Niadtong Lunes sa gabii midangop sa among sibya-anan ang barangay konsehal sa Tubod, San Fernando, Cebu, uban sa iyang bana ug kabanay kay nagpakitabang sa ilang nahi-aguman sa mga pulis sa lungsud sa Pinamungajan ni-anang pagka-ala-una sa hapon.
Si konsehal Marcosa Ongcoy mitug-an nga gawas sa iyang pagka-konsehal sa ilang barangay, nag-negosyo siya ug kopras uban sa iyang kapikas nga si Alberto.
Ngan nga adlaw’ng Lunes ug maoy ilang na-andan, mi-adto sila sa Pinamungajan area sa pagpanguha ug pagpanimbang ug kopras.
Samtang na-busy sila sa pagpang-aswat ug pagpanimbang sa mga kopras sa may barangay Anislag, Pinamungajan, kalit lang silang gipang-tionan ug mga armas sa unom ka mga pulis pinangulohan sa hepe nga si Insp. Leo Logronio.
Tungod sa ka ratol ug sa pagka-inosente wa silay nahimo ug pulos natulala sa gihimo sa kapolisan.
Sa ilang kahi-ubos nangutana sila kun unsay ilang sala. Nakuha nila sa kapolisan nga sila giingong nagdala ug mga tag-as nga armas ug maoy hinungdan nga sila gi-alarma.
Way nakuha ang kapolisan. Ang bana mi-angkon nga nagdala siya ug armas apan lisensiyado ug duna siya’y permit to carry ug lisud kit-an kay maayo niya’ng pagkasulod sa bag.
Ang nakaporke kay ang magtiayon namasangil sa kapolisan nga maoy mga responsable sa pagkawagtang sa ilang kuwarta nga balig P100,000. Matud sa konsehala nga tungod sa kahadlok gidali niya pagbutang ang iyang bag nga may sulod nga daghang kuwarta sa front seat sa ilang multicab ug midagan siya.
Matud ni Marcosa nga ang mga pulis nagpatuyang lang ug pang-ukay sa ilang sakyanan.
Akong gitawgan ang Pinamungajan police station aron kuhaan sa ilang habig apan way motubag sa ilang telepono nga nagsige’g bagting.
Si Cebu Provincial Police Director Senior Supt. Patrocenio Comendador mipasalig nga iyang imbestigahon kini’ng maong pasangil.
Itugyan niya sa Provincial Police Internal Affairs Service. Matud ni Comendador nga ang iyang tahasan sa pag-imbestigar mao ang pulis nga di niya sakop aron patas ang tanan.
Ang konsehal ug ang bana’ng negosyante ingon man ilang mga pag-umangkon nga ilang katabang ug nakasaksi sa nahitabo mo-seryoso gyud sa pagkiha sa mga pulis sa Pinamungajan.
* * *
Makapahinuklog kaayo ang nahitabo karon sa mga nahibiling sakop sa pamilyang Bacolod kay wa nay bisan usa kanila ang napa-ubos sa witness protection program sa Department of Justice.
Kagahapon si State Prosecutor Llena Ypong nga maoy in charge dinhi sa Central Visayas nagkanayon nga kabubut-on ni Josebil Bacolod karong bag-o nga mobiya sa maong programa kay gitinguha ang bulto nga kantidad alang sa ilang relocation human unang gipang-terminate ang iyang mga igsoon.
Nasayod ko nga napugos lang si Josebil tungod kay wa nay laing mahimo silang mga magsoon pun-an pa nga nagkasakit karon si Ricky.
Gipangtang-tang sila sa programa kay kuno wa nay hulga sa kinabuhi.
Apan kun palawuman gyud sa mga kadagkuan sa DOJ ang ilang pagpahigayon ug imbestigasyon segurado ko nga risgo pa sa mga magsoong Bacolod kay wa pa mahuman ang kasong parricide batok sa ilang bayaw nga si PBMA Supreme Master Ruben Ecleo Jr.
* * *
Niadtong Domingo sa udto nakadawat nako ug impormasyon nga mo-surrender si Bella Ruby Santos aron atubangon ang kasong kidnapping with homicide.
Segun sa akong tinubdan nga adto sa R2 Intelligence sa Police Regional Office 7 motahan si Bella.
Apan sa pinaka-uwahe gibabagan si Bella sa iyang kabanay nga mo-surrender tungod sa kabalaka nga siya bun-ogon pina-agi sa gitawag nila ug takal.
Matud pa lagi sa nakatilaw ug priso normal ra gyud ang gitawag ug takal” nga daw sama ug hazing kay usa kana sa mga ritwal sulod sa mga bilanggo-an.
Alang nako in fairness sa mga mapriso sama’ng Bella di sab tingali maayo nga atong paundayunan kini’ng mga klase sa ritwal.
Kinsa may mopasiugda niini? Mga government personnel o pundok sa mga karaang piniriso?
Kun mao ni’ng sestemaha mobakwi nalang sab ko sa akong panawagan ni Bella nga mo-surrender.
Gawas kun mopasalig ang mga kadagkuan sa Bureau of Jail Management and Penology o ba kaha diha sa Cebu Provincial Detention and Rehabilitation Center (CPDRC) nga way takal akong hangyoon si Bella pagbalik nga siya mo-surrender ug magbaton og kaisog pag-atubang sa kasong pagdagit ug pagpatay ni Ellah Joy.
Unsaon pag-proyba nga siya inosente nga nagsige man siya ug tago-tago?