Tapos na ang mga maligayang araw sa adopted son ni Talisay City Mayor Socrates Fernandez nga si Joavan human nadakpan na pagbalik niadtong Lunes sa buntag didto sa usa ka beach resort sa lungsod sa Moalboal.
Suwerte lang si Joavan nga wa mosukol sa mga pulis sa Moalboal kay kun nisukol pa si Joavan impas gyud unta iyang kalibotan human giisip siya karon nga public enemy no.1.
Wa nay laing depensa si Joavan niining iyang mga nagpatongpatong nga mga kaso gawas sa pag-ingon sa korte nga planted ang tanan sa kapolisan sama sa hand grenade ug mga armas.
Kagahapon wa na gyuy kompiyansa sila si Insp. Henry Orbiso kang Joavan kay daghan kaayong mga mi-escort nga Special Weapons and Tactics members gikan sa Cebu Provincial Police Office nga pulos armado og tag-as nga armas.
Sa inquest kagahapon ni Asst. Provincial Prosecutor Jerome Abarca, si Joavan kasohan sa mga kasong illegal possession of firearms nga may piyansa nga balig P80 mil ug kasong kalapasan sa Commission on Elections gun ban nga may P60 mil pesos nga piyansa sa Barili Regional Trial Court Branch 60.
Samtang sa mga kauban ni Joavan nga sila si Beneto Sellon ug Carlito Canada kasohan og obstruction of justice nga makapiyansa og tag P12 mil didto sa Municipal Trial Court sa Moalboal.
Manghinaut ko nga dili na paeskapohon si Joavan sa mga pulis ug itaral gyud og tarong sa korte aron bayran iyang mga sala.
Kagahapon wa na mopakita si Mayor Soc ug iyang abogado nga si George Bragat sukwahi sa mga nangaging dakop kang Joavan.
Nagtuo ko nga wa na moarte si Mayor Soc kay wa na silay mahimo ug di gihapon sila makapiyansa.
Puwerte gyud ang pagkamarukoy ni Joavan kay sukad kini misibat nagpa-utaw-utaw na lang sa lawod panahon sa adlawan apan inig kagabii mangita og resort aron adto matulog ang kanahan.
Sa mga kuwarta nga gigamit paggasto ni Joavan, ayaw kog ingna nga dili to gikan sa bulsa sa amahan.
Dili kaha to gikan sa intelligence ug discretionary fund sa Office of the Mayor?
* * *
Akong paninglan si Senior Supt. Rey Lyndon Lawas, hepe sa dakbayan sa Lapu-lapu nga masulbad niya ug madakpan ang tulo ka mga batan-ong lalaki nga mitulis ug mipusil sa usa ka batan-ong babaye nga service crew sa McDonald’s.
Makonsensiya tawon mo Colonel Lawas sa biktima nga si Vera Cristy Berdin, 20 anyos, nga taga-Canhulaw, Lapu-Lapu City nga anaa karon nalandig sa tambalanan human napusilan sa tiyan sa tulisan.
Ang biktima nga dalaga, samtang nag-atang og sakyanan sa may barangay Buaya kalit kining gitulis sa tulo ka mga batan-ong lalaki nga nag-angkasay og motorsiklo.
Apan tungod kay naanugnan ang biktima sa iyang cellular phone nga Android mao nga wa niya gihatag nga maoy hinungdan nga siya gipusil.
Ang nahitabo ni Berdin way kalainan niadtong kaso sa usa ka tinun-an sa nursing nga si anhing Ruby Jade Ruba nga gitulis ug gipatay samtang anaa sa gawas sa apartment diha duol sa Provincial Capitol.
* * *
Gawas sa dakung utang, angay sang tutokan ni Governor-elect Junjun Davide sa iyang paglingkod karong Hunyo 30 ang operation sa South Bus Terminal ug ang pay parking sa Capitol premises.
Daghang mitiyabaw niini kay gihimong negosyo sa mga nagduma nga unta angay kining ihatag nga libre sa katawhan.
Lakip sa tutokan ni Davide mao ang mga province owned lots ilabina ang problema sa squatting syndicate luyo sa among complex sa GMA-7 barangay Apas.
Sukad nasuspenso si outgoing governor Gwen Garcia puwerteng daghana ang nanukod og mga bay.
Gani karong bag-o dunay mga sundalo nga gipang-akusahan nga nang-harass ug nagpabuto gyud kay naglumba na og angkon og mga rights diha sa may “grotto” sa may Visayas Command View Park.
* * *
Gidimalas si kapitan Nelson Gingoyon sa Guibungan, Barili human nakaligis-patay sa mabdos nga inahan nga si Line Navarro niadtong Lunes sa hapon diha sa may Mantalongon, Barili ug nakaangol og duha.
Ang depensa sa kapitan nga wa siya makatug samtang nag-drive sa iyang multicab uban sa pamilya ug labaw na nga dili siya hubog kay wala sila mohapit og kumbira sa fiesta sa Mantolongon.
Miingon ang kapitan nga gikan sila sa Cebu Normal University dinhi sa dakbayan sa Sugbo.
Iyang gipasabot nga ang hinungdan sa disgrasya mao nga miongot ang manobela sa sakyanan mao nga wa na siya makabawi ug nangaigo ang mga biktima samtang naglakaw.
Kun tinuod ang giistorya sa kapitan maghatag baya nato kini og leksiyon ilabina niadtong dili magtagad sa ilang mga sakyanan.
Parte niining pag-ungot sa manobela nakasaksi ko niini sa usa sa mga habal-habal driver nga nag-operate sa JY Square Lahug.
Suwerte lang to ang iyang sitwasyon kay way sugat dihang niilog sila sa lane. Apan ang wa niya makaya mao ang pag-balance sa motor ug nangatumba intawon sila dala ang iyang mga pasahero nga manag-uyab.