Nakadayeg kaayo ko niining tinguha nila ni Fr. Carmelo Diola sa Dilaab Foundation, Inc. nga mihimo og kampanya karon sa mga botante dinhi sa Metro Cebu nga dili gyud modawat og kuwarta gikan sa mga kandidato-politiko.
Pero ambot lang kun molampos ba gyud sila sa ilang kawsa ngan nga naanad na gyud karon ang mga botante pagdawat og suborno.
Kun molampos man sila si Fr. Diola pag-usab sa batasan sa kinabag-an nga dili na magpasuburno, usa na ko nga interesado nga mosulod sa politika.
Niadtong Sabado sa hapon atol sa among programang “Dialogue on the Air” ang mga representante ni Fr. Diola nga sila si manlalaban Carlo Fortuna ug Jenny Lea Tan, project coordinator miangkon nga daku gyud kaayong sakripisyo kining ilang gihimo.
Ang ilang gipasabot sa katawhan mao ang dautang epekto sa “vote buying” diin ang katagbaw ug kalipay sa pagdawat og kuwarta sa mga politiko molanat lang og tulo ka adlaw pero tulo ka tuig nga mag-antos sa pagdumala sa mga politiko nga taphaw, way baruganan ug dili ligdong.
Si Fortuna miangkon nga gamay ra gyud kaayo sila og mga volunteers nga mga scholar nga makatabang sa ilang kampanya.
Maglaum lang sab ko nga tinud-anay kining krusada nila ni Padre Diola ug unta dili na nila kini undangan.
Ngan nga ang taga-Simbahan maoy nagpasiugda kinahanglang wa nay mga pari nga modawat og kuwarta gikan sa mga politiko aron pag-set og example sa mga parokyano.
* * *
Niinsister ang management sa Metro Gaisano Colon nga wa gyud makabayad si anhing Mario Alfie Ducayag sa gikuha niini nga tsinelas.
Buot nilang ipasabot nga nangawat ug nag-shoplift gyud si anhing Mario Alfie.
Hinuon self-serving kining gihimo sa taga-Metro Gaisano kay sa imbestigasyon sa National Bureau of Investigation ug sa akong mga kasayuran nakabayad na gyud intawon ang biktima.
Granting nga wa makabayad si Ducayag sa tsinelas, kulatahon gyud diay? Patyon gyud?
Sukad nga mibuto ning isyu sa pagpatay ni Ducayag sa security office sa Metro Gaisano, daghang nanggawas nga dautang istorya batok sa maong mall.
Unsa ka tinuod nga dunay shoplifter nga gilugos sa mga guwardiya kaniadto? Unsa ka tinuod nga ultimong kinatawo pakoryentihan og apil?
Ingon ani kasalbahis ang mga guwardiya sa Metro Gaisano?
In fairness, basig blind gyud niining tanan ang management sa Metro Gaisano.
Si Dr. Nestor Sator, Philippine National Police (PNP) medico-legal officer naputos na sa mga kiha subay sa iyang makauulaw nga findings sa pag-autopsy sa patayng lawas ni Ducayag.
Mao na ni ang mga kalbaryo ni Sator .
Way plano ang Ombudsman pagsuspenso ni Sator?
Nabalaka ko nga makahimo pa og kadaut sa imahin sa PNP ug sa mga medico-legal cases si Dr. Sator kun dili siya mapalagpot sa serbisyo.
* * *
Nagpagawas karon og pahimangno ang taga Department of Trade and Industry kon (DTI) nga dili luwas ang paggamit ug “butane gas canister” sa pagluto sud sa mga panimay.
Ang “butane canister” alang niadtong wa pa masayod mao kini ang uso kaayo karon nga gigamit sa pagluto isip Liquefied Petroleum Gas (LPG) sa kabalayan.
Gani mao sab ni akong gigamit karon sa bay. Sa tinuod lang makapaengganyo gyud kaayo ang paggamit sa “butane canister” kay gamay ra ang iyang stove unya sayon rang hiposon.
Matud pa sa taga-DTI nga delikado kini nga mobuto nga maoy sinugdanan sa sunog kay wa kini mosunod sa kalidad ug rekisitos alang sa pag-refill sa iyang sulod.
Pero sa akong kabahin wa gyud ko mogamit og refill kay bisan akong kapikas mahadlok gyud sa refill.
Kun seryoso niini ang taga-DTI ug ubang ahensiya sa gobyerno nganong ila ra mang gipasagdan ang pagpamaligya sa mga refill nga canister sa “butane gas”?
Way plano ang mga konseho sa mga LGU paghimo og ordinansa aron i-ban ang pagpamaligya sa mga refill nga “butane canister”?
* * *
Misamot ang akong kabalaka nga di na gyud mapasar sa mga politiko sa Pilipinas ang Anti-Political Dynasty Bill kun makasud si Bam Aquino pagkasenador ug molampos sa iyang tinguha si Kris Aquino nga mosulod na sa bugno sa politika.
Akong sublion nga kun gusto gyud tag kaangayan sa politika sa nasud kinahanglang maapil sa definition of terms sa political dynasty kining sitwasyon sa mga Aquino nga gidili gyud ang pagpuli-puli sa katungdanan sa mga sakop sa pamilya.
Karon nga wa pay balaod, nakita na ang kahangol sa puwesto sa mga Aquino.