Laing tulo ka mga piskal apil nga pamatyon?
Kagahapon sa mga alas-8 sa buntag, samtang namahaw ko sa canteen sa Kapitolyo gitawgan ko sa usa sa mga kawani sa Palace of Justice nga dunay buto-buto sa third floor nga nagpinusilay.
Tuod man dihang midagan ko paingon sa Palace of Justice ang mga kawani sa korte ug Kapitolyo mitug-an nako nga duna nay natumba nga amerkano. Apan dihang akong gipadul-an ang biktima sa pagpamusil dali nakong nailhan nga siya mao si Cebu Assistant City Prosecutor Ma. Theresa Calibugan Casiño.
Gipalingkod siya ug gialalayan sa mga staff sa piskaliya paggawas sa Palace of Justice aron dalhon sa ospital ug gikarga sa car 009. Si Sir Dilan nga usa sa mga staff mitug-an nako nga ang mipusil ni piskal Casiño mao ang usa ka American national nga si “Hope” mao nga naglisud ko ug subay kun unsay motibo.
Hangtud nga pagsulod nako sa Palace of Justice, gipahibawo ko ni piskal Liceria Rabillas nga dunay naghikog nga foreigner ug nagbuy-od pa duol sa ilang buhatan. Tungod sa kapaspas sa mga impormasyon ako sang gitug-anan si piskal Rabillas nga ang kauban niyang piskal nga si Casiño napulisan ug gidala sa tambalanan ug didto na-shock si piskal Rabillas sa nahitabo ug pulos intawon mi nagkamulo sa pagpangita ug tukmang impormasyon samtang nagsud-ong kami sa nagbuy-od nga lawas ni John H. Pope nga unang gikataho nga ang pangan niya mao si “Hope.”
Dihang among gisubay ang exact location didto sa fourth floor duol sa entrance sa support staff ni Metropolitan Trial Court in Cities (MTCC) 1 Judge Monalilia Tecson diin didto gipusil si piskal Casiño gipahibawo sab ming mga sakop sa media ni manlalaban Estandarte nga dunay laing duha ka mga patay didto sa MTCC Branch 6. Mao nga among gidagan didto sa MTCC 6 sa kang Judge Pamela Uy Baring og didto positibo gyud nga dunay laing duha ka mga patay nga nagbuy-od nga ila ni Dr. Rene Rafols ug manlalaban Juvian Achas. Sa among natumpi-tumpi nga impormasyon ang suspetsado nga si John Pope buot pa untang mopatay nilang City Prosecutor Nicolas Sellon, piskal Oscar Capacio ug piskal Lorete human nga nakapusil nilang Rafols, Achas ug piskal Casiño.
Nagpasulabi karon ang teyoriya nga unang gipamusil sa langyaw sila si Dr. Rafols ug Atty. Achas samtang nagpaabot sa bista sa kasong five counts nga malicious mischief batok kaniya sa MTCC 6. Gikan didto sa MTCC Branch 6 mitapon siya sa MTCC Branch 1 diin tua sab didto si piskal Casiño alang sa iyang kasong grave threats.
Dihang milampos siya sa mga krimen mihapit pa kini sa City Prosecutor’s Office aron pamatyon sab ang mga piskal nga nahisgutan sa unahan apan suwerte lang nga nagdugay-dugay sila ug abot. Wa pay klaro nga naghikog kining maong langyaw human sa paghimo sa krimen tungod kay nanggawas ang nakapusil ni Pope.
Hinoon ang pulis nagkanayon nga igo ra niyang gitiil ug gibukton pag-igo. Pero alang nako dili isyu dinhi kun giulo ang foreigner aron siya mapatay. Ang importante nga dali siyang na-neutralize kay simbako kun naka-hostage pa to o ba kaha naka-ilog pag armas sa mga guwardiya tingalig daghan pang kinabuhi ang makalas.
* * *
Nakaila ko ni John H. Pope ang Canadian national nga nagwala kagahapon sa Palace of Justice. Niadtong mga duha o tulo na ka tuig ang nakalabay amo ni siyang na-interview ug mipadayag og mga pagmahay sa atong judicial system tungod kay matud pa nagpasulabi ang corruption.
Wa ko malimot sa iyang mga seryosong akusasyon batok sa mga pulis nga nagdakop kaniya ug sa mga piskal nga naghawid sa iyang mga kaso. Siya sab ang mikiha og piskal sa Ombudsman tungod kay matud pa gipabayad siya ug P200 pag-notaryo sa iyang affidavit. Gani niadtong petsa 7 nagpaabot usab kini og suwat kang Sir Bobby Nalzaro nga nagpadayag sa iyang kasagmuyo sa usa ka media outlet nga wa ipagawas ang iyang mga articles ug gisubli ang iyang mga alegasyon batok sa corruption sa kapolisan ug mga piskal.
Apan in fairness wa kaayo paminawa kining mga akusasyon ni Pope kay medyo naobserbahan kini nga trouble maker nga klaseng tawo ug medyo mosimang ug gamay. Daku ko’g pagtoo nga giplano ni Pope ang krimen kagahapon human desperado na siya nga di makaangkon og hustisya ilabina nga ipa-deport na siya tungod sa mga lain-laing mga kaso nga iyang gi-atubang.
Pero haskang paeta gyud nga iyang gidamay ang abogado ug piskal nga igo rang miabag ni Dr. Rafols nga nangayo og hustisya sa husgado. Kuyaw gyud kun maoy magdaghan!
* * *
Sa nahitabo puwerteng palpaka gyud sa atong security diha sa Palace of Justice kagahapon. Kun natarong pa sa mga guwardiya paghiling si Pope wa untay mga kinabuhi nga makalas. Hinoon in fairness sa atong mga guwardiya tawo ra sab sila nga masayop gyud. Kaniadto pa ko nagsigeg suggest sa mga guwardiya nga kinahanglang duna silay metal detector apan wa gyud tumana. So karon palpak! Kinsa may mabasol niini? Ang security agency? Ang chief security? O ba kaha ang kinatibuk-ang hudikatura? Hinoon kinahanglang imbestigahon kining tanan aron maklaro kun kinsay nagpabaya sa trabaho.
