Si Director Oscar Tabada sa Philippine Atmospheric, Geophysical and Astronomical Services Administration – Mactan mipasidaan ning bagyong “Crising” nga dili gyud maayo ang dagan sa panahon hangtud sa adlawng Biyernes.
Kagahapon lang puwerte gyung dag-uma dinhi sa dakbayan sa Sugbo unya mokusog ug mohinay ang ulan.
Delikado kini kay magdala og daghang tubig ulan ug may mga unos ilabina didto sa Southern Mindanao.
Unsa man tuod ka andam ang tanan natong mga Local Disaster Risk Reduction and Management Councils ning maong bagyo?
Wa ba kawata ug wa ba ipamulitika ang mga pundong bugas, de-lata nga pagkaon ug uban pang giandam alang sa mga biktima sa kalamidad?
Kagahapon duna nay barge nasangad didto sa Daanbantayan nga iya sa Roble Shipping Lines tungod sa bati nga panahon.
* * *
Kumusta na man ang imbestigasyon batok nilang Nonoy Artes kanhi pangulo sa Squatter Prevention Encroachment and Elimination Division sa City Hall nga gipasanginlan sa mga nagpuyo diha sa Citi Center Kamagayan nga nangolekta og kuwarta alang sa relocation site?
Usa kini sa mga rason kun nganong naalanganin ang syudad pagpalayas sa mga nag-okupar.
Niadtong nagpahigayon ko diha og “Dialogue on the Air” nakadawat na man ang mga nagpuyo sa desisyon ni Cebu City Mayor Michael Rama nga sila papahawaon.
Pero unsaon man nga mipatigbabaw man ang pamulitika sa kampo sa Bando Osmeña-Pundok Kauswagan (BO-PK) nga nagdupa-dupa sa mga nagpuyo.
Ang tumong ra gyud niini sa BO-PK mao nga himoong inutil ang administrasyon ni Rama.
Wa lang gyud huna-hunaa nga ang pag-develop diha sa Citi Center Kamagayan makahatag og income ug kaayohan sa Cebu city government. Pagka-loslos gyud niining politika!
* * *
Naglumba lang sa pagpahimulos ang mga incumbent elected public officials paggamit niining atong mga government resources panahon sa ilang pagpangampanya.
Kuyaw ra ba kaayo ning ubang opisyal kay maglinimpiyo ug moingon gyud nga di sila manggamit og mga sakyanan ug ubang kagamitan nga iya sa gobyerno.
Pero pastilan gyud! Di na lang gud unta magminaot ning atong mga amigo ug mga amiga kay bisan kining ilang paggamit sa oras sa gobyerno alang sa ilang political interest usa na ka dakung kalapasan sa pagpanikas.
Bisag kuwentahon pa ang ilang oras kada adlaw sa pagpangalagad. Di gyud mosibo sa ilang nadawat nga dagkung honorarium ug incentives.
* * *
Kaniadto pa si anhing Judge Douglas Marigomen nga medyo luya gyud unya magsigeg kapalta sa trabaho kay maglain ang lawas ug kanunayng malandig sa tambalanan.
Gani usa sa mga ataki kaniadto ni Judge Marigomen akong nataymingan ug akoy nanawag sa mga paramedics sa Kapitolyo sa Integrated Provincial Health Office ug sa taga-Emergency Rescue Unit Foundation (Eruf) aron siya maatiman.
Niadtong si Judge Meinrado Paredes pa maoy executive judge si Judge Marigomen miduso sa iyang resignation tungod sa iyang kahimtang sa panglawas.
Apan wa magdugay iyang gibawi ang resignation ug naningkamot nga manindot na ang iyang performance.
Akong nahibaw-an si Judge Marigomen naka-hearing pa sa mga kaso sa iyang sala diha sa Regional Trial Court (RTC) Branch 5 niadtong Valentines day ug nag-overtime pa.
Iyang driver nagkanayon nga nianang pagka-alas-7 pasado sa gabii nagpakitabang na kaniya si Judge Marigomen ug magpahatod sa tambalanan.
Matud niya nga nikalit lang og kalumoy ang lawas sa huwes ug dili na makatabi.
Mao nga nanawag siya og taga-Eruf ug gidala sa Cebu Doctors’ Hospital.
Si RTC Judge Ramon Daomilas mi-text kanako niadtong Domingo bahin sa kalit nga kamatayon ni Judge Marigomen.
Sa tinuod lang wa dayon ko makatuo sa balita kay sa akong obserbasyon ni Judge Marigomen naulian man siya sa iyang panglawas gikan niadtong magsigeg kapalta sa trabaho.
* * *
Alkanse gyud intawon sa kapit diha sa Marcelo Fernan Hall of Justice ang mga gagmayng vendors nga mamaligya og pagkaon, prutas ug uban pa kay dili na makasulod sa korte basi sa kamandoan nilang RTC Executive Judge Silvestre Maamo.
Pero naay Victor Yu nga nananto og kuwarta gawasnon kaayo nga makasulod-gawas sa korte.
Gani niadtong Lunes sa hapon ako siyang nakit-an diha duol sa mga guwardiya ug nakapadayon sa iyang negosyo.
Si Judge Macaundas Hadjirasul mipahigayon og tigom sa mga vendors ug iyang gipasabot sa polisiya.
Apan ang huwes mipasabot nga wa siyay nadawat nga report kun makasulod ba gihapon si Mr. Yu.
Iyang giklaro nga tanang matang sa negosyo bawal gyud sa korte apil na ang pagpatanto ug kuwarta ni Mr. Yu ug ubang mga naghimo og susamang negosyo.
Pagkadaghang puwesto sa gawas, ambot kun nganong anha gyud magsiningkahay sa pagpaningil sa utang nga laksot kaayong paminawon.