Gigi Sanchez midaug-daug sa igsoon?

Kagahapon sa buntag nanawag sa  among sibyaanan sa dySS Super Radyo  ang usa ka nagpailang Greco Sanchez nga kuno anak siya kang late vice governor Gregorio “Greg” Sanchez.

Ang nakatubag mao si Jasmine Vailoces among news writer. Si Greco nagkanayon nga kuno ipadakop siya sa iyang igsoon nga si Gricelda “Gigi” Sanchez kinsa milansar pagka-board member sa 3rd district.

Among gitawgan  si Gigi Sanchez makatulo ka higayon aron makatubag apan wa gyud  niya  tubaga  ang among mga tawag.

Nagsambingay  si Greco  nga ang hinungdan  nga siya  ipaaresto tungod  sa  kabilin sa ilang amahan.

Pipila  na ka mga adlaw  ang  milabay  dunay mga text  nga akong  nadawat  nga dunay mga pulis sa panimay  sa  mitaliwan  nga vice governor.

In fairness ni Gigi siya maoy  mahug  nga  tarong sa ilang managsoon kay public knowledge na man sab nga si Greco maoy tunok ug maoy gipas-an  nga krus sa pamilya kay  gibalik-balik kini pagpasulod  sa drug  rehabilitation center.

Angayan lang sab siguro nga isip  maguwang panalipdan gyud ang mga kabtangan.

Pero  ambot lang kun wa ba gamita si Greco og mga politiko  aron dauton si Gigi sa iyang paglansar  karon?

Akong  nahibaw-an  nga nabahinan  na si Greco ug dakung  salapi apan nangayo kini karon og tunga  sa milyon ka pesos.

Tulo ni  sila  ka magsoon. Ang usa nga si Girlie atua karon sa Australia.

Mao ni  ang  nakapait basta dunay dakung  katigayunan nga bahinon kay paingon gyud sa gubot kun di magkasabot  og tarong ilabina nga dunay igsoon nga nagumon sa drugas.

Alang  nako mas maayo nga ipaubos sa complete drug rehabilitation si Greco aron makabaton siya og insaktong panghuna-huna ug makabarug sa kaugalingong  paningkamot.

* * *

Gubot pas lukot kining mga nagpuyo sa luyo sa among complex sa GMA-7 nga lote  nga iya sa  Kapitolyo nga gitawag og military reservation.

Maayo ra ba unta kun nagkahiusa ni sila. Katag kaayo kay lain-lain ang  homeowner associations ug managlahi ang interest.

Sa makauna lang og akusar bahin sa pagpamaligya  ug luna.

Insakto gyud ning panultihon diha  nga kun sakto ka sa isog, di gyud ka moatras.

Nakuyawan lang ko nga moabot ang panahon  nga mobanaw ang dugo  diha kay pulos  isog sa lote nga dili ilaha.

Kagahapon lang pagbasa  ni Sir Bobby Nalzaro sa usa ka suwat reklamo nga gipaabot sa Central Command commander gikan sa pipila ka mga nagpuyo batok sa usa ka asosasyon dali kaayong miabot sa among sibyaanan ang mga subject sa reklamo  ug nanghimakak  sa mga alegasyon.

Natinga lang ko  niining mga tawhana nga sa  sinugdanan grabeka suod pero karon ga-away-away  na.

* * *

Usa ka dakung kasub-anan sa University of the Philippines (UP) Manila campus ug ilabina sa kabanay niadtong 16 anyos nga estudyante nga si Kristel Tejada nga naghikog human  nga wa tugti nga maka-enroll human nga dunay bayranan nga 10 mil pesos.

In fairness sa management sa UP Manila campus nahilam-os na intawon sa mga pagsaway sa publiko tungod sa nahitabo.

Alang nako kining paghikog ni Kristel maoy insaktong panahon nga i-revisit sa mga tagdumala ang ilang mga “policy” nga anti-student ug anti-poor ilabina ang isyu sa pag- commercialize sa edukasyon sa UP nga unta subsidized man sa gobyerno.

Dakung butang kini nga dili ibaliwa ilabina nga nanggawas ang estorya karon nga paingon na sa punto nga ang  mga  kuwartahan na lang unya ang makaeskuwela ug UP.

* * *

Salamat nga hugtanon ang baruganan sa Malacañang pinaagi kang Presidente Noynoy Aquino nga di gyud mohatag ug presidential pardon alang kang Francisco Juan “Paco” Osmeña Larrañaga.

Si Paco nga pag-umangkon ni Kongresista Tommy Osmeña usa sa mga gitumbok kaniadto sa state witness nga  si Davidson Valiente Rusia alyas “Tisoy Tagalog” sa pagdagit ug pagpatay sa managsoong Marijoy ug Jacqueline Chiong.

Maglaum ko nga barugan kini sa Malacañang taliwa nga nakig-alyado ang mga Osmeña  sa partido sa Presidente.

With all due respect sa kampo ni Paco, kadtong iyang gipagawas nga film documentary nga nakaangkon og mga pasidungog nga “Give Up Tommorow” dili kadto evidentiary.

Sa laktod way labot sa court proceedings ang maong salida kay gikonbikto siya ni late Regional Trial Court Judge Martin Ocampo human  nga dili katuhoan ang iyang depensa nga “alibi and general denial” sa kaso.