Nyor Gamay (NG): Unsay nahibaw-an nimo kabahin aning Knights Templar?
Nyor Daku (ND): Ah, kuan na sila, Nyor, mga tawo nga magsininag puti nga may puwang cross sa dughan, magdadag espada unya maoy tigtimplag kape sa Santo Papa. Mao nang gihinganlan silag Knights Templar kai sila may tig timplag kapi.
NG: Wa na gyuy laing yabag nimo, Nyor, puros na man lang ka hinanggaw. Ayaw ko ingna nga wa ka makahibaw ani nila.
ND: Aw naa man na sila sa libro nga Holy Blood Holy Grail nga gikopya sa “Da Vinci Code” nga gihimuag sine. Starring pud na sila sa pelikulang National Treasure. Escort kuno ni sila sa mga pilgrim o mga deboto nga motan-aw sa nataw-han ni Kristo. Duna sab kunoy mga sekreto sa kalibutan nga sila ray nahibaw, apil na niani ang holy grail nga mao kunoy gi-imnan ni Kristo sa iyang katapusang panihapon. Pero ambot kun unsay ilang negosyo nga nadato man sila. Sundao ra man unta ni sila nga manalipod sa mga pilgrim batok sa mga manghasi nga gikan sa laig tinuhuan sa Islam niadto. Nasina ang Roma kanila ug maong gibunkag sila ug gipangbitay ang uban nilang mga leader.
NG: Unya nahibaw ka aning nahitabo sa Norway, Nyor? Nga dihang human pabuthi ni Anders Behring Breivik and dakbayan sa Oslo miadto siya sa isla sa Utoya ug iyang girakrakan ang mga batan-ong nagseminar sa usa ka resort.
ND: Mao lagi. Malinawon man ta kaayo ni nga nasud. Usa kinis mga dream country to visit nako labi dihang naka picture ko ni Sara Skjoldnes.
NG: Kinsa na, Nyor?
ND: Kadto bang Ms. Norway nga niari sa ato. Mobalik kuno ron siyang Nobyembre ug motukar kuyog iyang banda.
NG: Time pa, Nyor, sa di pa ta mayabag, unsa may labot ani niya sa Knights Templar.
ND: Wala. Kinsa may niingon nga apil ni siya? Gatuo man gud kog Norway nay atong gi-istoryahan. Di ba dinhi man sad gikan ang asawa ni Tiger Woods. Unsa man sad diay labot aning Breivik sa Knights Templar?
NG: Niingon man gud siya Nyor nga ang iyang pagkalas sa 77 ka kinabuhi inspired sa bag-ong Knights Templar.
ND: Kay ngano gi-revive na diay ning maong kapunongan?
NG: Dunay mga anti-Islam nga pundok sa England nga gipangulohan sa usa ka Paul Ray. Pero nanghinaw man ni si Ray sa mga gipanulti ni Breivik. Matud pa niya dili tinuoray nga kapunongan kining ilang “Knights Templar” kun di mga tao lang kini nga susama og mga ideas ug magtabitabi lang sila matag karon ug unya. Ang ila lang kunong concern mao ang pagdagsa sa mga Muslim immigrants sa Britania ug Europa ug ang mga kausaban sa ilang katilingban tugod sa pag-abot ning maong pundok.
ND: Ah, okay. Ang anti-Islam angle diay maoy nakapa Knights Templar nila. Dili diay ang “grail romance” ug uban pa. Abi nakog duna nay bag-ong King Arthur.
NG: Apan dunay mas deadly nga Knights Templar sa Mexico.
ND: Sa Mexico? Unsa man na Monty Python meets Cheech and Chong?
NG: Dunay usa ka drug cartel didto nga nanghatag og pamphlets diin dunay mga hulagway nga nanakay og kabayo ang ilang mga sakop. Ug sa ilang manifesto, nagkanayon ang kining maong pundok nga ang ilang tumong mao ang pakigbatok sa kalisud ug inhustisya.
ND: Bitaw, Nyor, no, basig dunay illegal nga kalihukan tong Knights Templar niadtong 12th century maong nadatu ug nagamhanan sila.
NG: Na, gisamot man nimog lubog ang idtorya, Nyor.
ND: Samot gud. Di na na malubog pa imong istorya uy. Lubog pa man nas lunangan sa kabaw. Gihimo na gud nianing racist ug drug dealers ang Knights Templar. Maayo tingalig hinganlan na lang nato ni silag Knights Lubog.
NG: Na hala.