Ayaw na pasudli ug mga supporters!

Usa ray sulbad aron dili na masubli ang nahitabo kang Renante Pique niadtong Lunes sa buntag nga hapit siya madunggabi diha sa Palace of Justice.

Ang maayong himoon sa mga pulis ug mga guwardiya diha sa Marcelo Fernan Hall of Justice mao ang pag-ban sa mga paryente ug mga supporters ni Bella Ruby Santos pagsulod sa korte.

Dili lang mga supporters ni Bella ang i-ban apil usab ang mga supporters ni Renante.

Labing tinuud samok gyud kaayo ang RTC Branch 6 sa sala ni Judge Ester Veloso nga anaa kining mga supporters unya dili ra ba kalikayan nga magpasakitay ug estorya.

Unya nata maglikay kun dunay matakdan sa gihimo ni John Pope?

Unsa ka tinuud kadtong pasangil sa mga abogado ni Renante nga naglatok lang ang mga mata sa mga guwardiya sa korte bisan nakakita na ug nakadungog na sa init nga mga sulti sa mga supporters ni Bella?

Gawas nga hatagan ug security escort si Renante kinahanglang hatagan kini ug sekretong agi-anan pagawas sa korte aron luwas gikan sa mga mo-interest kaniya.

Mao ni ang nakaparat nga dili masabtan sa uban nga ang tawo nga nangayo ug hustisya samotan pa gyud ug daug-daug.

Lisud gyud kun kuwartahan ang gipangtaral kay makahakot ug daghang tawo aron matapin-an ang tinuud.

* * *

With all due respect sa atong kapulisan, lisud pa kaayong toho-an nga naghikog ang Canadian national nga si John Ppoliceope human nga nagwala sa korte nga nakapatay ug abogado, doctor ug naka-angol ug piskal.

Kun dili pa biased si Acting City Police Director Mariano Natu-el ngadto sa mga pulis nga mi-responde nganong wa man siya mi-insister nga ipa-autopsy ang patayng lawas ni Pope aron maklaro ang tanang scientific findings?

Ngan nga usa ka medico legal case ang kamatayon ni Pope obligado ang kapolisan pag-autopsy bisag way pagtugot sa iyang kabanay.

Hugot akong pagtoo nga hikog nalang ang gipagawas nilang Natu-el paglikay sa tulubagon ug hasol nga kaso human naleksiyon sila sa nahitabo ni SPO1 Adonis Dumpit.

* * *

Niadtong Lunes sa buntag nakasaksi gyud ko sa pagka-suplada niadtong tiguwang nga babaye nga usa sa mga naglinya paingon nga mosulod sa Palace of Justice.

Dihang iya na’ng torno nga inspeksiyonon sa duha ka mga guwardiya sa Eagle Metrix Security Agency iyang gipangsingkahan ang duha ka mga guwardiya ug giprangkahan nga wa siyay salig sa mga blue guards ug mo-submit lang siya sa inspection kun pulis ang mohiling.

Ang mga guwardiya nga namula ang aping mipatuman nalang ug maximum tolerance bisan sa insulto.

Apan ang pulis nga maoy mihiling sa iyang bag iya sang gi-insulto ug giingan nga “Ayaw na tan-awa ang sulod nga kuwarta kay basig matintal ka”.

Nanglipagho intawon ang mga pulis ug mga guwardiya sa mga insulto sa tiguwang nga suplada.

Wa gyud tay dag-anan sa mga tiguwang kun atong awayon kay gabaan unya ta.

In fairness hinoon sa lola tingalig nagsakit na ang tuhod unya gipalinya pa gyud ug taas nga dili kriminal.

Kinahanglang tumanon ni Judge Macaundas Hadjirasul kadtong iyang giingon nga dunay linya alang sa mga senior citizens aron dili intawon sila mahago ug linya.

* * *

Dili pa diay angay’ng mag-celebrate sila si Congressman Arturo Radaza kay duna pa silay laing duha ka mga kasong anti-graft sa Sandiganbayan sa kontrobersiyal nga decorative lamppost niadtong 12th ASEAN summit nga giingong gipaburot ang presyo uban sa taga DPWH ug ubang mga personalidad.

Apan possible nga malibre gihapon sila si Radaza niining mga kaso kun magtinanga ang taga Office of the Special Prosecutor sa Ombudsman Manila sa pagtaral nilang Radaza.

Mao ni ang nakamaot sa taga Ombudsman nga nag-ayo lang sa sinugdanan.

Karon nga wa nay media nga nagsige’g follow-up didto sa Sandiganbayan nahimo nang inutil ang mga kaso.