Kun tinuod man kining akong mga nadawat nga kasayuran sa away sa politika dinhi sa dakbayan sa Sugbo bintaha kaayo si Cebu City Councilor Edgardo Labella sa iyang tinguha nga mahimong bise mayor kontra kang Vice Mayor Joy Augustus Young.
Matud pa nga advantageous kaayo kang Labella tungod kay samtang lig-on ang “Team Rama” nga siya maoy tandem ni Cebu City Mayor Michael Rama karong Mayo nga eleksiyon dunay laing pundok nga nag-suporta sa Tomas Osmeña ug Edgar Labella tandem.
Akong tinubdan nagkanayon nga nanaad usab ang mga magtutudlo nga ilang lat-an si Joy Young agig panimawos sa batasan niini nga morag kinsang Department of Education (DepEd) secretary nga mosayon-sayon sa pagpaningka kanila ug pagpanginsulto.
In fairness hinuon ni Young kampante kini ug may kompiyansa sa iyang kadaugan ngan nga anaa sa Type O o Bando Osmeña – Pundok Kauswagan.
Kining tanan anaa ra gyud sa katawhan kun kinsay padag-on sa duha kay akong tan-aw kumbate sab kining away nilang Mike Rama ug Tommy Osmeña pagka-mayor.
Ang alegre unya kun dunay pundok nga sekretong mugnaon nga Rama-Young tandem pag-alkontra sa Osmeña-Labella tandem.
Sa pagka-konsehal sa Cebu City south akong nahibaw-an nga puwerteng pangharos ni Basak Pardo Barangay Captain Dave Tumulak sa “Team Rama” tungod sa iyang rescue team.
Sa Cebu City North naglawig sila si former Lahug Barangay Captain Mary Ann Delos, kanhi City Traffic Operations Management (Citom) chairman Jack Jakosalem ug Busay Barangay Captain Yody Sanchez.
Hinuon layo pa kaayo ang eleksiyon ug puwede pa nga mausab ang kamada. Kumbate gyud mo! Wa lay pinatyanay, ha!
* * *
Temporaryo ra kining problema sa kahuot sa trapiko ning panahona diha sa duha ka mga tulay nga nagdugtong sa Mandaue City ug Mactan Island.
Di man sab mahimo nga atong pasagdan nga maguba kining duha ka mga tulay. Nagkinahanglan gyud og maintenance.
Pero manghinaut ko nga dili ma-inutil sila si Lapu-lapu City Mayor Paz Radaza ug Mandaue City Mayor Jonas Cortes uban sa ilang mga traffic managers nga sila si Frank Brazil ug retired major Edwin Ermac pagpangita og paagi nga masolusyonan kining maong problema sa labing daling panahon.
Mitiyabaw gyud intawon ang tanang motorista kay matanggong gyud ug duha ka oras.
Hisgot naman gyud kog problema sa traffic, haskang daghana nang mitiyabaw sa problema sa traffic sa barangay Lahug ilabina from JY Square paingon sa Sudlon-DepEd in Central Visayas ug JY Square to IT Park sa buntag, hapon ug gabii.
Wa gyud ni kahatagi ug kasulbaran sa mga opisyales sa Lahug ug sa Cebu City government ilabina sa taga-Citom.
Naa pay garbage truck nga manguha ug basura makigkompetensiya sa kahu-ot sa trapiko. Pun-an pa sa mga habal-habal driver nga mag-atang sa kadalanan.
Kaniadto pa ni sa panahon ni Jakosalem ug hangtud karon nagbalik-balik kining maong problema.
Alang lagi nako, makatabang-tabang gyud og sulbad kun dunay flyover sa Lahug habig sa may Sudlon unya palapdan ang kalsada.
Dili ko motuo nga mosupak niini ang mga negosyante ug mga residente kay mag-unsa man kanang negosyo kun dili sila moapil pagsulbad sa problema.
* * *
Nakatilaw og tagam ang akong amigo sa usa sa mga tindahan nga imnanan nga mag 24 oras diha sa Lahug duol sa usa bangko kay nahimong eskandalo ang iyang pag-inom og duha ka botelya nga beer kay wa na siya suklii sa iyang gitunol sa cashier nga tibuok kinyintos pesos niadtong pagkakadlawon sa adlawng Domingo.
Kun wa siya manawag og mga pulis ug nagpakitabang sa iyang reklamo nga gilipat-lipat sa mga cashier sa tindahan dili siya mahatagan sa sukli.
Matud sa akong amigo nga wa intawon siya mahubog sa duha ka mga gagmayng botelya nga light beer kay igo ra siyang mihapit sa tindahan nga miinom pangkatug ngan nga gikan sa duty.
Kinsay di maglagot nianang tikasan ka sa atubangan?
Ang duha ka mga babaye nga cashier sa tindahan naglain-lain ang version. Ang usa miingon nga ang akong amigo maoy pabayron sa pikas lamesa nga kadungan og inom. Samtang ang usa ka cashier nagpalakaw og istorya nga gumikan sa kahubog sa akong amigo wa na makahinumdom sa sukli.
Mao nga wa siya makaantos sa dakung binuang ug napugos pagtawag og pulis.
Makatagam gyud! Nakaingon akong amigo nga mag-usab pay layog! Dili na gyud makasapi kaniya ang maong tindahan.
Pero in fairness, tingali ang akong amigo nabiktima lang niadtong tulo ka mga batan-on nga nag-inom duol og lamesa unya gipaangkon sa akong amigo ang gipang-inom.
Leksiyon kini sa tanan nga kinahanglang bayad daan sa dili pa makainom aron way makalusot.
* * *
Nagpatagad ra gyud sa gobyerno kining ubang daku-daku sa Mindanao aron ingnon nga gamhanan na gyud kaayo sila sa pagpangilog og teritoryo sa Malaysia.
Unyag panggubaton ni sila didto ambot kun makaya ba nila ang puwersa sa Malaysian government.
Wa may kuwestiyon ning mangangkon ta og teritoryo apan kinahanglang ipaagi sa lehitimong gobyerno sa Pilipinas ug dili ipa-agi og puwersa.
Pakaulaw lang ning mga tawhana sa international community. Manguli pa lang ni sila sa Pilipinas ug managat mabusog pa ilang mga pamilya.