Notes and collectibles
No, dili antique ang atong topic karon kon dili ang mga butang ug mga kaguliyang ning kampanya para sa piniliay.
Kon laagan kamo nakita ug nakomparar na tingali nino ang mga campaign posters ug uban pang paraphernalia sa eleksyon. Tingali nga nakabantay a kamo nga lahi ang nawng ni Tomas ug Joy sa ilang North district posters kon ikumparar kini south nila nga materials. Murag namuti ug nanghupong sila sa ilang mga posters sa south district pero healthy ug normal ra sila tan-awon sa ilang north district paraphernalia.
Unsay kahulugan niani? Pildihunon sila sa south? Dili. Nagpasabt lang kini nga dili kaayo kamao mo-photoshop ang ilang gipahimo sa ilang mga poster sa south district. Gani kon wa ka masuhito sa ilang panagway (ug di ka mobasa sa ilang ngan) makaingon ka nga laing mga tao ang kandidato pagka mayor ug bise mayor ang gibutang sa BOPK sa south ug lain usab ang sa north.
Maayong koliktahon ang north ug south posters sa BOPK mayoral ug vice mayoral candidates para itandi ug tapigan isip example sa dili maayo nga pag gamit sa Photoshop.
Human mopabadlong ang BOPK ug pataput og stickers sa among gate ang Team Rama nasay mikiat og mibutang tarpaulin sa among paril. Gipatangtang kini sa akong manghud kay basig malain ang among silingan nga Type O nga among gibalibaran dihang mihangyo kini nga motaud og tarp sa among tugkaran.
Dili collectable ang Team Rama tarp nga among gitangtang. Maayo untag kadtong tarp nga gasayaw si Mike Rama maoy among natangtang kay collectible kadto. Usa ka rarity ang political poster nga mopakita sa us aka kandidato nga gasayaw. Murag mo jive kini sa akong giingon nga dili Rio ang kapital sa sayaw kon dili ang Cebu.
Ang laing collectible kon nakarecord kamo mga suroy-siut sa Type O mao ang kahinay sa tingug ni Tomas. Katulo modiskurso si Tomas duol sa among tugkaran ug kanunay kaming way madunggan. Dunay lanug kaayo nga tingug sa mointroduce kaniya dayon kahilum. Unya human sa pipia ka gutlo duna dayuy sipa nga pakpak. Unsa may nahitabo in-between? Makahinumdom ako niani sa sine nga Forrest Gump, diin dihang misugod nag suguid si Gump sa iyang kaagi sa Vietnam kalit nga may miibut sa wire ug namatay ang microphone. Nibalik ang sound dihang miingon na si Gump og –thank you.
Ang ubang maayong tapigang mga papilit ning maong kampanya mao ang “Coco” sticker ni Abellanosa ug ang “Sir Chief” ni Carillio. Mga handumanan sa kahangaw sa eleksyon.
