Gipangtagoan na ang mga bugas?

Dunay retailer og bugas nga akong amigo nga mipasangil karong bag-o nga paspas kaayong  nakatago sa ilang mga bugas ang mga negosyante nga mga Insik.

Ang giingong rice hoarding naggumikan kini sa balita nga mopahamtang og usbaw sa  presyo ang mga dagkung  negosyante sa bugas.

Si Lucy Rosales  tigpamaba  sa National Food Authority in Central Visayas (NFA-7) nagmakuli  pagtubag  sa maong  isyu.

Buot bang ipasabot nga may kasayuran  na ang taga NFA sa maong isyu?

Maglaum ko nga tutokan kini sa taga gobyerno aron magukod kining mga negosyante nga tikasan ug mga bintahoso.

* * *

Haskang ngilngiga na gyud karon sa atong mga tinugyanan sa Department of Science and Technology in Central Visayas (DOST-7) kay daghan na og mga inventions.

Si Director Rene Burt Llanto mitug-an nga ultimong karton puwede nang makaon sa tawo.

Gawas niini, iyang gitug-an nga mismo ilang tubig sa CR puwede kaayong i- recycle hangtud  nga mainom gihapon.

Maglaum ko nga makaimbento pa ug daghan  ang taga-DOST.

* * *

Pagkanindot handumon sa People Power Revolution o EDSA People Power I nga maoy atong gisaulog karong adlawa.

Kadto maoy simbolo nga sagrado, bililhon ug mas gamhanan kitang katawhan kay sa nagdumala sa gobyerno.

Apan kumusta na man kita karon human nga milampos ang kawsa pagpalayas ni anhing presidente Ferdinand  Marcos sa Malacañang Palace nga giakusahan nga grabe ang pagpangurakot ug  abuso sa gahom?

Naangkon ba gyud nato karon  ang tinuod nga diwa  sa EDSA niining pagdumala ni President Noynoy  Aquino gikan pa sa kawsa sa iyang amahan ug sa administrasyon sa iyang inahan?

Unya nako moingon nga milampos kita sa kawsa sa EDSA kun mikibra og 50 porsiento ang pangurakot  sa gobyerno ug milig-on pag-ayo ang atong ekonomiya.

Pero karon nga nagpasulabi pag-ayo  ang  politika ug nakig-alyansa ang pamunoan ni Pnoy sa mga tawo  nga  kuwestiyonable makalantaw nako sa unahan nga wa gihapon kitay kapaingnan.

Kawang lang ang mga paningkamot sa mga nag-una sa duyan!

* * *

Pagkadali ra gyud diay sa panahon! Wa lang damha nga miabot na diay og 16 ka tuig ang akong  gipangga  ug gi-alagaran nga estasyon sa radyo  nga mao ang dySS Super Radyo nga maoy radyo sa GMA-7.

Kagahapon, Pebrero 24 maoy tukma nga nag 16 na kami ka tuig sa among pagpangalagad gikan sa pag-relaunched sa dySS niadtong Pebrero 24 tuig 1997.

Ang among sibyaanan kaniadto  didto pa sa may dalan Sanciangko atbang sa University of Cebu.

Sa akong paghanduraw, morag usa pa ka semana ang milabay gikan niadtong Pebrero 24 tuig 1997. Nakaingon ko niini tungod kay puwera buyag  nagpabiling  lig-on ang Super Radyo  unya consistent kaming nangalagad nga puno sa kawsa ug  prinsipyo sa kagawasan sa pagpanibya.

* * *

Maibtan ug gamayng tunok ang atong kapolisan kun tinuod kining istorya nga patay na ang daku-daku sa “Alferez Robbery Group” nga si Alfredo “Pedot” Alferez.

Apan di pa angayng  magsadya ang kapolisan kay segurado ko nga duna pay makadala sa grupo aron makapadayon niining   matang sa panginabuhi nga illegal ug sindikato.

Gani akong nahibaw-an gikan kang  Chief  Insp. Michael Bastes nga mas nabalaka pa sila  karon  kay  anaa  kining  pundok niadtong responsable  sa mga pagpanulis sa mga  tindahan sa Robinsons human  nga na-rescue ang ilang daku-daku  ug utok niadtong pagpanulis nilang Junjun  Cabando.

* * *

Nahurot akong bilib  ni Cebu City Regional Trial Court Judge Meinrado Paredes kay usa siya  sa natudlo  sa Korte Suprema isip miyembro sa revision committee nga maoy  mousab sa  Rules of Court.

Usa kini ka garbo natong mga Sugbuanon  nga dunay gikan dinhi sa ato nga lantip kaayo og panghuna-huna ug dunay kredibilidad nga apil  sa motuon sa mga probisyon sa Rules of Court ug mopa way  bili sa ubang probisyon nga way gamit.

Ang Rules of Court maoy maisip nga bibliya ug sumbanan sa tanang mga mahistrado ug sa tanang practicing lawyers.