Pagka wa gyu’y ayo sa usa ka PDEA Agent nga nadakpan sa buy-bust operation didto sa lalawigan sa Bohol human namaligya ug shabu.
Naunay sa tari. Unsaon nalang kun managhan ni’ng klaseha sa mga ahente.
Matud pa sa akong mga tinubdan nga ang PDEA agent nga nadakpan sa kapolisan sa ilang buy-bust operation mao si Steven Lumiton Valles taga Baliwagan Balamban.
Daghang natinga kun nganong naabot kini sa Bohol nga unta dinhi naman siya nadestino sa Sugbu kay nag-eskuwela kini siya sa abogasiya.
Akong nahibaw-an nga kanhi siya nadestino diha sa Bohol.
Daghang natinga sa iyang mga kauban kun nganong namaligya kini ug shabu nga unta maayo man ang kahimtang niini ug ang asawa dunay daku’ng tindahan didto sa dakbayan sa Toledo.
Dili malikayan ang mga pagduda nga ang mga sinakmit nga drugas sa PDEA iyang i-recycle ug ibaligya.
Wa kahay mga kauban ni Valles ug iyang mga opisyal ang nagpaluyo sa iyang kabuang?
Kinahanglang imbestigahon siya ug tarong sa iyang mga labaw aron mokanta kun kinsa pa’y iyang mga kakonsabo kay alang kanako way luna ang mga badlungon ug mga salawayon diha sa PDEA.
Nagkatawa ron ang mga sindikato sa drugas ni’ng pagkahanggaw ni Valles. Pakaulaw lang!
* * *
Unsa man kaha ang motibo sa pagpusil patay kang Atty. Archer Baldwin Ricardo Martinez niadtong Biyernes sa buntag didto sa dakbayan sa Dumaguete?
Susama ang sirkumstansiya sa nahitabo kaniadtu kang Atty. Arbet Santa Ana Yongco dinhi sa dakbayan sa Sugbu kinsa gisulod sa iyang law office ug gibirahan.
Nagtoo ko nga may kalabutan kini sa paghupot niya sa mga kaso.
Kinahanglang tutukan sa kapolisan ang anggulo sa mga dagku’ng kaso ug sensitibo nga iyang gipanghuptan.
Gawas sa mga kaso mas maayong tan-awon sab kun duna bay naligsan ug napasakitan si Atty. Martinez.
Maglaum ko nga ang pundok sa mga abogado dinhi sa ato magmigkaw sab sa ilang mga trabaho ug mopalabang ug resolosyon nga magkondenar sa mga responsable sa pagpatay sa ilang kaubang abogado.
* * *
Abi ba nako’g nasulbad na kini’ng problema sa kakuwang ug mga personnel diha sa Office of the Building Official (OBO) sa Cebu City Hall.
Niadtong Sabado atul sa among programa’ng “Dialogue On The Air” sa DYSS Super Radyo gitug-an ni Architect Florante Catalan kinsa maoy Head sa Processing and Evaluation Division sa OBO nga tulo ra gyud ka buok ang ilang mga personnel nga mang-inspection sa mga building.
Kanus-a man kini sulbaron ni City Mayor Michael Rama? Kanang dunay laing building nga mahugno?
Unsaon man tawon sa tulo ka mga inspector sa OBO pagpahigayon ug regular inspection sa mga daghang building karon nga gipabarug?
Safety kaha ug natuman ba ang mga specifications sa plano sa maong mga buildings?
* * *
Puwerte’ng daku-a gyud diay sa investment sa GENVI Development Corporation sa ilang high-end nga Monterazas Subdivision diha sa Barangay Guadalupe nga gilangkuban ug 200 ektarya.
Mihangyo si Atty. Dindo Perez kinsa maoy General Manager sa GENVI nga di lang nako i-tribukar sa publiko.
Iyang gipadayag nga nakasabot sila sa gihimong lakang ni Mayor Rama sa pagpahunong sa ilang development sa lugar apan iyang giklaro “improper and unnecessary” ang gi-isyu nga Cease and Desist Order kay sa wa pa ang CDO mipasuspenso dayon sila sa mga trabaho dihang dunay mga biktima sa baha.
Matud niya nga di lang sila ang basolon sa pagbaha niadtong miaging mga adlaw kay dunay laing developer ang nagtikad sa ilang sikbit.
Usa sa mga butang nga gihangyo ni Atty. Perez nga unta tabangan sila sa komunidad ug sa taga Grand Legacy Homeowners Association nga paagi-on ang tubig gikan sa ilang gi-develop kay di kaya nila’ng sulbaron kun sila lang ug sa taga Cebu City Hall.
Magpasalamat lang sab diay ko sa uban namo’ng mga bisita nga mitunga sa among programa nga si sila si Eddie Llamedo tigpamaba sa DENR-7 kinsa mipasalig nga way sinkholes dinhi sa dakbayan sa Sugbu apan mibutyag nga duna didto sa amo sa Dalaguete ug sa tupad nga lungsud nga mao ang Alcoy.
Magpasalamat sab ko nila ni Niceforo Iroy Planning Officer Land Use and Zoning Division sa City Planning and Development Office sa City Hall, Engr. Joel Reston sa DEPW ug kang Architect Edwin San Nicolas past president sa Philippine Institute of Architects.