Ambot lag unsay kahulgan ning mga pulong nga Eiga sai. Basta alang kanako nagpasabut kinig libreng nindut nga pelikula nga Hinapon. Ang buot ipasabot nako sa nindut mao nga dili kini sama sa layat-layat plus sfx sa Hollywood nga alang lang sa wa pa matuli.
Nagsugod ang Japanese film festival karong tuiga sa Ayala Cinema niadtong Martes ug matapos karong Domingo. Dunay siyam ka pelikula nga ipasundayag. Duha pay akong nakit-an ug wa ko magmahay sa panahon nga akong gigahin sa pagtan-aw ning maong mga pelikula. Kon duna kay higayon karong adlawa o ugma ba, hinuon maayo tingali nga mosuroy kas Ayala ug moyan-aw og pipila ning maong mga pasundayag.
Ania ang schedule para karong adlawa:
The Summit: A Chronicle of Stones (139 mins.) 1:30 p.m.
Summer Days with Coo (1:38 mins.) 4:30 p.m.
One Million Yen Girl (121 mins.) 7:30 p.m.
Ug para ugma:
Your Friend (125 mins.) 1:30 p.m.
Summer Days with Coo (1:38 mins.) 4:30 p.m.
Feel the Wind (133 mins) 7:30 p.m.
Ang “Summer Days with Coo,” nga mao ray pelikula ning maong festival nga ikaduha i-salida, usa ka animation. Kabahin kinis mga gagmay nga binuhat nga namuyo sa usa ka gamay nga linaw nga giplanong pa-ugahon sa mga tao.
Ang akong nakit-an niadtong maong Huwebes mao ang “The Chef of South Polar” nga kabahin sa walo ka mga lalake nga gi-assign sa South Pole. Kinuha ang sugilanon gikan sa usa ka essay (sinulat) sa usa ka Chef sa kinabuhi ning maong mga Japon nga gilibutan sa mga ice nga tungod sa katugnaw way laing kinabuhi didto. Bisan gani ang virus di mabuhi. Lainlain ang ilang mga na eksperyensya bisan pa man og nagkuyog sila. Dihay usa nga gibuwagan sa uyab ug maong nanguyab na lang sa telephone operator. Ang ilang dakudaku nagluya kay nahutdan silag ramen noodles. Duna kanilay kawatan og butter, duna say usikan og tubig, kini bisan pa man nga nahibawo sila nga limitado ang ilang supply didto ning maong mga butang. Usa ka orig nga comedy kining maong pelikula.
Niadtong Huwebes ang ilang gipasundayag “Yunagi City, Sakura County,” nga kabahin sa tulo ka henerasyon sa mga ni survive sa atomic bomb sa Hiroshima. Usa kini ka sipat nga sentimental movies. Usa ka subo nga sugilanon nga giasoy sa makalingaw ug makahimuot nga paagi, walay tiabawtiabaw nga involved. Maayo kining i-juxtapose sa mabaw nga hollywood movies sa World War II sama sa Pearl Harbor.
Mao nga kon wa moy lingaw rong adlawa pahimusli kining Eiga Sai, kay way mahay.