Pagka-way ayo niining Comelec gun ban
Overacting ra sab kaayo kining ubang mga kadagkoan sa Philippine National Police (PNP) sama kang Senior Insp. Albert Quilitorio, hepe sa Argao Police Station nga midakop ug mikiha pa gyud kang SPO2 Carlito Amarillo nga nadestino sa Boljoon Police sa kasong kalapasan sa Commission on Elections (Comelec) gun ban.
Si SPO2 Amarillo nga taga-Binlod, Argao gialarma sa merkado nga namalit og kanding kay nagloklok sa iyang service firearms nga wa mag-uniporme.
Buotan man kaha si SPO2 Amarillo, nganong gikiha pa man? Alang nako ba kining balaora gituyo kini pagmugna aron batukan ang mga abusadong pulis, mga guns-for-hire, mga tulisan, mga goons ug uban pang mga badlungon nga motisok og kagubot panahon sa eleksiyon.
Kining pagka-overacting usahay sa mga kadagkuan sa PNP makapadismaya kini sa mga tarong nilang mga sakop.
Alang nako ba, ngan nga tinugyanan sa balaod, kinahanglang tugtan gyud nga maghupot og armas duty on or off-duty ug bisag wa makauniporme kay ang krimen mahitabo bisan unsang orasa nga angayng moresponde ang kapolisan.
Salikwaot gyud kaayo kining pagkadakupa ni SPO2 Amarillo kay dunay mga tinuod nga kriminal sa Argao nga libre kaayong nakasuroy-suroy ug inutil ang Argao Police pagsulbad sa mga daghang krimen.
* * *
Delikado gyud kaayo ang grabeng kainit sa adlaw niining mga tungora kay kuyaw sa sunog.
Niadto lang Lunes sa gabii kalit lang misilaob ang labayanan sa mga basura sa among mga silingan diri sa GMA complex 7.
Tungod kay wa gyud mawala ang aso bisan giunsa pagbasa og tubig sa among kaubanang mga kawani napugos ko pagpangayog pakitabang sa Cebu City Fire Department.
Ang substation sa barangay Lahug nga gipangulohan ni SFO3 Clito Fulido maoy giparesponde ug salamat kaayo.
Sa text kagahapon ni Director Oscar Tabada sa Philippine Atmospheric, Geophysical and Astronomical Services Administration Mactan siya mipahibawo nga “No major disturbance affecting Visayas. Forecast: Cebu, cloudy, sunny, high of 32’c today till Saturday w/ less chance of rains.”
Mao usab kini ang kahimtang sa atong mga silingang probinsiya sama sa Bohol, Siquijor ug Negros Oriental.
Ang mga mag-uuma sa mga bukirang barangay dinhi sa dakbayan sa Sugbo mitug-an usab nga uga na kaayo ang yuta nga ilang pangtamnan.
Bisan sa mga balita didto sa Manila karong bag-o atong nahibaw-an nga mikibra na karon ang pundong mga tubig sa dam.
Kun mograbe kining hulaw apektado gyud kita.
Maglaum ko nga dili kini mapasagdan sa atong mga incumbent officials bisan na-busy na sa pangampanya.
* * *
Makalingaw na kaayo ang mga eksena sa atong mga politiko niining mga tungora ilabina dinhi sa dakbayan sa Sugbo tali sa “Bando Osmeña Pundok Kauswagan” ug “Team Rama.”
Kinsa man gud kanila ang wa molapas sa mga lagda?
Alang lagi nako, okay lang kun dunay mga malapas nga mga lagda sa Comelec.
Ang importante nga magpabilin kitang malinawon ug way pinatyanay sa mga politiko nga mahitabo dinhi sa Sugbo kay lumalabay ra gyud ang politika.
* * *
Daghang taga-Casay, Dalaguete ug mga molupyo sa mga sikbit nga mga lugar ang naghinam-hinam na karon sa nagkaduol nga Kite Festival karong Abril 14 (Domingo) nga anha mismo ipahigayon sa airport sa Casay nga wa mahuman.
Matag tuig na kining gihimo sa mga organizers nga naningkamot gyud nga makapangita og kuwarta alang ning maong kalihokan.
Akong nahibaw-an nga gawas nga masaksihan ang mga nindot nga mga tabanog nga moigo sa tema duna say indigay sa kaanyag.
Akong naobserbahan niadtong among pagbakasyon nga di lang mga batan-on ang naghinam-hinam sa pagpaabot lakip na usab ang mga tiguwang kay makanegosyo og ginagmay tungod kay dahang mga bisita gikan dinhi sa Siudad ug lain-laing kalungsoran.
