Miabuso ang pulis?

Natinga na lang  ko niadtong Lunes sa hapon kay dunay pulis nga magpapirma kanako og dokumento aron isuporta sa ilang kasong ipasaka sa piskaliya batok sa ilang dinakpan nga giingong naghupot og mga drug paraphernalia.

Siya mao si  PO3 Robert Junn Bestil Cuyos nga  nadestino sa Mobile Patrol Group. Kuyog kaniya niadtong higayona ang usa ka pulis ug ang  iyang dinakpan  nga si Anthony Obina Ong.

Dali nakong gibalibaran si PO3 Cuyos sa iyang papirmahan nga  dokumento nga “Certificate of Inventory” isip media representative sa  mga butang nga nakuha sa dinakpan nga: (1) disposable lighter; (2) hand rolled tissue paper wicks ug (2) aluminum tin foils tungod kay with all due respect dili tawon ko tanga nga mopirma na lang bisag wa ko makasaksi sa  iyang pagdakop kang Ong.

Ang iyang  punto nga papirmahon ko kay gi-require siya ni  inquest fiscal Mary-an Castro nga ipakompleto ang mga papeles.

Mao nga dihang wa gyud ko mipirma mihangyo siya makadaghan kanako nga magpatabang pag-contact sa akong mga kaubanan sa media aron  mao na lay mopirma.

Mao nga ako siyang  gipasa sa among kauban  nga si Super Guam Logronio nga  maoy  among police beat reporter sa dySS nga posibleng makatabang kaniya.

Sa affidavit  ni PO3 Cuyos siya nagkanayon nga samtang nagpahigayon siya og roving patrol diha sa may Osmeña Boulevard barangay Kalubihan niadtong  Domingo sa mga alas-8:30 sa gabii iyang nasigpatan  ang dinakpan nga kadudahan kaayo og mga lihok.

Mao nga mikanaug  siya sa ilang Mobile Patrol car 011 ug dihang iyang gipadul-an  iyang nakita nga naghupot na sa mga kagamitan sa drugas si Ong.

Hinungdan nga  iyang gidakop ug matud pa iyang gipahibawo sa sala nga nahimo ug gipasabot sa iyang mga katungod isip usa ka dinakpan.

Apan in fairness sa dinakpan nga akong naistorya dali kaayong nakahilak kay matud pa gibutang-butangan lang siya og  kaso ni PO3 Cuyos.

Gibutyag  sa dinakpan nga ang tinuod, si  PO3  Cuyos nagpaayo kini kaniya og cellular phone. Apan gidimalas siya  kay nawala ang memory card.

Taliwa nga mitanyag siya  nga ilisan  og bag-ong memory card apan wa  mosugot ang pulis hangtud nga gidakop siya.

Kagahapon sa udto  nga akong  gipa-follow-up kining  maong  kasong kalapasan sa Section 12, Article II of RA 9165 batok sa dinakpan naka-pending pa alang sa  inquest proceeding  ni piskal Mary Castro.

Alang nako  kun tinuod  man nga  nakahupot  ang dinakpan sa maong mga butang angay siyang itaral.

Apan kun tinuod ang version sa dinakpan nga planted ang mga ebidensiya ni Cuyos angayng taktakon ning maong pulis.

Maglaum ko  nga imbestigahon kini ni  Police Regional Office in Central Visayas Chief  General Marcelo Garbo kay seryoso kining mga alegasyon batok kang pulis Cuyos ug klaro kining makadaut sa Philippine National Police organization.

* * *

Dili na mananggot si Tatay sa lubi. Inspiring kaayo ang nahitabo karon sa Philippine Military Academy o PMA Class 2013 kay ang nag-top 1 sa klase anak lang ug mananggiti sa  Davao Del Sur.

Sayod na gyud ta kun unsa ka lisud sudlan ang PMA ug ultimong mga anak og general ug ubang dagkung opisyal sa nasud maglisud diha pagsulod.

Ang  nakaangkon sa top 1 mao si First Class Jestoni Aman Lanaja, 22 anyos, ubos sa Pudhang-Kalis Class of 2013 o “Puso’t Dangal ng Kawal ng Lahing Nagkakaisa” nga mogradwar kining maong batch karong Marso 17 nga adlawng Domingo.

Si Cadet First Class Lanaja nga makadawat og presidential saber award lumad nga taga-Purok 1, Sacob, Hagobor, Davao del Sur.

Matud niya nga ang iyang inahan way trabaho samtang tulo sila ka magsoon.

Tungod sa kalisud wa silay kaugalingong yuta unya  iyang  manghud nga nagsunod kaniya igo rang nakahuman og high school samtang ilang  kinamanghuran usa intawon ka amang ug bungol.

Matud niya nga ang pagkamanananggot sa iyang amahan mao ra gyuy ilang gisaligan sa panginabuhi.

Ang pangangkon ni Lanaja sa ilang kapobre nagpakita kun unsa siya ka matinud-anon ug ang pagkamaubsanon.

Ang ikaduha ni Lanaja sa puwesto mao si Mariyam Ann Dinamling Balais, 22, nga taga-Beckel, La Trinidad, Benguet; ikatulo si Prolen Atchico Bolacua nga taga-Valenzuela City; ikaupat si Jessie Nestor Saludo nga taga Sunshine Homes GMA Cavite; ika-lima si Jocelyn Advincola nga taga Asigan, Tagaytay City.

Ikaunom si Leode Jhon Ruis Tulang nga taga-Agusan Del Sur; Ikapito si Mark Ferdinand Villamin nga taga-Rosario Batangas; Ikawalo si Vanesa Pascual Factor nga taga Antipolo City; Ikasiyam si Jed Cabantura Dumocloy nga taga-Gattaran, Cagayan unya ang ikanapulo mao si Myla Maniscan nga taga South Cotabato.

Sa 124 ka mga kadete, 105 niini mga lalaki samtang 19 ka mga babaye.

Sa maong gidaghanon 67 ang idestino sa Philippine Army, 24 sa Air Force samtang 33 sa Philippine Navy.