Gawas kang Regional State Prosecutor Fernando Gubalane, gibutyag usab ni Gina Santos, usa sa mga presidente sa Homeowners Association sa kontrobersiyal nga lote nga iya sa Kapitolyo luyo sa among complex sa GMA-7, nga dunay lima ka mga pulis sa Mabolo Police Station ang nakakuha og puwesto.
Dili tuyo ni Santos nga dauton si Gubalane kay ang iyang punto sa paghatag og puwesto ni Gubalane aron makatabang sa ilang grupo nga molig-on ug nanlimbasog nga masumpo ang giingong tinunto sa mga Central Command kon Centcom officials ug ubang grupo nga puwerteng nakapahimulos.
Gipasabot ni Santos nga wa gyud intawon sila mamaligya ug mga “rights” sukwahi sa mga pasangil.
Giangkon usab niya nga iyang gihatagan si manlalaban Chezie Demegillo isip bugti sa pagtabang sa abogado sa mga punto legal.
Samtang sa ilang kontra nga asosasyon nga grupo nilang Lt. Col. Wilson Feria, retired Lt. Raul Lepiten ug sa asawa nga si Lea, mipasabot usab nga wa gyud intawon sila mamaligya ug mga “rights.”
Ang duha ka nagbangi nga grupo dunay mga personalidad nga gipanghinganlan nga namaligya apan wa makatunga sa among programang “Dialogue on the Air” niadtong Sabado taliwa nga apil sa gipang-imbitar.
Akong paaboton nga makatubag sila si Lita Cabaltera ug mga kaubanan.
Si kapitan Ramil Ayuman sa Apas mipasalig nga andam niyang taktakon pagka-Lupon member si Jennifer “Mary Jane” Amante kun mamatud-an nga apil kining namaligya og puwesto sa luna sa Kapitolyo.
* * *
Morag gihilab sab akong kasing-kasing nga nagbasa sa article dinhi sa Cebu Daily News niadtong Biyernes kay hangtud diay karon di pa maayo ang relasyon ni former senator Sonny Osmeña ngadto sa iyang anak nga si kanhi vice governor John-John Osmena.
Pero ambot lang kun di ba kini tipik ug kabahin sa propaganda ni Sonny Osmeña kinsa milansar karon pagka-mayor sa dakbayan sa Toledo.
Alang gud nako ba, puwede man mag-away ang mga sakop sa pamilya sa politika pero di sab maayong paundoyonan nga magbungol na lang hangtud sa hangtud.
Sa pangidaron karon ni former senator Osmeña, ang labing maayong himoon mao nga maningkamot gyud siya nga magkabalik ang iyang maayong relasyon sa iyang bugtong anak kinsa namahayag nga medyo mitagam na sab sa pamulitika dinhi sa Sugbo.
Si kanhi vice governor John-John Osmeña naparot pagkagobernador ni suspended governor Gwen Garcia unya gitaral pa gyud sa kasong anti-graft sa Sandiganbayan subay niadtong kontrobersiyal nga Perdido Lex Foundation nga nakasakiyo og P5 million sa Kapitolyo.
Pero in fairness sa batan-ong Osmeña nga atua na karon sa Denver, Colorado, bag-o lang nakalingkawas sa kaso sa Sandiganbayan niadtong Enero human matud pa nakonbinse ang mga mahistrado nga dili makahimo si Osmeña sa pagluko sa probensiya sa pagtukod ug bogus nga foundation.
Ang former vice governor nagmakuli paghingan kun kinsay mi-frame-up kaniya. Apan ang iyang amahan hugtanong mitumbok nilang kanhi gobernador Pablo Garcia ug suspended governor Gwen Garcia nga maoy mi-frame-up ni John-john.
Pero in fairness sa mga Garcia labaw na sigurong wa gyuy papel sa pagtukod sa Perdido Lex Foundation kay ang mga incorporator nga sakop man sa bay ni John-john ug mga kauban niyang opisyales ug mga kawani under sa office sa vice-governor.
* * *
In fairness kang Chief Insp. Ceferino Tabay Jr. nga deputy chief sa Bogo Police Station nga nakapusil-patay sa uyab sa iyang anak, maki-angayon lang sab siguro nga modepensa ang pulis sa iyang kaugalingon ug sa iyang anak nga babaye kun tinuod nga armado ug mibunot sa iyang armas ang biktima ug agresibo sab nga mopusil gikan nga nanag-away ang managhigugma.
Bisag kinsa tingali nga amahan nga nakakita nga nagkadugo iyang anak nga babaye gikan nga gi-away sa uyab mosurok gyud ang dugo ug mapugos paghimo sa krimen.
Pero kinahanglang subayon kini og tarong kun armado ba gyud ang biktima nga si Vincent Paul Montesclaros ug nagmakuli pakig-istorya sa amahang pulis samtang didto sulod sa payag nga anaa ra sa sulod sa Don Catarata Memorial National High School.
Akong nahibaw-an nga ang pamilya sa biktima modangop sa National Bureau of Investigation kay way salig sa imbestigasyon sa kapolisan ngan nga opisyal ang subject sa imbestigasyon.
Pero unsa ka tinuod ang impormasyon nga daan nang namulong ang amahan nga pulis nga wa gyud siya makagusto sa biktima tungod kay lain og batasan, way respeto sa pamilya ug abusado kaayo?
* * *
Nakasimpatiya ko nga naminaw sa sentimento sa usa sa mga residente nga apektado sa kasaba niining ongoing construction sa Horizon 101 diha sa may Mango Avenue.
Matud pa niya nga disturbo gyud kaayo panahon sa ilang pagpahuway ang pag-construct sa Horizon 101.
Nakahuna-huna siya nga ilang imbitahon pagpuyo si manlalaban Antonio Oposa sa ilang dapit aron ikiha ang tagdumala.
Ang punto mao nga si Atty. Opusa isip usa ka environmentalist makatabang kaayo kanila sama sa pagkiha niadtong mga nagpasiugda og disco didto sa lungsod sa Santa Fe nga migamit og dagko kaayong speakers nga nakamugna og noise pollution.