With all due respect sa inahan ug anak nga nadakpan sa pagpang-recruit sa 15 ka mga batan-ong babaye gikan sa Getafe Bohol, dili ko konbinsido sa ilang depensa nga ang mga bata nga ilang nakuha pasudlon isip mga katabang lang sa panimay ug sa mga tindahan sama sa Internet cafe didto sa Pampanga.
Mas lig-on ang narration of facts sa mga bata ilabina sa upat ka buok nga way gitago ngadto kang inquest prosecutor Rodulph Joseph Val Carillo nga sila giingnan sa mga dinakpan nga motuman kun pahuboon atubangan sa computer subay sa kagustohan sa ilang mga langyaw nga customers.
Sa testimonya sa mga batang biktima klaro kaayo nga sila gi-hire alang sa cyberpornography.
Nakuha usab sa piskal nga way permit gikan sa Department of Labor and Employment nga maka-hire ang mga dinakpan.
Gawas pa, ilang gilukatan daan og ticket sa barko ang mga biktima unya sa matag mokuyog hatagan og pasiuna nga tagsa ka libo ngadto sa tag mil kinyentos.
Klaro sab kaayong palusot ang ilang gihimo kay ilang gibuwag ngadto sa tulo ka grupo ang 15 ka mga batan-on ug gimanduan pa kun pila ang edad ipatubag, nga sila nakatongtong na sa 18 anyos, kun dunay mga pulis nga mangutana.
Bisag tanan pang ginikanan sa mga bata nga mga iresponsable nga motestigo pabor nila, dutlan gihapon sila sa kaso.
Maayo man gani nga kasohan og apil ang mga ginikanan nga dawat limpyo.
Kun tinguha sa inahan ug anak nga sila makalingkawas, mas maayo pa nga ilang tabangan ang gobyerno paglutos sa mastermind ning matang sa sindikato.
Sa akong obserbasyon, ang mga dinakpan dunay amo didto sa Luzon ug sa gawas sa nasud ug manghinaut ko nga madakpan sila sa labing daling panahon.
* * *
Akong gibalikan ang suki nakong Internet cafe sa may uptown area ning dakbayan nga napakyas kaniadtu pag- block sa mga porno sites.
Apan subo nga palandungon kay inutil gyud gihapon sila hangtud karon sa pag-shutdown sa mga porno sites kay akong gisuwayan pag-abli ang usa sa mga sites ug milampos gihapon ko.
Ang tag-iya miprangka kanako nga bisag unsa na lang ang ilang gihimo aron way maka-access sa mga porno sites nga maoy gikabuangan sa mga batan-on.
Miangkon ang tag-iya nga inutil gyud silang mga operator tungod kay dunay mga experto kaayo nga maka-abli og balik.
Ang iyang gihimo mao na lang ang pagbutang ug pagpatapot ug mga notices sa matag cubicle nga pagawson kadtong motan-aw og porno sites.
Pero akong tan-aw dili gyud kini maoy makasulbad sa problema. Ang maayo sigurong himoon sa mga tag-iya, operator ug sa mga kadagkuan sa gobyerno mao ang pagtinabangay nga maputol gyud kini sa hingpit.
Ambot kun tinuod ba kadtong giingon sa mga kadagkuan sa Cebu City Anti Indecency Board (CCAIB) nga mihimo sila og regular inspection sa mga Internet cafe dala ang ilang mga experto.
Akong tan-aw sa taga CCAIB, istorya ray gadaku nila.
* * *
Supak ko sa gipalabang nga balaudnon sa Kongreso nga House Bill 4455 (Anti-Corporal Punishment Bill).
Akong nakita nga mas epektibo pa gihapon ang pagdisiplina ngadto sa kabataan pinaagi sa pagbakos ug paglatos.
Gani sa akong kabahin magpasalamat ko sa mga latos ug bakus kaniadto sa akong mga ginikanan.
Sama sa akong gibalik-balik, mas maayo gyud nga hatagan sa gobyerno og insaktong higayon ang mga ginikanan nga maka-impose ug disiplina ngadto sa ilang mga anak ilabina sa panahon karon nga lahi na gyud ang kabataan sa akong panahon.
Di ko moingon nga mouyon ko sa ubang mga paagi sa mga ginikanan nga daw sama sa nagbunal og halas ngadto sa ilang mga anak. Supak sab ko nga ang mga magtutudlo maoy mobunal sa mga bata. Ang akong punto mao nga itugyan ang tanan sa ginikanan ang pagpahamtang ug disiplina kay siya maoy mas nahibawo sa limitation sa iyang mga anak ug ang pagdisiplina sa mga bata kinahanglang adto magsugod sa pamilya ug sa panimay.
Pagkanindot kun madala lang sa istorya ug maymay ang mga badlungon ug si-aw. Apan sama sa akong giingon, di gyud malikayan nga makalatos ang ginikanan kun sobra ra sab ang gihimo sa mga bata isip pagpa-ila sa ilang kasaypanan.
Gawas pa sab, way buang nga ginikanan nga iyang pasobrahan ang pagbunal hangtud nga siya ra gihapon ang magmahay ug magsagubang sa sakripisyo kun moabot sa punto nga marisgo ang bata.