Nyor Daku (ND): O, nganong naminghoy man ka Nyor?
Nyor Gamay (NG): Nangapply ko pagka watcher sa C-Cimpel, wa ko dawata.
ND: Ngano man? Duna kay criminal record?
NG: Wa Nyor, uy. Wa ko dawata kay di ko registered voter. Ganahan ta ko manerbisyo gibalibaran pa gyud ko. Maayo ning parehas nako ang mo watcher para mas way distraksyon kay di na man ko mobiya sa pwesto para mobotar. Unya mas maayo sab kay non-partisan ko, wa gud koy gibotaran.
ND: Sakto man sab ka Nyor. Pero ang ilang katarungan gud ana nga mas passionate o mas madasigon kang moapong sa kalihokan kay duna ka may interes niani. Duna kay rason kun nganong mobantay ka sa mga balota kay nakabotar ka man. Ang ilang logic niani malagmit nga wa man gani ka manginteres pagbotar nganong manginteres man ka nga limpyo og malampuson ang piniliay.
NG: Mao ba Nyor? Inig human gyud dayon sa proklamasyon sa mga manaug moparehistro kog usab sa Comelec.
ND: Kana kun di ka malimut.
NG: Mao sab.
ND: Morag mas gamonitor man kas politika kay kanako Nyor, unsa may purohan ni Anabelle Rama?
NG: Lisud, Nyor, kuwang sa paghut. Gatuo ko nga iyang tapukon ang mga anti-flyover nga mga aktibista unya iyang paubanan sa iyang mga artista ug pakuyogan og pipila ka sakop sa simbahan ug magpunay silag syagit. Pero morag hinay man ilang hulhol. Lisud, Nyor.
ND: Tomas vs Mike?
NG: Game 7, Tomas.
ND: Ha?
NG: Close fight Nyor. Ug kun close fight ang daghag pundo ang molahutay. Morag naa dapig ni Tomas ang karaang kwarta.
ND: Totol vs Bebot?
NG: Ang pagka di visible ni Totol nipabor niya. Daghan na kong nadunggan nga gamahay aning Abellanosa nga wa kuno motuman sa iyang panaad. Kay wa may gisaad si Totol way maningil niya, way issue batok kaniya ug mahimong humot siya sa mga botante.
ND: Joy vs Labella?
NG: Way bulantingay nga mahitabo ning posisyona. Ang vice mayor sa winning mayor mao say modaug.
ND: Sa konseho?
NG: 60-40 pabor sa Type O.
ND: Yawerds, morag siguro kaayo kas imong gipangyawyaw ha. Og di na moguwa imong gipanulti, labtikan tikas itlog ha?
NG: Ayaw ana Nyor kay mora tag kalibangon.