Siomai Dynasty
Kun padung kang mosud sa Cebu City Sports Complex sa may Abellana National School malagmit dili mo kini makit-an. Apan inig gawas mo gikan sa maong “complex” mao kini mosugat kanimo: “Siomai Dynasty.” Usa ka karatola sa tindahan nga migamit og usa ka sipat nga panghambug nga way sipyat nga mopangisi sa mohangad niani.
Gawas sa juxtaposition sa usa aka gamay nga butang—“siomai” ug sa usa ka dako nga butang—“dynasty,” ang ngalan ning maong kan-anan mosugyot usab og satire sa mga kung-fu movies.
Mibalik pagbutho sa akong hunahuna kining maong karatola dihang namiktyur ako sa kampanya ni Congressman JV Ejercito, ang ikaduhang anak ni Erap nga modagan sa Senado.
Tulo ka topic ang kanunay nga mobutho matag himamat ni Ejercito sa media: 1) Kasambahay Law; 2) Reproductive Health (RH) Bill; 3) Dynasty.
Kanunay nga i-stress ni Ejercito na dili na kini Kasambahay Bill. Kasambahay Law na kuno ang iyang gi-sponsor nga bill kay ni pasar na man kini sa Balay Balauranan. Kining maong balaud mibutang sa sweldo sa mga katabang sa panimalay sa P2,500 minimum sa Metro Manila ug P2,000 sa ubang bahin sa Pilipinas. Nagkanayon ang kongresista nga dili ang sweldo maoy punto ning maong balaud kun dili ang katungod ug proteksyon sa mga katabang sa panimalay.
Mongisi si Ejercito matag may mga tawo nga mopikpik sa iyang abaga og moingog—“thank you for being pro-life.” Usa man gud si Ejercito sa mibotar batok sa RH Bill nga wa mauyoni sa Simbahang Katoliko. Apan kon makorner si Ejercito sa press ug pangutan-on sa iyang katarungan sa pagsupak ning maong bill moeksplikar siya nga dili siya supak sa prinsipyo niini. Ang wa lang niya mauyoni mao nga walay time frame ang maong kampanya. Nagkanayon siya nga siya nabalaka nga maparehas unya kita sa ubang estado sama sa Singapore nga mas daghan ang mga tiguwang kay sa batan-on ug nga sa ingon mas daghan ang retiree kay sa work force.
Nakahinumdom ako sa tubag ni Sony Osmeña niadto dihang gipangutana siya sa iyang panahum kabahin sa mga dynasty. Nagkanayon ang kanhi senador nga kun dunay pamilya sa mananagat, dunay pamilya sa mga negosyante ug pamilya sa magtutudlo nganong wa may pamilya sa mga politico/public servant.
Sa iyang bahin, miingon si Ejercito nga wa kitay angay kabalak-an ning mga dynasty basta di lang sila mogamit og guns, goons and gold para pagpalig-on sa ilang nahimutangan. Nagkanayon siya nga nga sa iyang paglibutlibot sa tibuok nasud daghan na siyang nakit-an nga dynasty nga natumpag tungod kay ang mga batan-ong mipuli sa ilang mga apohan di na kamao modala niani. Busa alang kaniya walay angay kabalak-an nianing mga dynasty kay maporma kini sila, mosaka ug matumpag ra usab kun wa na sila kinahanglana.
Sama kang Sonny Osmeña, si JV Ejercito maingong sakop sa nianing gitawag og dynasty. Silang duha matawag ta og “Trapo” o traditional politician. Kun tan-awon mo ang senatorial line-up sa UNA (United Nationalist Alliance) daghan kaayong mga dynastic trapo. Apan ingon man sab niani ang lineup sa kang Noynoy nga Liberal Party.
Makaingon ta nga ang piniliay karong 13 sa Mayo usa ka showdown sa mga Trapo Dynasty. Dili sa Siomai Dynasty.
