Andam magpatangtang ang Lupon member sa Apas

Maayo kay mitubag na ang usa sa mga sakop sa Lupon Ng Tagapamayapa ni kapitan Ramil Ayuman insa giakusahan nga usa sa mga namaligya og mga “rights” sa military reservation diha sa may Groto area luyo sa among complex sa GMA-7 human nga akong gipublikar dinhi sa akong lindog sa Cebu Daily News niadtong Lunes nga isyu.

Si Maria Jennifer Amante nga mas nailhang “Mary Jane” kinsa giubanan nilang Lea Lepiten ug Marianne Mercader sa grupo nga CFARMCHAI nanghimakak sa mga pasangil.

Matud sa Lupon member nga andam niyang atubangon ang bisan unsang imbestigasyon ug iyang hangpon kun taktakon man siya pagka-Lupon member sa Barangay Apas.

Iyang giangkon niadtong Lunes sa gabii sa akong programa sa radyo sa dySS nga gikasab-an siya ni kapitan Ayuman sa mga nanggawas nga mga pasangil kay dili gyud maayong paminawon nga inay sila maoy mohusay sa mga nagkasungi apan siya nay husayon.

Si Amante mihagit sa mga tawo nga giingong iyang gipabayad sa pag-angkon og mga puwesto pag-execute og affidavit aron pagpamatuod niiing tanan.

Si Amante miangkon hinoon nga gawas nga may panimay siya sa province owned lot sa atubangan sa GMA-7 complex sa Homeowners Association ni Col. Fatual duna sab siyay puwesto ubos sa CFARMCHAI diha sa may Groto area nga luyo sa GMA-7 apan matud pa pangan sa iyang manghud pero siyay nagbayad sa monthly dues.

Apan dunay mga mi-text kanako atol sa maong programa ug nagkanayon nga natural nga way mo-execute og affidavit batok kang Amante human usab nakabenipisyo og puwesto.

Duna say mga opinion nga kini maoy trabaho sa mga professional squatters nga magtukod og mga panimay sa yuta nga dili ila unya ibaligya ra gihapon.

Pagkakaron nga ubos sa kasamtangang pagdumala ni Acting Gov. Agnes Magpale, dili pa makahimo og tukmang lakang sa pag-demolish sa mga gipabarug nga mga panimay.

* * *

Makapanghambug na gyud karon ang mga residente ug mga opisyales sa barangay Lahug kay nakaangkon na gyud og desente nga public wet market ug gani karong adlawa maoy grand opening.

Puwera buyag nindot gyud ang bag-ong merkado kay ang desenyo susamag barko.

Tres andanas ang maong edipisyo og kompleto sa linya sa tubig, may mga CR ug dunay puwesto alang sa mga baligya.

Tinuod gamay ra ang merkado apan sulit na kaayo kini aron masulbad na sa hingpit ang traffic sa habig sa may Aderan Hotel ug sa mga nagpuyo sa mga residential area paingon sa La Guerta Lahug.

Tungod sa kagamay sa merkado daghan pang mga naninda ang dili masulod sa bag-ong merkado.

Akong nadunggan si Lahug barangay councilor Mary Ann Delos Santos nga kadtong dili masulod sa merkado pasensiyahay nalang kay di gyud nila tugtan nga makapaninda sa kilid sa kalsada kay maoy nagdalag traffic ug maoy hinungdan nga ang mga tawo adto na moagi sa kalsada.

Moapelar lang ko ni konsehal Mary Ann nga ilang pangitaan uog paagi nga makapaninda gihapon kadtong way mga puwesto sa bag-ong merkado aron makapadayon sa panginabuhi.

* * *

Nagpasalamat ko nga ang mga karaan og original nga nagdala og nagdumala sa Philippine Yawyan Martial Arts ubos sa pagdumala ni Grand Master Julius Villaflores nakaabli gyud og gym sa may Lahug.

Pinaagi kang Master Jess Lavandero naningkamot gyud pinaagi sa pag-abag ni Sir Mark Castillo nga apo sa tag-iya sa IPI kon International Pharmaceuticals, Inc.

Ang insaktong address karon sa original nga Yawyan Martial Arts anaa sa karaang bay sa mga Castillo diha 7th Friendship Street Peace Valley sakop sa barangay Lahug nga paingon sa OPRRA ug sa eskuwelahan nga Saint Francis De Assisi.

Sa tinuod lang taud-taud na kining nabuksan ug gani nakahapit ko niadtong higayuna ug nagkaabot mi ni Grand Master Villaflores.

Karon nga summer tayming nga way klase ug dili kaayo busy, mibalik ko pagpraktis uban sa akong duha ka mga anak agig pagpalig-on sa lawas niining matang sa paugnat sa kusog.

Dili tumong nako nga moaway ko ni Manny Pacquiao. Ang importante nga magpabilin kong himsug kanunay.

Si Sir Jess nagpahibawo nga kinsa kadtong interesado sama sa akong gihimo karong summer, welcome kanunay ubos sa barato ra kaayo nga bayranan.

Ang mga oras sa ting-praktis: 9:30 a.m. to 11:30 am; 3 p.m. to 5 p.m. ug 7 p.m. to 9 p.m.

Pero nakatawa ko sa akong anak nga si Karl Anthony kay iyang paapilon ug praktis iyang pinanggang inahan aron mosamot ka paspas molaba, mangutaw ug ubang mga gimbuhaton sa pamilya. Hehehe.

Akong nasabtan ang salabutan sa akong anak nga nakasabot gyud diay siya sa among gisudlan karon nga gawas nga makamao kana mosukmag, mopatid ug tanang matang sa depensa mas bililhon kining matang sa paugnat sa kusog kay makapahimsog sa panglawas ni bisan kinsa nga mosulod sa Yawyan.

Kitakits ta didto!