Insakto kaayo ang mga pahimangno ni Fr. Elegio Almazol Jr. sa Saint Therese Parish Church Lahug sa iyang wali sa “Palm Sunday” nga kining pag-obserbar sa Semana Santa dili panahon sa ting-bakasyon.
Ang labing importante mao ang paglimpiyo sa atong kaugalingon ug nga mamalandong kita aron paglig-on sa atong relasyon sa Diyos.
Matud niya nga gawas nga dili ting-bakasyon, dili sab kini panahon sa laag-laag, igat-igat ug kiat-kiat.
Mipahinumdom siya sa nahitabo sa sikat nga batan-ong artista nga si Rico Yan nga wa lang damha kalit kaayo ang iyang kamatayon atol sa Biyernes Santo didto sa Dos Palmas Palawan.
Akong pun-an nga dili sab kini panahon sa mga tigpakaaron ignon. Dili sab tingsugal sama sa tigbakay, derby ug uban pa. Di sab kini panahon sa paghubog-hubog kay makawa sa focus sa atong pagpamalandong.
* * *
Atong alalayan ang kapulisan sa ilang mga pahimangno ning panahon sa Semana Santa aron malikayan ang mga krimen ug aron way palpak sa atong mga lakaw.
Tugoti nga akong kopyahon ang giapudapod nga mga pahimangno sa kapulisan paglikay nga mabiktima sa kawat o lungkab sa atong mga panimay:
1. Dili biyaan ang atong kabalayan nga walay mahibilin nga tawo nga sakop sa pamilya;
2. Kun manglakaw gyud ang tanang miyembro sa pamilya, siguraduon nga lig-on ang mga sirado sa mga pultahan ug mga bintana aron dili dali masudlan sa mga kawatan;
3. Ila-ilahon ang atong mga silingan o mga nanagpuyo palibot sa atong tagsa-tagsa ka panimalay kay sila ang makatabang pagbantay sa atong mga kabtangan;
4. Siguraduhon nga walay mga “home appliances” nga naka “plugged-in” sa electrical outlet aron paglikay sa sunog;
5. Sa panahon sa kagabhion, atong gi-rekomendar nga pasigaon ang mga suga palibot sa atong panimalay;
6. Dili modawat og bisita nga dili nimo sinati o kaila aron dili mabiktima sa pagpangilad.
Samtang sa mga paagi aron luwas diha sa kadalanan o gawas sa panimay kun mosaksi sa mga kalihokan sa Semana Santa o uban pang mga kalihokan sa Simbahan.
1. Dili magsul-ob og mga mahalon nga mga alahas aron dili kita mabiktima sa mga mangungoot ug snatchers;
2. Dili magdala og dagkung kantidad nga kwarta “cash money”;
3. Dili magdala ug mga mahait nga mga butang o hinagiban;
4. Likayan ang pagdala ug mga mahalon nga mga gamit, sama sa cellphones, i-Pods, cameras ug mga laptop;
5. Sa dili pa mobiyahe og layo nga mga lugar gamit sa atong mga “private cars”, ayaw kalimot sa paghiling sa Battery, Lights, Oil, Water, Brake, Air, Gasoline, Engine, Tire and Self kon (BLOW BAGETS);
6. Dili magdala og mga gagmayng bata sa mga lugar nga magsugwak ang mga tawo;
7. Likayan ang paglakaw sa mga mangitngit nga lugar nga mag-inusara.
Samtang ubang mga butang nga angayng buhaton mao kining mosunod:
1. Isumbong o i-report gilayon sa labing duol nga pulis nga inyong makita diha sa kadalanan o sa labing duol nga kwerpo sa kapulisan alang sa hinanaling pulis aksiyon kun dunay problema;
2. Sayron daan ang mga contact numbers sa atong kapulisan aron dunay kasumbongan kon dunay moabot nga problema;
3. Sayron daan ang mga kalsada nga apektado sa temporaryong pagsira alang sa kalihokan sa pagsaulog sa tinuig nga pagsaulog sa Semana Santa dinhi sa Sugbo aron dili makasinati sa kahuot sa trapiko;
4. Magtaod ug “name-tag” sa mga gagmayng bata nga dad-on atol niining mga panahuna;
5. Maminaw sa mga pahibalo sa mga otoridad ug sa mga opisyales sa mga nagkalain-laing mga simbahan alang sa pagpatuman sa kahusay, kahapsay, ug kalinaw;
6. Mosanong o motuman sa mga lagda nga ipatuman sa atong mga otoridad diha sa kadalanan nga apektado sa pagpahigayon sa prosesyon o Via Crucis;
7. Ilabay ang mga basura sa saktong labayanan aron pagmentinar sa kalimpiyo;
8. Tungod sa kainit sa panahon kinahanglang magdala gyud og tubig nga mainom pagproteher sa lawas.
Happy Easter!