Gwen and Johnny and Ann and Ricky

Paghuman nakog paniudto milingkod dayon ko sa atubangan sa telebisyon ug nag-atang sa sayaw ni suspended governor Gwen Garcia. Balhinbalhin mig channel gikan sa 3 paingon sa 7 paingon sa 72 (ang designation sa channel 5) apan ang ala-1 nahimong alas-2, ang alas-2 nahimong alas-4 hangtud nga miundang na ang mga TV station sa ilang live coverage ug nibalik na lang ngadto sa ilang regular programing. Wa ko kita sa sayaw sa gobernadora.

Gipawong na lang namo ang TV. Ug dihang giabrihan namog kinig balik ang channel 80 na lang maoy nagsibya sa Sinulog. Apan nahuman na kuno ang sayaw ni Guv ug si Rizini Gomez na lay among nakit-an ug wa madugay mibutho dayon ang fireworks. Pagbalhin namo sa laing mga istasyon maoy nisugat kanamo ang taho kabahin sa dakong baha sa Davao.

Lisud sukdon ang pagtuo. Dili malalis nga tradisyon na sa grand parade sa Sinulog nga moapil og sayaw ang gobernadora. Apan ang pangutana kun ang paghalad ba maoy tumong sa pagsayaw o para lang propaganda mileage. Kon ang uwahi maoy atong tuohan, may nakuha bang political points si Gwen ning iyang pasayaw karon? O mas naka puntos ang kagamhanan ni P-Noy kay mipakita silag extreme tolerance sa ilang kaatbang nga gahi kaayo.

Si Manong Johnny nga mibisita kang Gwen pag-Sinulog wa paalkansis salida. Iyang gi-“declare vacant” ang iyang position isip Senate President. Para kuno abyerto kini kun duna may buot mopuli kaniya. Apan nakahibawo na gud siya nga pugngan siya sa kadaghanan. Ambot kun gisapot ba lang siyas mga panglawgaw ni Sen. Miriam Santiago kaniya o iya lang ning atik ug salida para panguha og attention ug free propaganda mileage. “Too old to be scared” na kuno siya ning hugonhugon nga ilisan siya. Apan nganong pwerti man niyang sukoa nga di man diay siya mahadlok o maguol nga mapulihan. Mora na hinuon siyag tiguwang nga mabaw og lubot.

Kun katiguwangon ang atong hisgutan murag naklaro na ang katiguwangon ni Ricky Lo sa iyang pag-interview ni Anne Hathaway. Murag nawa na iyang journalistic reflexes ug nga iya na lang gi-inato ang maong interview. Kun mahinumduman gi-single out si Lo niadto sa pundok ni Kim Chiu nga di nila paapilon sa press con.

Ug kun miguwa ang paghinay ni Ricky Lo ning maong interview milutaw sad ang pagkasaputon ni Hathaway.