Sinugo festival

Dunay giingon sa National Basketball Association kon NBA nga –“it ain’t over till the fat lady sings.” Ang kanta sa fat lady usa ka pasumbingay sa tingog sa buzzer.

Sa ato, Sinulog ain’t over till February. Sa pagsugod man gud sa Pebrero ang ting panghatag og mga pasidungog sa mga misalmot sa mga peripheral activities o mga kalihukan nga walay deretsong kalabutan sa dakong parada.

Nindot iintra ning maong mga bangga ug kalihokan bisag nakahibaw ka nga gatakilid na daan ang imong salmot. Usahay patas-anay na las ihi o sa hagit na lang kon ma beat ba nimo ang deadline. Mao nga miintra ko ug giawhag ko usab ang mga estudyante pag-intra. Puros mi nangapagan. Okay ra basta lang nakaapil.

Wa ko makasugod sa showing sa mga short film pero nakakita ko sa “Katapusang Labok” diin na best supporting actor ang atong higala nga si Ivan Zaldarriaga nga mao say co-director niadtong pelikulang “Dili Ingon Nato.” Ug nakadaug sab si Dulcita Siruoy pagka best supporting actress ning maong pelikula. Hinuon mas inila si Dulce isip mama ni Dionne Monsanto, ex-Pinoy Big Brother housmate nga ABS talent na karon. Giganahan ako sa uga ug gahi nga pagkaluto sa maong pelikula nga di motuo og milagro.

Ang kadasig sa pagsugat sa mga mananan-aw sa “Katapusang Sayaw” nga kabahin sa problema ug panaad ni suspended governor Gwen Garcia morag molinya sa akong panahum nga mahimong sentro sa oposisyon ang Cebu. Ang pinaka-powerful nga eksena ning salida nga gipasiugdahan ni Amper Campaña mao ang pagpakita ni Gwen sa iyang living quarters nga medyo Spartan ang kahimtang. Lahi ras perception sa kadaghanan nga luxurious ug haruhay ang iyang lawak sa Capitol. Ug kun nakakita kamo sa balita gabii, nagpadayon pa ang mga pagsuway ni Gwen labi na kay galaum pa ang Ombudsman nga mapasakaan siyag kasong criminal tali sa transaksyong Balili. The real life drama continues.

Nalingaw ako sa “Katapusang Sayaw” apan ang “Higanting Panaad” maoy nakawingig nako kay mao kini ang klase sa documentary nga gusto kong mahimo apan dili nako kaya. Kumpletos rekados kining maong obra maestro ni Aldo and and company. Both informative ug visually stimulating kini.

Dugay na akong walay interest sa Sinulog Photo contest kay murag di man gyud ko makadaug niini. Usa akos mityabaw batok sa pagtuli sa Photoshop sa mga imahen apan natagad na kini sa foundation pinaagi sa pagpangayo nilag raw copy. Apan human masulbad ang malisya sa Photoshop may lain na sab nga nakit-ang problema ang mga maniniyot. Ang ilang wa mauyoni mao ang pagsugo og pa-pose sa mga subject –paposingon nga daw inosente o makakluluoy ang mga bata ug tiguwang nga magdag Sto Niño. Hapit ang tanan nga didto sa exhibit sa SM mireklamo sa black and white nga picture nga dunay bata nga gaisa og Sto. Niño. Wa tay mahims kon dali ra mailad ang judges. Maong miingon ang amigo kong si Joseph Tubilan kun maayo ba kaha nga duna nay “sinugo division” ang sunod nga photo contest sa Sinulog.