Ako lang koreksiyonan ang uban nako’ng mga kaubanan sa media ug sa ubang mga kaalyado sa mga politiko nga medyo mikuwestiyon sa among gipahigayong coverage niadtong pag-padlock sa office of the governor nga kuno mi-abuso kami’ng mga nag-cover didto kay wa dayon mosanong sa hangyo ni Supt. Leopoldo Cabanag nga mogawas sa opisina sa gobernador aron ila na’ng padlakan.
Ambot kun abuso ba gyud ang akong gihimo sa wa pagsanong dayon ni Supt. Cabanag nga ang tuyo namo aron makita ang tibuuk sitwasyon human namulong ang kampo ni Gwen nga di gyud sila mamahawa.
Kun mao man ang pagsabot sa uban nga mi-abuso ko niadtong higayuna batok kang Cabanag akong dawaton sa tumang pagpa-ubos.
Pero ang importante wa ko maapil sa payroll sa kampo ni Gwen Garcia o ba kaha sa kampo ni Agnes Magpale.
Dili intawon namo tumong nga babagan ang kapolisan sa pagtrangka sa buhatan ni Garcia tungod kay wa intawon mag-apil-apil kaming mga sakop sa prensa sa bugno sa pulitika.
Ambot kun abuso ba gyud kadto kay mismo si Cabanag nagpasalamat paman gani sa akong gihimo dihang akong gitambagan ang iyang mga sakop nga mga pulis ug kampo ni Gwen nga magpabiling kalma ug ipatigbabaw ang kalinaw pinaagi sa pagtuman sa maximum tolerance.
Kadtong among gihimo nga nagpabilin didto usa lang gyud ka initiative kay sa tinuud lang ang mga tawo o mga tigbalita nga gikan sa opisina ni Gwen nga mogawas sa linya sa nagbarikada nga mga pulis dili na pasudlon ug balik.
Mao nga dihang nagpatawag ug presscon si Magpale niadtong higayuna ug nahitabo na nga medyo may konprontasi kaming mga sakop sa media ug sa kapolisan nakadesidir ko ug akong kauban nga taga Bombo Radyo nga magpabilin sa opisina ni Gwen samtang ang uban namong mga kaubanan mi-adto sa opisina ni Magpale.
Akong gipili nga magpabilin sa office of the governor kay atua ang aksiyon ug wa sa presscon.
Akong gipahinumduman si Cabanag nga ang presensiya namo’ng mga tigbalita mao ra gyud ang pagsunod sa mga kalambuan niadtong higayuna ilabina nga wa pa mag-alas 5:00 sa hapon.
Salamat nga iyang gisabot akong ponto mao nga nakapahigayon ko ug blow-by-blow coverage sa among radio station sa DYSS Super Radyo gikan pa sa programa ni Super Aljin Abaguita sa “Imbestigador” ug sa kang Super Jeffrey Tumulak nga “Kahaponon Uban ni Super Jepoy” ug naka-participate pa gyud ko sa among “Balitang Bisdak” sa GMA-7 Cebu bisan nahutdan na ug battery ang akong dala nga mga komunikasyon.
Apan tungod kay akong tan-aw mahimo nako’ng inutil kay giputlan na ug linya sa koryente ug linya sa telepono ug wa na koy battery migawas nalang ko mga alas 6:00 pasado ug si Super Renan Alanginan nalang maoy mi-standby hangtud na sa programa ni Super Gerry Auxillo.
Lisud gyud ni’ng trabaho namong mga tigbalita kay duna gyu’y mga panahon nga mabutang kami sa alanganin. Puwerte gyu’ng paita kay ang akong mga anak alas 7:00 na sa gabii nako nakuha inay alas 4:00 pa sa hapon ang tingbuhi.
Pero salamat nga way dautang nahitabo taliwa sa kainit nga sitwasyon ilabina niadtong wa na pasudla ang chief of staff ni Gwen nga si Elizabeth Francia.
Maayo kay nakakita ug labing sayon nga paagi ang kapolisan aron manggawas ang mga staff ni Gwen pinaagi sa wa pagpasulod ug mga pagkaon ug dili na makagamit sa c.r. Wa nay maayong laki niadtong paagiha gawas sa pagbiya.
Alang nako dili na sayop ni Acting Governor Agnes Magpale ang pag-padlock kay mibiya man si Gwen.
Gani daku ko’g pagtoo nga kadtong iyang paggawas sa iyang opisina ug miadto sa Oslob maoy “graceful exit”.
Kun di pa kadto “graceful exit”, susama unta ang ilang pagkamabinantayon niadtong iyang pagsayaw sa Sinulog nga gipabantayan ang opisina sa mga elder Garcia.
Ang isyu karon mao kun makapugos ba si Acting Governor Magpale pag-abli sa mismong opisina sa suspended governor aron adto siya mag-opisina?
Si Eva Encabo nga maoy hepe sa Provincial General Services Office kon PGSO miingon nga anugon gyud kaayong pugson pagguba ang pultahan nga mahalon ra ba ang klaseng kahoy ug ang gigamit nga padlock.
Miingon si Encabo nga ang maayong buhaton mao ra gyud ang pakigsabot ni Gwen aron ipakuha ang iyang mga personal nga butang sa sulod.
Pero mangambot lang ko kun motuman ba si Gwen nga gani mipasidaan naman nga iyang ikiha ug kasong robbery kadtong mosuway sa pag-abli sa iyang opisina.
Anhi makita kun huyang ba o lig-on ba ang liderato ni Magpale.
Kun akoy Magpale ablihon ko na ug pugos. Kiha lang bisag asa Gwen!
* * *
Karong alas 7:00 sa buntag sugdan na ang major operation sa ulo ni Cebu Assistant City Prosecutor Maria Theresa Casiño aron kuha-on ang mitapot nga bala sa pagpamusil ni anhing John Pope nga Canadian national.
Atong i-ampo nga si piskal Matet makalingkawas niining peligro nga medical intervention ug alang sa iyang fast recovery.
Karong alas11:00 dunay Santos nga Misa nga ihalad sa iyang mga kaubanan diha sa Cebu City Prosecutor’s Office alang sa iyang kaluwasan.
Akong nahibaw-an gikan kang piskal Liceria Baby Rabillas nga mobalor ug sobra usa ka milyon ang bayranan sa pamilya ni piskal Matet sa ospital.
Pero bahala na’g pilay gastohon. Ang importante nga malugwayan ang kinabuhi sa mga tarong ug ligdong nga mga alagad sa gobyerno.
Unsa may natampo ni DOJ Secretary Leila De Lima ug Presidente Noynoy Aquino?
Abi kay layo man ang Sugbo sa Malacañang way tabang ang executive department?