Patay na ang unionism sa nasud?

Way lami nga selebrasyon sa adlaw natong mga mamumuo karong adlawa kay way increase sa suweldo.

Pakonsoylo ra gyud ang  tanang panghambug sa gobyerno sa paghatag og non-wage benefits sama sa tax exemption ug pagpasar sa Security of Tenure Bill.

Pun-an pa karon nga misamot kadaghan ang mga way trabaho.

Ang mga militanteng pundok sa Sugbo nabalaka kay  misamot kagamay ang union sa mga trabahante.

Si Winnie Badayos, chairman sa Kilusang Mayo Uno mitug-an nga moabot na lang og tres porsiento sa mga kompaniya nga nag-exist ang unionism.

Si Director Edmundo Mirasol  sa National Conciliation Mediation Board kon NCMB nagkanayon nga importante gyud kaayo ang union alang sa kaayohan ug kalamboan sa mga kompaniya ug sa mga mamumuo.

Apan si Philip Tan  presidente sa Mandaue Chamber of Commerce and Industry nagkanayon nga usahay subo lang sab kaayong paminawon kay dunay mga panghitabo nga ang union maoy makaguba sa kompaniya.

Si Jaime Paglinawan, chairman sa Bayan Central Visayas mipadayag nga dili gumikan sa union manira ang usa ka kompaniya sama sa Atlas Mining kaniadto sa Toledo kun dili gumikan sa pagka-barato sa copper nga nakalugi na sa negosyo.

* * *

Bisan sa kalisud, mipasalig ang pamilyang Ducayag nga dili gyud sila magpabayad sa management sa Metro Gaisano bisag pilay kantidad nga itanyag.

Pero giklaro sa inahan ni Mario Alfie Ducayag nga  si Fe Soledad, nga in fairness sa management sa Metro  Gaisano wa gyud motanyag kanila og P3 million aron sila patak-umon.

Giangkon sa inahan ug sa igsoon sa napatay nga si Marie Shantylle nga nakadawat sila og mga tawag gikan sa mga opisyales sa mall aron buot makig-istorya  kanila.

Apan wa sila mosanong tungod kay hustisya ang ilang  gipangayo. Gani naglaraw sila karon sa pagdangop og dagkung pundok aron matabangan.

Nakasabot ko sa kabanay nga mibabag sa kiha sa kapolisan  batok sa CCTV operator sa  Metro Gaisano nga si  Jeffrey Aquino niadtong Lunes sa hapon.

Tungod kay konbinsido ang  pamilya nga ang CCTV operator nga si Aquino gamay ra og partisipasyon sa krimen ug maoy ilang himoong state witness.

Gawas pa wa nay salig ang pamilyang Ducayag sa kapolisan gumikan sa dakung palpak sa findings ni Philippine National Police (PNP) medico-legal officer  Dr. Nestor Sator.

Ang National Bureau of Investigation kon NBI ug ilang abogado nga si Wendel Quiban maoy ilang gisaligan  nga masulbad ang tanang  gumunhap sa misteryosong kamatayon ni “Al-al” Ducayag.

Napun-an ang kahiubos sa pamilya ug misamot ang ilang pagtuo nga tabang-duot ang  gihimo sa kapolisan tungod kay gilipat-lipat sila niadtong adlawng Lunes kay  samtang gipasaligan sila  ni  Acting Cebu City Police Director Mariano Natuel ug Chief Insp. Romeo Santander nga dili i-angan-angan pagkiha si Aquino apan  gi-aksiyonan pagpa-inquest  si Aquino pagkahapon.

Wa pa gyud makontento pagpang-insulto ang taga Homicide Section kay ang  gisukip sa ilang mga dokumento sa kiha mao ang  makauulaw nga indings ni  Dr. Sator inay nga ang unang  nasabotan mao ang findings sa re-autopsy ni Dr. Rene Cam sa National Bureau of Investigation (NBI).

Wa gyud ko makasabot sa kapolisan kun nganong nakiglumba sila sa taga-NBI  nga mao nay naglihok ning  maong kaso.

Unsa man ning gihimo sa PNP, panglawgaw? O ba kaha dunay giduphan sa pito ka mga suspetsado?

In fairness hinoon sa kapolisan, giangkon sa taga-NBI nga apil gyud si Jeffrey Aquino sa krimen.

Kun tarong pa sab ni Police Regional Office in Central visauas Chief, Gen. Marcelo Garbo nganong wa man siya makig-coordinate  kang  NBI in Central Visayas Director Antonio Pagatpat aron  mag-umol og joint task force minus sa findings ni Dr. Sator?

Si Aquino nga akong  na-interview nagkanayon nga ang iyang papel mao ang pagpusas kang anhing Mario Alfie Ducayag human nakompirmar nila nga wa  gyud mabayri ang tsinelas.

Iyang gitumbok ang ilang  supervisor nga si Mauricio Dublados nga maoy misumbag  makatulo ka higayon sa dughan ug mibunal makalima  ka higayon sa lawas gamit  ang dagku nga panit sa electrical wiring.

Matud nila nga upat ra gyud sila ang naka-participate sa krimen. Siya, si Dublados, Melvin Boiles ug Cesar  Celerio.

Dugang hangyo nako sa management sa Metro Gaisano nga unta itugyan nila sa NBI  ang mga nakasaksi sa krimen.

* * *

Alangan taga-Bohol ang atong pasanginlan sa kawat sa P100,000 diha sa San Pedro Calungsod chapel sa South  Road Properties (SRP).

Daku gyud kaayo ang posibilidad nga “inside job” ra kining tanan sumaa pa ni  Cebu City Police Director  Mariano Natuel.

Kini kay inside job, dili  maglisod ang atong  kapolisan sa pagsulbad sa krimen kay anaa ra man sa sulod ang mga responsable.

Nahinumdom lang ko sa kawat  sa mga alahas sa Birhen Sa Regla didto sa dakbayan sa Lapu-Lapu nga hangtud karon wa pa gyud matumbok ang responsable.

Usahay maka-kuwestiyon ko sa akong kaugalingon kun naa ba  gyuy Ginoo kay nganong mahitabo man ang kawat sa sulod sa Simbahan ug sa mga chapel nga unta anaa man  ang dagway sa atong Ginoo  nga nagbantay.

Unsa man dili na gyud moila ug gaba kining mga alagad sa Simbahan?