Unsa may nakaon sa duha ka pulis?
Pagkasayang sa kinabuhi sa duha ka mga pulis nga nag-unay ug pinusilay niadtong Sabado sa sayong gabii nga misangpot sa ilang kamatayon.
Sa pagsuwat ning maong lindog wa pay klarong detalye kay nagmakuli pa sa pagtug-an ang mga kabanay sa tinuod nga hinungdan sa pagpinusilay nila ni PO1 Anthony Gonsalez ug PO1 Rey Gabutan.
Matud sa istorya nga mag-agaw ra ang duha unya nanag-inom unya nagkainitay human nga ilang nahisgotan ang ilang mga kaagi sa kabatan-on.
Dunay mga pagtuo nga nag-ilog og uyab ang duha nga mag-fourth degree cousin.
Pero kun unsa man ang ilang giawayan makaingon ko nga pagkasayang nilang duha nga nagpabiktima sa ilimnong makahubog.
Pagkadako pa unta nilag mahimo sa komunidad kun wa magpadala sa tagay.
Didto pa lang gidala ilang kaisog sa Sabah, Malaysia mapahimoslan pa sila sa kawsa sa uban natong mga igsoon.
* * *
Human sa arraignment sa duha ka mga kasong anti-graft ug sa kasong technical malversation of public funds, mapahamtangan na sab ug laing suspension order si suspended governor Gwendolyn Garcia sa iyang kasong anti-graft subay sa kontrobersiyal nga pagpalit sa Balili property.
Matud pa sa mga batid sa legalidad, si Gwen ug iyang mga kaubang opisyal sa Kapitolyo ipaubos sa Sandiganbayan sa gitawag og suspension pendenti lite sulod sa 90 ka adlaw sa matag count sa anti-graft and corrupt practices act.
Segun pa sa mga abogado nga kining suspension pendenti lite dili kapugngan sa Korte Suprema kay nalatid kini sa provision sa RA 3019 kun Anti-Graft and Corrupt Practices Act nga pahamtangan gyud niini ang bisan kinsang akusado nga government official human sa iyang arraignment sa anti-graft.
Suwerte si Gwen nga gipaminaw ang iyang esplikasyon sa unang wa niya pagtunga niadtong Huwebes ni Associate Justice Teresita Diaz-Baldos nga unang mi-isyu og arrest warrant ug mipa-confiscate sa piyansa nga balig P90,000.
Miesplikar si Gwen nga wa siyay intensiyon pag-snub sa korte apan gikinahanglan niya nga motunga sa usa ka speaking engagement sa graduation ceremony og blessing sa congressional headquarters sa Argao, Cebu.
Karong Mayo 29 ug 30 gikatakda ang preliminary conference samtang ang pre-trial himoon karong Hunyo 17 at 18.
Buot ipasabot nga human sa eleksiyon magsagubang na siya sa full-blown trial.
* * *
Daku kog pagtuo nga politika na sab ang hinungdan sa pagpusil-patay sa Municipal Councilor sa Talibon, Bohol niadtong Sabado sa gabii nga si konsehal Gerson Dulang.
Si Konsehal Dulang giingong didto ra gipusil-patay sa gawas sa iyang gasoline station sa duha ka mga responsable nga nag-angkasay ug motor.
In fairness hinuon, kuwartahan gyud si Konsehal Dulang kay matud pa daghan kini ug patigayon.
Apan normal sa kapolisan nga subayon gyud ang tanang anggulo sa motibo sa krimen sa pagpatay sa konsehal.
* * *
Dunay mga residente sa barangay Apas ug barangay Lahug ang mireklamo karon sa pagka-estrikto sa taga Central Command (Centcom) kay matud pa dili na sab magpasulod sa mga sakyanan nga way sticker.
Unsa man gyud ka importante ang sticker sa mga sakyanan nga giisyu sa (Centcom) kun seguridad maoy hisgutan?
Importante nga dunay sticker ang mga sakyanan aron makakuwarta ang mga opisyales sa Centcom sa sticker?
Wa pa sila matagbaw sa ilang pangwarta sa golf driving range ug ubang mga facilities sulod sa kampo?
Kun seguridad ang ilang gisubay, unsay garantiya nga luwas na sa piligro ang sakyanan nga may sticker unya gisakyan diay to ug suicide bomber?
Simple ra man unta kaayo ang trabaho sa mga MP diha sa kampo nga mao ang paghiling ug pagsiksik og tarong sa mga sakyanan nga mosulod bisag way sticker.
* * *
Congratulations sa akong mga anak nga sila si Karl Anthony ug Karen kay pulos gihapon mga honor sa grade IV ug grade III diha sa Lahug Christian School atul sa ilang “Recognition Day” niadtong Huwebes sa may Ecotech Center sa Sudlon Lahug.
Salamat nga miresulta ang ilang kinaugalingong paningkamot, kahago ug sakripisyo sa tanang subjects.
Si Ma’am Carmelita Badayos Miguel, school principal mipaabot sa iyang nindot kaayo nga mensahe alang sa tanang tinun-an.
Matud niya nga way kapuslanan ang kamaayong laki sa usa ka tinun-an sa tanang mga subjects kun dili ubanan ang pagkat-on sa mga pulong sa Diyos nga maoy maghulma sa inner character sa tawo.
