Matud pas usa ka manunuwat sa Yahoo! Sports, maglisud nag imagine ang mga batan-ong basketball fans sa National Basketball Association (NBA) nga walay Kobe Bryant. Kapin na man gud sa 15 ka tuig nga gaduwa si Kobe isip usa ka Los Angeles Laker ning maong liga.
Sa ingon nga bahin daw wala nay mga batan-on karon nga maka-imagine ni Robert Jaworski nga moduwa sa Philippine Basketball Association. For a while Jaworski was Philippine Basketball. Ug tungod niini nahimo gani siyang senador. Apan kapin na sa 15 ka tuig nga wa na kakita ang mga Pilipino nga mi-dribble og mi-bounce pass si Jawo sa iyang Ginebra San Miguel team.
Si Kobe man gud ang buhing link gikan sa panahon ni Michael Jordan paingon sa panahon karon ni Lebron James. Daghan na nga Jordan pretenders nga na naguna ug nangaangol. Diha si Penny Hardaway, si Tracy McGrady, Vince Carter ug Grant Hill. Ug tungod kay si Kobe ray nilahutay nahimo siyang accepted clone ni Jordan. Gani duna may video sa YouTube nga mipakita kun giunsa pag-Xerox ni Kobe ang mga lihok ni Jordan.
Ug niining bahina mobutho na sab ang pangutana kun kinsay maayo nilang duha. Kun sa abilidad murag tabla ra. Ang lihok rag pamaagi sa duwa maoy nakalahi nila. Si Jordan morag assassin –cool, kiniwintang lihok, walay usik inig bira. Si Kobe morag matador: may dalang drama ug sayaw ang iyang pag-ihaw sa toro. Daw pribado ang kinabuhi ni Jordan apan open book ang kang Kobe.
Sa pilosopiya sa duwa–bugtong tinguha ni Jordan nga mo-shoot. Samtang si Kobe ang pagkontrol sa bola maoy tinguha. Tungod niini mas lethal si Jordan pero kanunay nga show time ang mga duwa ni Kobe, mas drama, mas kulbahinam.
Si Jaworski sa iyang bahin naila sa “hard foul” ug “last 2 minutes.” Alang kaniya kun mo-foul ka imo na lang kusgon para sigurong dili maka-shoot sa bola ang imong gi-foul. Ang last two minutes sa mga team ni Jawo mo-signal sa full court press ug mga American football pitch nga passing para pagtarantar sa kontra. Wala mo-retire dayon si Jaworski dihang mihinay na siya. Iyang gihimo nga playing coach ang iyang kaugalingon. Mosulod na lang siya basta last two minutes para mohapos sa bola o moitsag 3-pointers, diin nagpabilin siyang deadly.
Niadtong napiang si Kobe miduwa lang siyag pipila ka minutos batok sa Indiana Pacers ug human milingkod og midireher sa iyang mga kauban sa korte kun unsay angay nilang buhaton. Daw nakahinumdom ako ni Jaworski ning gihimo ni Kobe. Ambot kun allowed ba kaha sa NBA ang playing coach. Kay kun pwede kini mahimong smooth ang transition ni Kobe. Si Jordan daw napalpak man isip team owner.