Judge Veloso pabor ni Bella Ruby?

With all due respect, kun palawoman pag-analisar ang 11page order ni Judge Ester Veloso bahin sa iyang pagtugot nga papiyansahon si Bella Ruby Santos sa kasong kidnapping with homicide sa bata nga si Ellah Joy Pique morag absuwelto na si Bella.

Sa iyang discussion nagduda ang huwes nga morag way klaro ug di katuhoan ang testimoniya sa 12-anyos nga tinun-an sa grade six.

Matud sa huwes, “Of all the prosecution witnesses, it is only the minor child Algen Bautista who claimed to have seen Ellah Joy Pique being invited into a vehicle by the herein accused Bella Ruby Santos. When questioned on direct examination, however, Algen Bautista initially answered that the first time she ever saw Bella Ruby Santos was in the news on TV. After further questioning, she then stated that she saw Santos when Ellah Joy was taken.”

Unsay buot ipasabot niini? Nagduda  ang huwes nga tinudloan nga testigo ang bata sa taga-Criminal Investigation and Detection Group-Police?

Kun ingon ani man ang dagan, mas  maayo tingali nga mangita pa og dugang  testigo ang prosecution nga magtumbok ni Bella nga maoy nag-pick up ni Ellah Joy bisan dili gyud sila makaestablisar kun unsay motibo sa pagdagit ug pagpatay sa bata.

Laing mga crucial points sa discussion ni Judge Veloso mao nga wa gyud maestablisar ang motive sa krimen ug ingon man nga way ebidensiya nga napresentar kun unsay nahitabo ni Ellah Joy gikan nga gi-abduct pagka alas-4 sa hapon hangtud nga gipatay kini sa mga alas-11 sa gabii.

Nakasabot ko sa punto sa huwes nga circumstancial evidence lang ang gisaligan sa prosecution nga unta ingon ani kinahanglan gyud ang kutay sa ebidensiya nga way putol.

Pero ambot lang kun motuo ba si Judge Veloso nga dunay mga perpetrator nga idlas kaayo. Buang na kaayo ang kriminal nga ipasaya-saya sa publiko ang biktima sa abduction.

Hinuon, in fairness ni Judge Veloso usa siya sa mga ligdong nga mga huwes dinhi sa ato nga angay lang respetohan.

Karong adlawa, maningkamot gyud ang pamilya ni Bella nga mopiyansa og tunga sa milyon ka pesos ilabina nga ang prosecution panel dali kaayong nakaduso og motion for reconsideration ug ipa-hold in abeyance aron pugngan una ang pag-piyansa ni Bella.

Apan ang abogado ni Bella nga si  Rameses Villagonzalo mipasabot nga dakung tinunto ang pleading sa prosecution kay matud pa nakasupak kini kay summary ug interlocutory ang issue sa bail.

Iyang gipasabot nga mapugngan lang ang pagpiyansa  ni Bella kun dunay ipagawas nga restraining order ang Court of Appeals  o ba kaha ang Korte Suprema.

* * *

Sa nahitabo karon ni Metropolitan Trial Court in Cities (MTCC) Judge Rosabella Tormis naigo siya sa istorya sa taga-amo sa South nga “bisag asa likay, piti gihapon,”

Kini tungod kay naay duha ka managlahing desisyon nga siya ipatangtang sa judiciary ug pakuhaan pa og lisensiya sa pagkaabogada.

Sa unang kaso, kabahin sa iyang kapakyas pagresolbar sa daghang kaso. Samtang sa ikaduha mao ang iyang  kalambigitan sa kontrobersiyal nga “marriage scam.”

Nilang upat ka mga Cebu City MTCC Judges nga gipangtaktak karong bag-o tungod sa marriage scam bugtong si Judge Tormis ra ang ipaubos sa disbarment proceedings.

Buot bang ipasabot nga pinakadaghan og anomaliya si Judge Tormis ikomparar nilang Judges Gil Acosta, Anatalio Necessario ug Edgemelo Rosales?

Kun ma-disbar si Judge Tormis siya maoy pinakaluoy sa tanang mga huwes dinhi sa Sugbo kay kulban gyud tawon sa panginabuhi nga unta niining higayona importante kaayo  ang iyang income ilabina nga medyo edaran na.

Kumusta naman tuod ang bana ni Judge Tormis nga bag-o lang gioperahan?

Si Judge Edgemelo Rosales nga akong naistorya niadtong Biyernes miklaro nga  mo-file siya og motion for reconsideration ug dili siya monaug hangtud way kamandoan ang Korte Suprema.

Iyang gipasabot nga dili siya deserving nga taktakon kay first offense pa kini ug gawas pa gilibkas dayon ang ilang  suspension kaniadto ug gani nabayran pa siya sa iyang suweldo niadtong pag-serve nila sa suspension.

Gawas sa upat ka mga huwes ipalagpot usab sa serbisyo ang upat ka mga court personnel ug dunay duha nga gipang-admonish tungod gihapon sa maong scam.

Ang gipangtangtang nga mga kawani  sa korte mao sila si Helen Mongaya, court interpreter ni Tormis; Rhona Rodriguez, administrative officer 1 sa Office of the clerk of court sa Regional Trial Court (RTC); Desiderio Aranas, process server sa MTCC branch 3 ug Rebecca Alesna court interpreter sa MTCC Branch 1.

Si Rhona Rodriguez nga laing  taktakon, puwerte intawong hilak pagkasayod sa balita kay siya maoy gisaligan sa iyang  mga anak nga nangeskuwela pa.

Gani nanaad pa nga maghikog na lang  siya. Apan gialam-alaman sa iyang mga  kauban nga mo-file og motion for reconsideration sa pangindahay nga igo ra siyang suspensohon.

Samtang ang gipang-admonish mao sila si Celeste Retuya clerk III sa MTCC Branch 6 ug Emma Valencia stenographer III sa RTC 18.

Pero akong mga tinubdan mibutyag nga dunay daghang mga nalambigit sa marriage scam nga puwerteng dagkoa og igo kaniadto sa mga foreigner apan wa maapil sa imbestigasyon sa audit team sa Korte  Suprema.

Kun akoy usa sa mga nasikwate sa palusot sa kasal sa korte, dili nako managana pagtribukar sa ubang mga nalambigit aron patas ang tanan.