Wa koy nakitang tawo nga mas ligdong ug maoy makabuntog kang Vice President Jejomar Binay alang sa 2016 presidential elections.
Kun andam lang maminaw ang Liberal Party hierarchy ilabina kang Presidente Noynoy Aquino mas maayong ilang estudyohan si retired chief justice Hilario Davide Jr. nga maoy himoon nilang standard bearer kay kang Secretary Mar Roxas.
Kung si Secretary Roxas maoy ilang presidential candidate medyo takilid lang gihapon si Mar ni Binay.
Niadtong nakatayming ko sa pakighinabi sa kanhi Chief Justice sa Supreme Court dali siyang mibalibad dihang ako siyang giingnan nga kinahanglang molansar siya sa pagkapresidente ngan nga haom kaayo siya ug may karisma sa politika.
Si Davide angayan gyud alang kanako kay nagpabilin ang kainit nga suporta sa katawhan ug anaa kaniya ang mga hiyas sa pagkamatinud-anon ug pagkaligdong nga kini maoy gipangita karon sa bag-ong panahon. Kamao sab, ikomparar intawon sa uban ug respetado gyud.
Apan nakasabot ko sa iyang pagbalibad kay numero uno sukad pa kaniadto wa gyud sa iyang damgo nga mosulod sa politika.
Ikaduha, nagpabilin ang hugaw ug kagaw sa politika sa nasud ilabina ang “vote buying.”
Gawas niini, anaa kining mga kabalaka nga dili gyud makaya ang pagpildi sa taga-Metro Manila.
Apan di tingali makabalibad ang atong pambato nga Bisaya kun iyang makita ang hugot nga suporta sa tanang sector.
Kun gusto gyud ni Noynoy nga dunay makapadayon sa iyang programa nga “Matuwid na Daan” ug magpabilin ang pagka-idealistic sa ilang partido mahimo kini kung si Davide maoy pambato sa 2016.
Maot sab kaayong paminawon nga laing Aquino ang mobanos sa presidente.
* * *
Milampos ba gyud ang krusada sa Dilaab Foundation nila ni Fr. Carmelo Diola batok sa vote buying human nangaparot ang mga beterano sa pulitika? O ba kaha nainutil gihapon ang kawsa nila ug sa taga Commission on Elections (Coemelec) kay napildi sa presyo sa pinalitay ang mga beterano nga nangapusoy?
In fairness, hangtud karon makadawat gihapon ko og mga text messages nga rampant kaayo ang pinalitay bisan asang lugar.
Niadtong Sabado atol sa akong programang “Dialogue on the Air” sa dySS Super Radyo mipasabot ang representante ni Fr. Diola nga si Mayren Cogtas, project assistant coordinator sa Dilaab nga mga 80 porsiento ang ilang pagkamadaugon sa kampanya.
Una niyang gibasihan ang response sa katawhan nga misanong sa ilang panawagan nga dili gyud maayo nga magpapalit.
Gawas niini, ang laing rason tungod kay gipang-pilde gyud ang mga beterano sa politika dinhi sa Sugbo nga nagpasabot nga gusto na ug kausaban ang mga Sugbuanon.
Samtang sila si Comelec in Central Visayas Director Temmie Lambino ug Cebu Provincial Election Supervisor Eddie Aba miuyon sa assessment sa taga-Dilaab nga milampos gyud sila sa kawsa.
Ang gibasihan sa duha ka mga opisyal tungod sa ilang pag-intensify sa checkpoint nga maoy hinungdan nga wa kaayoy mga politiko nga nakapang-apod-apod og mga kuwarta sa vesperas sa eleksiyon.
Gawas niini sukad gihugtan ang pakigbatok sa vote buying nakadakop ang mga awtoridad og 12 tanan ka mga tawo.
Miingon si Director Lambino nga andam nilang imbestigahon ang tag-iya sa kuwarta og kinsay mga politiko nga responsable sa pagpamalit og mga boto.
Giklaro usab ni Aba nga puwedeng gamitong testigo ang ubang mga dinakpan aron matumbok kun kinsay mastermind aron maapil pagtaral.
Kadtong makonbikto, mapriso sulod sa unom ka tuig ug di maka-avail og probation ug mag-atubang pa sa mga accessories penalties sama sa perpetual disqualification to hold public office ug dili na makabotar.
Apan giangkon sa duha ka mga opisyal nga nakadawat sila og susamang impormasyon nga grabe gihapon ang pinalitay og boto niadtong Lunes.
* * *
Unsa katinuod nga dunay ubang mga pulis gihimong “goons” sa mga politiko?
Nakadawat ko og istorya nga dunay lima ka mga sakop sa Special Weapons and Tactics (SWAT) group sa Cebu City Police ang naabot didto sa Tuburan ug matud pa nagpagamit og politiko.
Gani ang lima ka mga SWAT maoy responsable sa dakop niadtong mga armadong tawo nga giingong iya sa naparot pagkamayor nga si Rose Marie Suezo ug sa ka tandem.
Hinuon gipasabot ni Director Lambino nga way irregularity ang pag-adto sa mga SWAT didto sa Tuburan ilabina nga gikinahanglan.
Pero naglaum siya nga dunay moubstantiate og complaint batok sa mga SWAT nga giingong gihimong “goons” aro n ila kining imbestigahon kay ang mga pulis wa gyuy labanan nga mga politiko.
Ang akong tinubdan nakaobserbar nga ang atong kapolisan gihimong “goons” sa mga kaalyado sa presidente sa Liberal Party.
Kung tinuod man kini, ambot lang kun may kaisog pa ba ang taga Comelec pag-imbestigar nga under de bunal man sa Malakanyang.
* * *
Magpasalamat ko sa among kompaniya sa RGMA kay wa gyud intawon putla ang pagpasiugda og summer outing matag tuig alang namong mga kawani uban sa among tagsa-tagsa ka pamilya.
Kini ra gyud ang panahon nga magkatapok kaming tanan ug makahugoy-hugoy gikan sa pressure sa trabaho ilabina sa bag-ohay lang namong election coverage.
Puwera buyag enjoy kaayo mi kagahapon sa Agus Hotel, barangay Agus dakbayan sa Lapu-Lapu uban sa daghan ug lamiang pagkaon, mga mainom ug sa nindot nga venue ug sound system. Ang labing nindot mao gyud ang bonding ug camaraderie matag usa kanamo.
Usa kini sa giatngan sa akong mga anak nga sila si Karl ug Karen ug dili gyud makompleto ilang summer kun way outing kaming mga trahante sa Super Radyo uban kanila.