Kumusta man ang atong mga politiko ug mga kandidato nga nangapildi ug paingon pang mangapusoy sa bag-o lang nahuman nga eleksiyon?
Andam nang modawat sa kapildihan sa gastoso kaayo nga bugno sa politika?
Ang uban gahi kaayong mo-concede bisag klaro nang pildi. Dili makontento kun dili usbon og ihap sa korte.
Puwerte gyung minghoya sa mga kandidato nga pildi pa unya nakautang og dako sa pagpamalit og boto.
Bintaha ang mga nakadaug kay makabayad-bayad gyud sa gipangutangan sulod sa usa ka tuig nga paglingkod.
Reminder lang sa mga politiko nga dako kaayog gasto kun moduso og election protest sa korte, maabtan na lang og laing piniliay dili pa maresolbar ang protesta.
Usa sa mga classic example nako niini mao ang petisyon ni Lakambini “Nenet” Reluya batok sa midaug pagkamayor sa San Fernando nga si Antonio Canoy sa 2010 election.
Kining kasoha naabtan nalang sa eleksiyon niadtong Lunes unya nagpabiling wa pa mahuman diha sa sala ni Regional Trial Court Judge Ramon Daomilas.
Pero in fairness sa huwes dili maoy naglangay-langay sa kaso kun dili ang mga abogado.
Kun modaug si Reluya sa maong election protest dili gihapon siya makaasumer sa katungdanan kay hapit na nahuman ang term sa 2010 to 2013.
Maayo unta kun modaug siya karong eleksiyona pagkamayor sa San Fernando nga gubot pas lukot.
Ang maayong himoon sa mga politiko mao nga modawat na lang sa kapildihan ug suportahan ang mga manglingkod kay kini maoy timaan sa usa ka responsable og tarong nga mangalagad alang sa kaugmaon sa nasud.
Kadtong nangaparot, daghan pang umaabot nga eleksiyon!
* * *
Sa kinatibuk-an sa akong pagsaoysaoy sa segundo distrito sa lalawigan sa Sugbo, medyo malinawon bisan ubos sa Election Watch List ang tulo ka mga lungsod nga mao ang Ginatilan, Ronda ug Dumanjug.
Si Cebu Provincial Police Director Patrocinio Comendador Jr.miingon nga gawas sa tulo ka mga lungsod ila sang gimonitor ang laing duha ka mga lungsod tungod sa kainit sa rivalry sa politika nga mao ang Malabuyoc ug Alegria.
Didto sa Ronda nahimong lalis tali nila ni kanhi Mayor Esteban Sia ug sa Election Officer nga si Jose Menguez tungod kay wa tugoti nga makabotar si Sia kinsa mikontra pagka-mayor ni Mariano Blanco III.
Ang rason kay si Sia usa sa napulo nga naapil sa listahan sa “Overseas Absentee Voters” unya napakyas siya pag-usab ug pagbalhin sa Ronda sa iyang application isip botante.
Si Sia naglagot human nga di siya makabotar ug matud pa mihingan kini og mga pulong nga di maayo kang Menguez.
Akong nahibaw-an nga si Sia nakahupot og dual citizenship (Pilipinas ug USA).
Unya gipasanginlan pa kini sa mga kaatbang nga namayad og mga botante.
Akong girombo si Mayor Sia apan wa na nako maabti. Iyang abogado nga si Reiner Miranda Jr. miklaro nga mokuwestiyon gyud sila sa nahitabo didto sa CoManila kay matud pa wa gyud mo-apply isip absentee voter si Sia.
* * *
Unsa kaha kun hatagan og boxing glove sila si Deputy Ombudsman Pelagio Apostol ug magpapatigyon Efrain Pelaez.
Akong tan-aw pareson ning duha kay si Pelaez medyo mas dako apan si Apostol nga edaran praktisado ug usa ka sakop sa Philippine Marine.
May punto baya si Pelaez nga moreklamo kang Apostol ngadto sa Office of the President human giyak-an ang mga kasong gipasaka batok sa mga Radaza.
Onion-skinned ra sab kaayo si Apostol nga masuko sa balido nga reklamo sa negosyante.
Mibahad pa si Apostol nga mokiha og kasong sibil kang Pelaez inig retire niya sunod tuig ug adto niya iduso ang kiha sa ilang lugar sa Ilo-ilo human kuno siya gipakaulawan sa magpapatigayon.
Unsa man kini? Harassment? Basig nagtuo si Apostol nga iyaha gihapon ang kinatibuk-ang husgado.