Maayo unta nga ang gaba sama sa sili

Grabe gyud ang  pagkatig-a sa balatian niining ubang  kababayen-an.

Puwera gaba  di gyud nako makaya  kining ilang pagkamangtas nga

ilang tuyuon ang pagpatay  ug ipakuha  ang ilang gisabak ug gibuntis.

Alarming na gyud kaayo ang abortion karong bag-o. Sa akong ihap-ihap dinhi sa Metro Cebu  miabot  na og upat ka mga fetus o puya ang  napalgan  nga gipanglabay.

Usa  sa dakbayan sa Lapu-Lapu, usa sa Siudad sa Talisay ug duha  dinhi sa  dakbayan sa Sugbo.

Ang pinakabag-o mao  kadtong nakit-an nga  puya  nga gisulod og  pinutol sa basiyo  nga  medyo dako  nga plastic bottle sa mineral water  diha sa island  sa JY Square sa barangay Lahug niadtong  Lunes  sa udto.

Bilib ko sa responsable sa paglabay  kay kanang lugara dunay  mga pulis nga nagbantay ug agianan  kaayo  sa  mga  tawo nga  paingon sa mall.

Ang ako lang ba, nganong  ipanghambog man ang paglabay sa mga inosenteng anghel?

Nganong di man ilubong og tarong?

Paita gyud sa panahon karon. Patuga og palami ning uban unya patyon lang ang bata. Gabaan baya mo!  May unta kun ang gaba moepekto dayon.

* * *

Way mga  maayong  laki  nga mga bombero nga makapalong dayon sa dakung sunog sa mga lugar nga thickly populated nga sikit-sikit ug gama sa kahoy ang kabalayan.

Sama sa dakung sunog  sa Bato Ermita niadtong Sabado sa gabii nga  daw sama og impiyerno.

Sa text nga akong nadawat ni Alvin Santillana  operations officer  sa Cebu City Risk Reduction  and Management Council miabot  tanan ug 240 ka  mga  panimay ang apektado.

Sa 240 ka mga  panimay, 228 ang totally burned  samtang  12 ang partially damaged.

Puwerteng  paita gyud kay miabot og 2,010 ka individual ang apektado diin  gilangkoban kini og 438 ka pamilya.

Kining lugara  nasunog na niadtong tuig 2007 ug wa pa gyud kahatagi og kasulbaran  ang pagpalapad  sa  agianan diha.

Manawagan  ko  nila  ni  Cebu City  Mayor Michael Rama  nga kinahanglang wa  say tugtan nga makatukod og balik sa ilang panimay diha  hangtud nga  dili ma-survey ug hangtud dili butangan og daghang  access roads  dihang lugara.

Duha  akong tuyo diha nganong butangan og daghang  kalsada. Una aron dili maglisod atong mga otoridad pagsulbad sa grabeng problema  sa  drugas ug ang  ikaduha  mao  nga aron dunay insaktong agianan  ang  atong mga  bombero ug kapolisan aron sa panahon nga dunay sunog ug  dunay krimen dali ra ang pagresponde.

* * *

Hisgot na man gyud ko og illegal nga drugas, magpasalamat  diay  ko sa  among hepe sa kapolisan sa lungsod sa Dalaguete nga si Insp. Dexter Basirgo ug iyang mga sakop nga  milampos pagdakop sa  giingong level  2 nga drug pusher nga si Wilfredo  Muñoz  “Edo”  ug sa anak niini nga  si Mark Raymund  ug sa bata-bata nga  si Jefferson Antipala sa buy-bust operation niadtong Domingo sa Cacarpo Tuba.

Sa kasayoran si Munoz, ig-agaw ni Municipal Councilor Federico Munoz kinsa maoy  naghupot  sa  Committee on Peace and Order.

Haskang ngilngiga  kay kining mag-ama nag-maintain og drug den o suyopanan  unya  nakuhaan og 62 ka sachet nga shabu,  may  armas pa  nga .38 revolver ug .357 unya may hand grenade pa.

Estorya sa kapolisan  nga  dihang  dunay usa ka kauban nilang  pulis nga maoy tigpakaaron ingnon nga mopalit og manggamitay dali kaayong nakabantay si “Edo” ug nakigpinusilay ug nakasibat bisan daghang igo sa bala .

Apan wa gihapon makalusot  ang  ig-agaw  sa  konsehal kay nakadawat  og  information  si Cebu Provincial Police Director Patrocinio Comendador  nga dinhi dagan sa Siudad si “Edo” ug diha ra sa Cebu City Medical Center nagpatambal  hinungdan sa iyang  pagkasikwate.

* * *

Unsa may  buot ipasabot sa mga rebeldeng  New People’s Army  kon NPA  niining ilang giingon nga kinahanglang mananghid una ang mga politicians ngadto sa ilang  mga  labaw sa  dili pa mangampanya  sa  ilang  gipang-okupahan nga  mga lugar?

Nagpasabot kini nga way exempted ang mga politiko sa ilang pagpangolekta og revolutionary  tax?

Kun mao kini, mao diay nga puwerteng lig-ona  pa sa NPA ning mga panahona kay gawas ilang daug-daugon ang mga negosyante, pangilkilan sab nila ang mga politiko nga maoy maghari sa atong  gobyerno.

Daku  kining insulto sa gobyerno ilabina  sa atong Armed Forces  of the Philippines.

Hayahay kadtong mga kaalyado nila nga mga politiko kay dili hilabtan ug dili  mabiktima sa ilang pagpang-ambush.

Pero insakto  si kanhi Vice President Teofisto Guingona nga iyang paimbestigahan og tarong ang pag-ambush sa iyang  asawa nga si  City Mayor Ruthie de Lara Guingona ug sa mga kauban kun NPA ba gyud ang responable didto sa pag-utlan sa  barangay Kapitulangan at Binakalan, Gingoog City.

Dili kaha mga kontra ra sa politika sa mga Guingona ang responsable ug gipaangkon lang sa taga-NPA aron paglibog sa  mga otoridad?