Angelina Amazona
Dunay mga sugilanon nga miingon nga ang pulong amazon gapasabut nga usa ray totoy: A-mason. Gisapsapan kuno sa mga amazona ang pikas nilang totoy para dili kini makasabod sa ilang kamot inig bira nila sa pana.
Daghang mga iskolar sa anthropology ang di modawat niani. Wala kunoy prueba nga tinuod kini. Ug wala usay basihanan tinuod ba nga quasi-Hispanic ang grammar sa mga sinultian sa mga amazon nga ang A-nagpasabot og usa. Matud pa nga ang sugilanon sa pagsapsap sa pikas dughan sa mga amazon pantasya lamang.
Ug karon ania kining modernong amazon sa Hollywood nga mipatangtang sa iyang duha ka totoy agig panagang sa umaabot nga cancer.
Kining maong amazon mao si Angelina Jolie, anak ni Jon Voight nga misikat sa pelikulang Midnight Cowboy ug nga nakadaug og OSCAR sa pelikulang Coming Home.
Si Jolie sa iyang bahin, midaug og best supporting actress sa pelikulang Girl Interrupted. Apan misikat siya pag maayo sa pelikulang Lara Croft: Tomb Raider
Bisag dili kaayo maayo ang relasyon ni Jolie ug sa iyang amahan nag kuyog sila sa pelikulang Tomb Raider.
Nalakip sa mga pelikula ni Jolie ang: Hackers, Love Is All There Is, Gone In 60 Seconds, Beyond Borders, Taking Lives, Fever ug Alexander.
Dihang mi-back out si Tom Cruise sa pelikulang SALT, si Jolie ang mipuli ni Cruise ug naprobar niya nga mahimo diay nga babaye ang leading character ning maong spy thriller.
Sa pelikulang Mr And Mrs Smith nakauban niya ang iyang kapuyo karon nga si Brad Pitt .
Gawas sa pagka artista, naila usab si Jolie isip ambassador sa United Nations. Usa ka aktibista nga daghang kawsa, naila usab si Jolie sa pag pang adopt og mga bata sa mga pobreng nasud. Usa kuno kini ka reaction ni Jolie sa kakuwang og pagtagad sa iyang amahan kaniya. Buot siya nga mahimong mas maayong ginikanan kay sa iyang mga ginikanan.
Namatay ang inahan ni Jolie nga si Marcheline Bertrand sa sakit nga ovarian cancer. Nahibaw-an ni Jolie nga anaa niya ang genes nga magdala og breast ug ovarian cancer. Matud pa ni Jolie nga ang pagpatangtang sa iyang duha ka totoy mipakanaug sa posibilidad nga magka breast cancer siya gikan sa 87% ngadto sa 5%. Matud pa sa artista gihimo niya kini para sa iyang pamilya ug mga anak para magdugay siya uban kanila.
Gitawag og NSM (nipple sparing mastectomy) ang operasyon ni Jolie diin nabinlan gihapon og atngal ug panit ang iyang dughan. Gasagaran sa nagpatangtang og totoy gilaplapan lang og nga na deform ang ilang dughan. Tungod sa pagkasikat ni Jolie daghan na karong mga babaye nga nahibawo nga mahimo ra silang magpatangtang og dughan nga dili lang laplapan. Dako kuno og kasakit ang bation sa mga kababain-an nga gipang laplapan lang.
Tungod sa iyang gihimo, cover karon si Angelina Jolie sa Time Magazine. Kay iyang gigamit ang iyang pagka sikat pag promote sa mga kawsa nga iyang gidapigan maingon ta nga usa siya ka amazon.
