Abi ba nakog tarong ni si Police Regional Office in Central Visayas Chief, Gen/ Marcelo Garbo.
Unsa? Magpaabot pa si General Garbo og affidavit gikan kang Anthony Obiña Ong batok kang PO3 Robert Junn Cuyos nga sakop sa Mobile Patrol Group sa Cebu City Police Office nga giakusahan ni Anthony nga miabuso sa katungdanan ug mi-plant og ebidensiya nga mga drug paraphernalias?
Dili pa ba igo ang seryosong alegasyon ni Anthony Ong, tig-repair og cellular phone diha sa downtown area nga ang pagbutang-butang og kaso ni PO3 Cuyos ug pagdakop kaniya usa lang ka panimawos sa pulis human nawagtang ang memory card sa cellphone nga gipaayo sa pulis ni Ong?
Kun ingon ani ang actuation ni General Garbo nga magpaabot og formal affidavit gikan kang Anthony nga daan nang nahulga ug nahadlok ni PO3 Cuyos human gisantako ug gidakop sa pulis, way kapaingnan ang direksiyonang liderato ni Garbo ug kini paingon sa iyang pagkainutil.
Nakasabot ko ni Anthony nga nahadlok kay kini ray panginabuhi nga iyang nakat-onan alang sa pagsuporta sa iyang pamilya ug dayag kaayo siya sa iyang puwesto nga puwedeng ipapatay bisan unsang orasa.
Akoy naluoy sa biktima kay gikulata pa, giparok sa semento, unya wa pa bayri sa serbisyo unya gitanggong pa og pipila ka mga adlaw unya gitumotumoan pa og kiha sa piskaliya.
Kun wa pa mosukit-sukit ni Cebu Asst. City Prosecutor Mary-Ann Castro dili mabuhian niadtong miaging semana si Anthony ni City Prosecutor Nicolas Sellon human nasuta nga improper ang pagkaaresto ug nahimong kuwestiyonable ang mga papeles nga gisuporta sa kasong kalapasan sa Section 12 Article II sa R.A. 9165.
Kun inutil si General Garbo pagpahigayon og motu propio investigation batok kang PO3 Cuyos nganong di man maka-initiate niini ang ubang mga ahensiya sa gobyerno nga dunay disciplinary power batok sa tanang mga abusado ug madaugdaugon nga taga gobyerno apil na si Garbo?
Asa man ang taga Commission on Human Rights? National Police Commission? Nagpakabana ba sab ang taga-People’s Law Enforcement Board? Ang Visayas Ombudsman wa magtugtog sa pansitan? Unsa may gamit sa opisina nga gihinganlan og internal affairs service sa kapolisan?
Kanyahay ra nga hangtud karon wa pa mobalik sa sabakan sa gobyerno ang mga nagrebelde kay anaa gihapon kining mga abusado sa gobyerno.
Mao ni ang “Matuwid na Daan” nga gipanghambug ni Presidente Benigno Aquino III sa publiko?
* * *
Shabu ug sugal maoy mga bug-at nga motibo ang gisubay karon sa mga otoridad sa pag-ambush kang Edgar Ho Lim usa ka negosyante niadtong Huwebes sa hapon sa may South Road Properties nga gituhoang pinansier sa illegal nga sugal.
Apan mireklamo si manlalaban Noel Archival sa gihimong pagsakmit sa kapulisan sa gituhoang duha ka paketeng shabu, P35,000, ATM cards ug uban pa sa sulod sa awto nga BMW nga gimaniho sa biktima.
In fairness ni Archival, duna siyay igong rason nga mokuwestiyon ngadtosa kapulisan ilabina nga biktima ang iyang kliyente sa pagpang-ambush unya mao pay nahimong dautan.
Ang isyu dinhi kun planted ba. Angay sab kining kuwestiyonon sa abogado kay medyo alkanse gyud si Lim sa sitwasyon ngan nga natusaktusak sa mga bala ang iyang BMW nga iyang gibiyaan sa dan ug nagpahatud siya sa iyang asawa sa ospital gamit na ang laing sakyanan.
Posible nga planted ang mga kontrabando aron dauton og samot ang pagkatawo ni Lim human nga nakapiyansa sa lain niyang mga kaso.
* * *
Mas maayo gyud nga adtoon nila ni Cebu Schools Division Superintendent Dr. Arden Monisit ug imbestigahon ang Naga National High School kay matud pa ang 73 ka mga graduating students paamoton ug dul-an P3,000 matag usa.
Usa ka ginikanan ang mibutyag sa isyu niadtong Sabado atul sa among programang “Dialogue on the Air” sa dySS nga nagtuki bahin sa Department of Education (DepEd) Order no. 9 nga di magtugot og contribution alang sa graduation rites.
Matud pa ang year book sa iyang anak mibalor og tag P1,775.00 unya gawas pa dunay laing giamotan nga libo kapin alang sa recollection, bayad sa toga, sa venue, sound system, sa Misa, sa choir, decoration, medal ug uban pa.
Sa maong gidak-on nakugang ang akong mga bisita nga mga opisyal sa DepEd nga sila Miss Ida Cabantan Chief Administrative Office sa DepEd Region-7, Mr. Danilo Gudelosao OIC Assistant School Division Superintendent Cebu City, Robert Gallardo sa Mandaue Division, Dr. Rosalie Pasaol School Superintendent sa Danao, Roger Cabañero sa Talisay Division, Dr. Eduardo Ompad sa Lapu-lapu Division, Gregorio Cyrus Elijorde sa Carcar Division, Dr. Nimfa Bongo sa Bogo Division ug sila si Harvy Inoc, Nelson Tantano ug ubang mga opsiyal sa PTCA dinhi sa dakbayan sa Sugbo.
Pero in fairness, ang nanawag nga ginikanan nga mireklamo mitug-an nga nasabutan kini sa kadaghanan.
Apan unsaon man kini karon? Pugson gyud pagpabayad ang mga ginikanan nga dili makakaya sa gidak-on nga amotan? Wa ba kini makalapas sa DepEd order no. 9 series of 2013?
Maayo tingali nga mohimo sab og aksiyon niini si DepEd in Central Visayas Director Carmelita Dulangon.
Wa man koy supak niining contribution or donation basta kaya lang sab sa bulsa nga di magbagulbol ang ubang mga ginikanan.