Nabalaka ko sa seguridad ning panahona ni Cebu Asst. City Prosecutor Aida Sanchez kay dunay kihante nga naglagot kaniya human iyang gi-dismiss ang kaso nga gipasaka.
Niadtong Biyernes sa hapon gikonprontasi si piskal Sanchez sa kihante.
Apan wa makasabot ang kihante sa punto sa piskal nga di siya puwedeng makapadayon sa korte sa iyang gitinguha nga kasong estafa batok sa taga-bangko. Ang bugtong kaso nga iyang ma-pursue mao ang kasong sibil.
Ang kihante nga nasuko kang piskal Sanchez kalit na lang nga mibiya ug mibilin og mga pulong nga nagpasabot nga siya nakasabot na kun nganong nakahimo og krimen ang naghikog nga Canadian national nga si John Pope sulod sa Palace of Justice batok sa doctor, abogado ug kang piskal Matet Casiño.
Si Cebu City Prosecutor Nicolas Sellon mimando na kang piskal Sanchez nga magpa-blotter sa kapolisan batok sa kontraktor.
Alang nako di lang kutob si Sellon sa blotter. Kinahanglan na gyud nga mopagawas si Sellon og direktiba nga di mo-atubang ang mga piskal sa mga tawo nga agrabiyado sa resulta sa kaso ug bisan niadtong mag-follow-up sa status sa kaso.
Gawas pa kinahanglan na gyud nga mang-hire si Regional State Prosecutor Fernando Gubalane og mga private blue guards aron maoy mohatag og seguridad sa iyang mga piskal ug mga kawani.
Niadtong Biyernes sa hapon, nakadalikyat ko sa haya ni Regional Trial Court Executive Judge Fortunato De Gracia sa St. Peter’s.
Iyang hamiling kapikas nga si Ma’am Nene De Gracia mitug-an kanako nga puwerte gyung panghupaw ni Judge De Gracia pagkadungog sa balita nga milampos si John Pope pagpasulod sa iyang armas ug nakahimo og krimen sulod sa korte.
Sama sa gipasabot ni Judge De Gracia nga wa gyuy kumo nga mag-inistrikto sa seguridad kay sa magmika nga marisgo ang kinabuhi sa tanan.
* * *
Mas makulbaan ug mas maghinam-hinam kita ugma pag-convene sa College of Cardinals sa ilang conclave kon pagpili og sunod nga Santo Papa tungod sa makabungog nga suporta ngadto kang Manila Archbishop Luis Antonio Cardinal Tagle nga mohulip kang Pope Benedict XVI.
Pero akong sublion nga di lang kita magpasulabi sa atong pagtuo nga maangkon ni Cardinal Tagle kay tingalig malahi na ang atong pagtan-aw sa Simbahan.
Atong iampo ang tanang mga cardinal nga makaapil sa conclave nga giyahan ug lamdagan sa Espiritu Santo aron makapili sila sa ilang kauban nga maoy makadala natong 1.2 bilyones ka Romano Katoliko.
Kun makuha gyud ni Cardinal Tagle mas labing maayo aron motutok ang tibuok kalibutan natong mga Pinoy kun unsa kita ka relihiyoso.
Labing tinuod makapanghambug gyud kita kay kita ray nasud nga bisan unsa ka pobre nagtimaan ug mang-celebrate gyud sa fiesta sa Santos nga patron matag chapel.
Kita say taas kaayo ug lahotay sa mga religious activities ikomparar sa ubang kanasuran ilabina sa Pasko, kapistahan ni Señor Santo Nino ug sa Black Nazarene.
Kining suporta nga nakuha ni Tagle gikan sa Survivors Network for those Abused by Priests o SNAP nga atoa nagbasi sa United States of America makatabang man kini apan dili gyud kaayo bug-at kay posibleng maka-trigger pa kini og insulto sa Simbahan.
Dili karon panahon sa pakig-away ug pang-insulto sa Simbahan kun dili panahon sa pakig-usa sa pag-ampo nga makabaton kita og mapaubsanon nga Simbahan.
Speaking of Simbahan, unsa ka tinuod kining akong nadawat nga info nga gikopya sa Capitol Parish Church diha sa Escario ang Diocese of Bacolod nga nagmontar og tarpaulin nga “Team Buhay” ug “Team Patay”?
* * *
Pagkadelikado sa atong panglawas nining mga tubig nga hulog-hulogan og piso nga anaa ra daplin sa mga kalsada sumaa pa ni Sanitation Insp. Rene Abejo Jr. sa Cebu City Health Department.
Niadtong Sabado atol sa among programang “Dialogue on the Air” sa dySS Super Radyo gibutyag ni Abejo ngan nga exposed kaayo sa abog nga gikan sa kalsada ug sayon kaayong motakboy ang bacteria sa gripo niining mga ATM kon Automatic Tubig Machines.
Matud pa nga posible pa nga maluwaan ang gripo ug duwaan sa mga may diperensiya.
Gawas niini posible pa nga lain-laing insekto sama sa langaw ug ok-ok ang motugpa sa gripo nga nagdala og daghang kagaw.
Gani mipahimangno siya sa publiko nga kinahanglang hugasan og ininit tubig ang mga gripo sulod sa panimay aron luwas sa mga kagaw dala niining mga insekto nga makatugpa sa gripo sulod sa panimay panahon sa kagabhion.
Samtang gipasalig karon ni Astro Logarta Head sa Production and Distribution Department sa Metropolitan Cebu Water District kon MCWD nga dunay igong supply sa tubig dinhi sa Metro Cebu taliwa niining nagkaduol nga summer.
Matud niya nga mahulga lang kita sa supply sa tubig kun dunay grabeng hulaw nga molanat gikan sa upat ngadto sa unom ka buwan.
* * *
Congratulations ni Sir Chester Cokaliong sa Cokaliong Shipping Lines nga nakaangkon og ikasiyam nga barko nga passenger/cargo vessel nga mobiyahi Cebu-Butuan.
Matud pa ang biyahe sa MV Filipinas Butuan mao ang mga adlawng Martes, Huwebes ug Sabado.
Kining maong barko mokargaoug 850 ka mga pasahero nga may gross tonnage nga 3,086.
Unya 15 knots ang cruising speed nga may four main engines og three auxilliary engines.
Again congrats, Sir Chester og daku kinig ikatampo sa ekonomiya sa Sugbo ug Butuan.