April trivia

Daghan kong babaye nga nailhan nga April ang ngan pero ambot kun hain na sila o diin sila paingon. Si April Ramos na man lay nahabilin. Curator karon siya sa Qube Gallery ug naminyo siya sa akong amigo nga si Richard.

Duna hinuon akoy duha ka babaye nga nailhan karon nga April Rose ang pangan. Usa niani mao ang model nga si April Rose Dueñas ug ang usa, estudyante sa development communication sa Cebu Technological University.

Akong gi-Google kun may mas lawom bang kahulogan kining April Rose gawas sa literal nga meaning nga usa kini ka rosa sa Abril.

Apan ang unang mibutho sa Google mao ang MTV host nga taga-Chicago ug ang Australian actress nga anak sa usa sa myembro sa INXS.

Kun wa ako masayop bag-o pang nauso kining ngan nga April Rose kay wa pa man akoy nadunggan nga artista, sa gawas man o sa Pilipinas nga gada ning maong pangan. Gani nagkanayon ang www.themeaningofnames.org nga sa 5,364,811 ka ngan nga nalista sa US Social Security public data walay bisag usa ka April Rose nga nalista.

Apan tungod tingali kay American leaning ang atong exposures mao nga wa kaayo kita ka sinati ning ngan nga April Rose. Apan dili baya ang America maoy mosulti og Iningles. Ug sa ubang mga nasud nga Iningles ang sinultian sikat diay kining April Rose. Sa Ireland panaglitan, daghang mga bata nga gibunyagan og April Rose gikan sa tuig nga 2010 hangtud 2012.

Dawaton ta na lang nga ang April Rose nagpasabot og usa ka rose sa April ug dili “ang pagsaka o pagtubo ni April” sama sa April rose into power. Kun ang Rose bulak unsa man ang April?

Kon magpalaban tas Wikipedia, gakikan kuno ang April sa “aperire” o pag-abre. Mao man gud kuno kini ang kasagarang buwan nga magsugod ang spring diin ang mga kahoy ug mga bulak moabri ug mabuhi pagbalik gikan sa snow.

Nagkanayon ang maong site nga diamond ang birthstone sa buwan nga Abril ug daisy ang buwak niani. Ang zodiac signs nga Taurus ug Aires ga saw ning maong buwan. Daghang mga Dyosa nga buot moangkon ning maong buwan sa kang Aphrodite sa mga Griego (nga gihimong Venus sa mga Romano) ug kang Eostre sa mga Anglo Saxon nga tribo.

Ang lain usab nga kahulogan sa April gagikan sa pulong nga Aprilis o uncertain. Sa ato pa way klaro o kasiguroan. Ug sa gay lingo pa, “aw olark.” Sama ning lindog nga imong gibasa karon way gipadulngan.

So Happy Easter (pulong kuno nga gagikan ni dyosa Eostre) na lang ninyo tanan. Ug sa tanang April ug April Rose, happy birthday ninyong tanan.