Wa ko makasabot ning ubang mga tawo nga sayonsayonon lang paglitok ang ilang mga layo ra sa tinuod nga panghunahuna nga mahitabo ang failure of election o No-El kon No Election Scenario karong adlawa.
Konbinsido ko nga mopatigbabaw ang kalinaw tibuok nasud gikan karong alas-7 sa buntag hangtud sa alas-7 sa gabii ug hangtud na sa proklamasyon sa mga modaug.
Si Commission on Elections (Comelec) in Central Visayas Director Temmie Lambino dinhi sa Central Visayas mipasalig atol sa among programang “Dialogue on the Air” sa dySS Super Radyo niadtong Sabado nga andam na gyud kaayo sila kun hisgotan ang preparasyon.
Matud sa opisyal nga “ready to serve and physically fit” na sila uban sa iyang mga kaubanan sa Comelec ug mga magtutudlo nga maglangkob sa Board of Election Inspectors kon BEIs.
Bisan giangkon ni Lambino nga dunay pipila ka mga Precinct Count Optical Scan (PCOS) machines ang may depekto, dunay daghang ikapuli ug gawas niini, gagmay ra kaayo og problema ang kasagarang makina ug dali ra kining masulbad sa mga PCOS technicians.
Wa sab sila maproblema kun dunay halapad nga brownout tungod kay ang matag PCOS machine dunay battery nga molungtad og 16 ka oras. Busa lapas gyud sa 12 oras nga maoy gidugayon sa piniliay ug may panahon pa nga makalabay sa resulta.
Gawas niini, mipasalig ang tanang service providers sama sa power and communications industry nga wa gyuy paltos ang ilang pagpangalagad karong adlawa.
Pun-an sa insaktong puwersa sa kapolisan ug military nga gipang-deploy na sa mga area nga gikonsiderar nga EWAS kon Election Watch Lists nga maoy momintinar sa kahapsay ug kalinaw.
Si Lambino miklaro usab nga bisan dunay mga lugar nga medyo init ug maoy tutokanan sa mga awtoridad sama sa mga Siudad sa Toledo, Bogo, Danao ug ang lungsod sa Tuburan, way dapit dinhi sa Central Visayas nga ipaubos sa Comelec control.
* * *
Bawal gyud ang pagpanghatag ug pagpangapod-apod ngadto sa mga botante sa mga sample ballots gikan sa mga kandidato ug mga political parties karong adlawa nga Election Day.
Giklaro ni Director Lambino nga gidili gyud ang naandan nga mga binuhatan sa mga kandidato nga mogiya sa mga botante kun asa nga presinto nga mobotar kay usa kini ka matang sa pagpangampanya nga gidili na gyud karon. Ang pangampanya katapusang gitugot niadtong Sabado.
Pero bilib ko sa ubang mga kandidato ug lokal nga partido kay bisan layo pa ang eleksiyon gipadalhan na ko og card nga nakaimprinta akong kompletong pangan ug address ug asa ko nga clustered precinct mobotar.
Ang nakapait pa gyud kay bisan sudlonon kaayo ang akong gipuy-an natultolan pa gyud sa mga kandidato, apan wa silay suwerte kay di ko siguradong makabotar karon kay layo ang akong area of coverage didto sa segundo distrito.
* * *
Tinuod, puwedeng makadakop si bisan kinsa batok sa mga malapason karon sa mga lagda sa eleksiyon sama sa vote buying pero kun di makaya ayaw na lang patuga.
Buot nakong ipasabot ayaw na lang pagpaka-hero kay simbakog praktisado ug mas daku pa ninyo, kamoy mapuno sa bukol.
Daghang paagi sa pagpakabana batok sa mga malapason pinaagi sa pagkuha og video ug kun dili hasolan labaw nang maayo nga mo-execute og affidavit pagpalig-on sa nasaksihan sa opisina sa Commission on Elections.
Pero ambot lang kun duna bay magpakita og magpasaya-saya tali sa manghatag ug sa modawat og kuwarta nga daan nang nasayod nga kasupakan kini.
Sukad na sukad wa gyud ko makadungog nga dunay gidakop sa mga pulis ug sa taga-Comelec niadtong mga tawo sa politiko nga naglibot og kuwarta sa kabalayan.
Kay kun pangutan-on ang mga pulis, dili kini ilang trabaho unya ang taga -Comelec moingon sab nga wa silay mga personnel nga manakop.
Sa laktod gipiyongpiyongan lang kining mga butanga sukad pa kaniadto kay unsaon man naandan na, nabatasan na ug tipik na sa atong kultura sa Pinoy politics ang pagsuburno sa mga botante.
Mangambot lang ko kun molampos ba gyud sila si Fr. Carmelo Diola sa ilang kawsa batok sa vote buying.
Suwerte na kaayo sila si Padre nga maka-konbinse og 1 percent sa dos milyones kapin ka mga botante sa tibuok Sugbo.
* * *
Unsa katinuod nga napasad karon sa dakbayan sa Talisay ang istorya nga nakadawat si PO2 Leandro “Nonoy” Azarcon ug P2 milyones aron lang abagan ang luwas nga pag-eskapo ni Joavan Fernandez?
In fairness haskang dakoa ra sab sa P2 milyones kun tinuod. Pero kun mihatag ug padangog si Talisay City Mayor Socrates Fernandez, dili sab siguro ana kadak-a.
Bisag unsaon nako pag-analisar, apil ang pulis sa drama aron makaeskapo si Joavan.
Atong ibutang nga naluoy si PO2 Azarcon kang Joavan, dako ang posibilidad nga iyang gipasibat tungod sa kaluoy.
Mas maayo sab silang imbestigahon sa Ombudsman Visayas sa ilang pagkainutil uy.
Karon pa ko nga ang public enemy no. 1 sa kapolisan nakasayon-sayon paggamit sa sakyanan sa gobyerno sa iyang pag-eskapo.
Trabaho kinig mga traydor sa kawsa sa kaayohan sa gobyerno.