Wa gyud ko malipay sa gihimo nilang S/Supt. Rey Lyndon Lawas diha sa dakbayan sa Lapu-lapu ug sa iyang mga sakop nga nagmika lang suud sa ilang buhatan dihang giilog among camera sa GMA-7 sa kabanay niadtong Korean national nga sadista kaayong nakighilawas ug mipatay sa Cebuana.
Gitugtan pang Col. Lawas ang pamilya sa suspetsado nga maoy mangunay pag-delete sa nakuhang video sa among reporter ug cameraman nga sila si Bexmae Jumao-as ug Leofil Labastida.
Puwerte’ng hari-a gyud ning mga kanahan bisag wa na sa ilang teritoryo.
Kun may pamatasan pa ni’ng mga Koryano puwede man sila magpakuyog sa mga pulis sa Lapu-lapu ngadto sa among opisina ug manghangyo nga dili ipa-on air ilang video.
Magduda man lang ko nilang Col. Lawas nga atua nakapusta sa mga langyaw.
* * *
Ambot lang kun may kalambigitan ba ang politika sa pagpusil patay kagahapon sa buntag sa uyu-an ni Lilo-an Mayor Duke Frasco.
Ang biktima giingong usa sa mga sinaligan sa partido sa mayor sa pagpangampanya.
Blangko pa ang kapolisan kun kinsa ang responsable sa krimen ug unsay motibo pero tutukan gyud ang tanang possible angle sa krimen apil na ang negosyo ug personal.
Sa tulo ka mga kandidato pagka-mayor ang labing lig-on mao si incumbent Mayor Frasco sa (UNA). Ang iyang mga kaatbang mao sila si Jimmy Maglasang sa (BAKUD) ug Benito Sarmiento (Independent).
Kun ma-establisar man nga politika maghatag na sab kini ug labad sa ulo sa kapolisan ug sa taga COMELEC.
* * *
Di angay’ng ika-kurat ang pag-resign kang Pope Benedict XVI isip Santo Papa sa atong Simbahang Romano Katoliko human gi-anonsiyo sa Vatican niadtong Lunes.
Dili ikatinga ang iyang resignation nga effective karong petsa 28 tungod kay balido kaayo ang rason. Gipasabot sa Vatican nga ang hinungdan tungod sa iyang kataas na ug edad nga mo-abot na ug 86 anyos karong Abril.
Tungod sa pangidaron mihuyang na ang panglawas sa Santo Papa ug mipasabot nga dili na siya makatuman sa iyang ministry sa Simbahan.
Mas makadayeg pa ko sa iyang pag-resign kay sa ubang mga tawo kay bisag naglisud na sa panglawas buot pang magpabilin sa kahakog sa gahom.
Kun kinsa man ang mopuli ni Pope Benedict XVI segurado ko nga hashasan kini sa tanang mga Cardinal sa tibuuk kalibutan nga maoy maglangkub sa College of Cardinals nga puwede’ng pilion ug maka-exercise sa pagbotar.
Maayo unta kun kuwalipikado pa si Cardinal Ricardo Vidal aron ato siyang ituboy pagka Santo Papa ngan nga ang Pilipinas maoy nagpabiling nasud karon nga midominar ang Romano Katoliko.
* * *
Nakatawa ko kang Mr. Cris Saavedra nga miduso ug petition sa Provincial COMELEC aron ipa-disqualify si suspended Governor Gwen Garcia sa iyang kandidatura pagka-kongresista sa ikatulong distrito.
Dihang gisulti-an sa taga COMELEC nga dunay bayranan nga balig 10 mil kapin ka pesos isip filing fee nanawagan siya sa mga sakop sa media nga mo-apil ug tampo sa kantidad.
In fairness hinoon ni Cris Saavedra mipasalig nga siya nalay mobayad ug usbon niya ang iyang petisyon ug iyang i-under oath, pa-notaryohan ug magpaabot ug 11 ka kopya sa COMELEC.
Pero with all due respect kang Saavedra bisan pa kun iyang amendahon ang iyang petisyon medyo lisud gyud nga ma-disqualify si Gwen tungod kay na-absuwelto si Gwen sa kasong administratiba sa pagpalit sa Balili property gumikan sa Aquinaldo doctrine.
Kun moingon si Saavedra nga ang gamiton niyang basihanan mao ang suspension penalty nga gipahamtang ni president Aquino ngadto Gwen, dili gihapon basihanan.
Sa balaud ma-disqualify lang ang kandidato o di na tugtan nga magpapili kun nakonbikto with finality sa mga kasong “involving moral turpitude” sama sa mga pagpangilad.
Ang kasong usurpation of authority kon (pagpangilog sa gahom) nga gipasaka ni anhing Vice-governor Greg Sanchez nga maoy na-ingnan sa suspension ni Gwen dili sibo sa gipasabot sa unahan.
Mao ni nga daghan ang nagduda ni Saavedra nga nagpagamit ni kongresista Tomas Osmena aron gyud haras-harason si Gwen.
Pero alang nako mas maayo man hinoon nga tinud-on ni Saavedra kining pagpa-disqualify ni Gwen aron dunay katagbawan ang tanan sa sangko-an niini.
* * *
Nakahapit ko sa bag-ong RHU sa among lungsod sa Dalaguete niadtong Domingo sa gabii nga liwas sa kapistahan ni San Guillermo sa Poblacion nga dalang bisita sa akong pinanggang inahan.
Nindot gyud kaayo ang RHU nga may floor area nga sobra sa 6 mil ka metro kuwadrado.
Si Dr. Edgar Alonzo nga hepe didto sa RHU mitug-an nga ang maong edipisyo himoon gyung Community Hospital sa Dalaguete.
Sumaa pa ni Dr. Alonzo nga nagplano pa si Mayor Ronald Alan Cesante nga himoong duha ka andana ang building nga Community Hospital aron makaserbisyo gyud ug todo namong Dalaguetenon.