kadaghan nag mga tinun-an pun-an pa sa K to 12 program sa DepEd.
Niadtong Sabado sa hapon gipahibawo ni Director Carmelita Dulangon sa DepEd Central Visayas nga moabot sa 1.6 milyones ka mga tinun-an sa kinder, elementary ug high school sa mga pampublikong tunghaan ang modagsa sa ilang mga klase karong adlawa.
Mipahimangno si Director Dulangon sa tanang maestra nga magpaguwapa gyud ug mang-lipsticks ug mongisi gyud samtang hangpon ang ilang mga tinun-an.
* * *
Tinuod dili supak sa balaud sa nepotismo kung dayonon ni Talisay City Mayor-elect Johnny Delos Reyes or JVR ang pag-hire sa iyang ikalimang anak nga si John Yre isip “little mayor” o City Administrator pero makapaisa kini sa kilay sa mga Talisaynon.
Unsay buot ipasabot niini, dili na mosalig si JVR sa ubang taga-Talisay human siya gihatagan og mandato?
Tinuod nga kining maong katungdanan nakasalalay dinhi ang gitawag ug “trust and confidence.” Pero buot bang sabton nga wa siyay salig ug wa siyay kompiyansa sa iyang mga kaalyado nga dako kaayog tabang atol sa pangampanya?
Bisan non-career kining maong puwesto ug bisan dili maigo sa law on nepotism apan wa kini magpasabot nga insakto si JVR kay dunay unwritten law nga “delicadeza.”
Kun gusto si JVR nga makasulod iyang anak sa City Hall sa Talisay puwede tingali niyang kuhaong consultant kun asa kini haom.
Kining iyang plano pagkuha ni manlalaban Alfredo Sipalay isip city legal officer mas maayo sab tingale nga tun-an kini og tarong ni Sipalay kung iya bang dawaton kinsa usa sa mga private prosecutor sa kasong parricide batok kang Philippine Benevolent Missionaries Association (PBMA) supreme master Ruben Ecleo Jr.
Maayong masayod si Sipalay nga baga diha ang mga sakop sa PBMA ug gani dunay sakop diha sa konseho nga miembro sa PBMA nga kaalyado ni JVR.
Ayawg kompiyansa ‘Nyor!
* * *
Medyo apektado ang mga gagmayng operator nga hingpit nang ipatuman karong tuiga ang pag-phase out sa mga buses ug mini- buses nga milanat na pagserbisyo og sobras 15 ka tuig.
Pero unsaon man nga di man sab kita makabasol nila ni Transportation and Communications Secretary Antonio Abaya ug Land Transportation Franchising and Regulatory Board Chairman Winston Ginez sa ilang pagpatuman niini kay makaayo man kini natong mga sumasakay.
In fairness sa gobyerno ang sagad madisgrasya sa mga pampublikong sakyanan mao ang mga karaan na kaayo nga gitawag og mga “running coffin.”
Gani kun buot hunahunaon puwerte nang inat sa gobyerno kay mga 11 na diay ka tuig ang regulation batok niining mga karaan nga mga pampublikong sakyanan.
Alang nako sobra na kaayo ang ilang pagpahimulos. Gawas pa kun akoy operator mas maayo pa nga magbag-o sila og mga unit aron minos pa ang maintenance.
* * *
Dako kaayo namong pasalamat sa among mga major sponsors sa nabuksan namong liga sa basketball kagahapon sa Newsmen Basketball Association (NBAC) diha sa Cebu Eastern College (CEC).
Tungod sa suporta nila ni Sir Chester Cokaliong, chief executive officer sa Cokaliong Shipping Lines ingon man nila ni Sir Jefferson Go ug Sir Sammy Sia nga pulos Executive Board sa CEC nagmalampuson kami kagahapon sa among opening sa NBAC 2013.
Dako sab kaayo nakong pasalamat kang Sir John Maraat property custodian sa (CEC) nga maoy nagpahimutang og nagpanindot sa venue.
Salamat sab kaayo nila ni Sir Elias Baquero sa Sun.star Daily ug mao say presidente sa among pundok sa Cebu Federation of Beat Journalists (CFBJ) ug kang Apas Barangay Captain Ramil Ayuman sa ilang way putol nga suporta sa NBAC sukad nga amo kining gibalik sa miaging tuig.
Magpasalamat sab ko og daku ni Sir Bobby Inoferio among NBAC commissioner nga wa gyud intawon pul-i sa pag-abag kanamo.
Mo-congrats sab ko sa akong ka team mates sa GMA-7/dySS nga maoy mi-champion sa miaging tuig ug milampos na sab sa pagpukan kagahapon sa CCTN-47 sa elimination round sa NBAC 2013 unya second ang TV-5 ug 3rd ang CCTN-47 sa miaging tuig.
Kagahapon, midaug usab ang gipalig-on nga combined team tali sa Cebu Daily News ug The Freeman batok sa ABS-CBN/dyAB.
Again congrats usab sa tanang nakadawat ug special awards sama kang super Gabriel Bonjoc nga maoy MVP sa NBAC 2012 tournament ug akoy misakmit sa best defensive enforcer player ug naapil usab sa mythical five sila si Jun Solon, Gabriel Bonjoc, Renante Quinones, Rodel Quimod ug Edgar Escalante. Samtang sila si Godffrey Rellin ug Rudy Quimod maoy mga board iron man/rebounder.
