Semana sa wa pay Semana Santa
Niadtong semana sa wa pay Semana Santa wa koy masuwat mao nga nan-aw na lang ako sa mga headline sa mga pamantalaan kun duna ba akoy maangkat ug mabahin ning maong lindog.
Niadtong semana sa wa pay Semana Santa nagdungan og pangadye ang duha ka Santo Papa. Nagsawo silag ludhanan. Matud pa sa taho nagdungan usab silag kaon sa usa ka lamesa sa wa pa sila mangadye. Suma sa mga historian, una kining higayon sulod sa 600 ka tuig nga dunay duha ka Santo Papa ang simbahan.
Sa akong mga nabasahan, theoretical ang naunang Papa nga si Benedict samtang practical kining bag-o nga si Francis. Tungod niini misulod sa akong hunahuna ang French linguistic theory sa “langue and parole.” Ang “langue” o language sa Iningles pa, usa ka abstract ideal o sakto nga pamaagi sa pagsulti, sa paglitok o paggamit sa mga pulong. Matud pas mga mituo niini, kun walay “langue” puros inamaw ang mogawas sa baba kay way kahulogan ang atong madungog gikan niini. Ang “parole” o speech o pagsulti, maoy practical nga application sa “langue.” Bisan tuod og ang “langue” mao gapadagan sa “parole” ang “parole” maoy mopakita kon unsay padagan sa “langue.”
Mas bug-at ang concern ni Bendict sa mga doktrina og balaod sa simbahan apan mas bintaha sa application niani si Francis nga suod sa mga squatter sa Argentina. Two papas are better than one? Tingali. Duha na gyud ni kabuok sila unya gadungan pa gyud og ampo, syarog di nila ni masulbad ang corruption ug mga sex scandal ning Simbahan.
Niadtong semana sa wa pay Semana Santa diin duha ka Santo Papa gadungag ampo didto sa Roma duha ka manag-agaw nga pulis nga nanag-inom sa Gauasalupe ning dakbayan nagpinusilay. Nangamatay ang duha.
Ning semana sa wa pay Semana Santa diriyot mapriso ang atong suspended governor kay giisyuhan man kini og warrant of arrest sa korte nga wa niya sipota kay na-busy siya sa pangampanya. Apan maayo na lang kay mitunga siya sa arraignment ug mi-plead og “not guilty” sa iyang kaso kabahin sa pagpalit sa probinsya sa giingong Balili property. Ug tungod sa iyang pagsipot gitangtang na ang iyang warrant of arrest. Kuyaw og nahimo pa unta tong the imprisoned-suspended governor ang iyang titulo.
Ning semana sa wa pay Semana Santa natungod ang 10th anniversay sa gubat sa Iraq diin matud pa sa usa ka abogado sa England nga usa ka pagsupak sa International law ug nga tungod niini angay kasuhan si George W. Bush (US president niadto) ug si Tony Blair (UK prime minister niadto) og war crimes. Wala kunoy balaod sa UN nga molihuk ang ubang nasud alang pagtangtang sa usa ka liderato bisag unsa pa kini ka ngil-ad.
Ning semana sa wa pay Semana Santa nahulog usab ang 50th anniversary sa “Please Please Me” album sa Beatles. Matud pa sa usa ka writer sa Rolling Stone ang kanta mismo nga “Please Please Me” morag usa ka “plea for orgasmic rediprocation.”
Sa ato pa—ikaw ray gilamian, palamii sad ko be. Please please me.
