Danghag ning ubang mga tawo ni Rama
Miresulta na gyud ning pagka-overacting sa mga escorts ni Cebu City Mayor Michael Rama samtang mobadlong sa mga tawo nga mopatunga sa rota sa Sinulog parade.
Tan-awa kun unsa kadanghag. Kiat lang agi ning ubang mga hinanib ni Rama nga nakadisgrasya sa usa sa mga dancers sa Cotabato kagahapon sa buntag.
Wa man koy supak nga mamadlong basta ang importante nga way masakitan ug way madisgrasya.
Kaniadto pa gyud ko mibadlong anang paagi nga aksiyon-aksiyonan og dasmag sa mga mag-motor ang mga tawo nga nanan-aw sa panahon pa ni kanhi Vice Mayor Renato Osmena.
* * *
Nakakita na gyud ug solusyon ang Sinulog Foundation, Inc. ug ang kagamhanan sa Siudad sa Sugbo pagsulbad niining palusot sa uban nga magpa-media-media ug makasul-ob gyud og ID sa media nga gi-isyu sa foundation.
Karong tuiga gi-require na gyud kaming mga lehitimong sakop sa media nga magpadala og Xerox copy sa among mga company ID aron pag-double check.
Maglaum lang ko nga sa sunod tuig ilhon daan sa komitiba kaming mga lehitimong sakop sa media ug ingon man amog mga technician nga maoy frontline pag-set-up sa among mga kahimanan aron dili na sila magduha-duha sa among identity.
Maayo unta nga dunay representante sa print og broadcast media nga palingkuron sa screening committee aron mag-ila-ila og tarong.
* * *
Bisan ako nakaobserbar nga lahi gyud ang imahen ni Senyor Sto. Niño nga maoy gigamit atol sa fluvial procession ug maoy giparada gikan sa pantalan ngadto sa Basilica niadtong Sabado.
Wa ko makasabot kun nganong dili bongga ang iyang dayan-dayan ug gamay ra gyud kaayo siya.
Gani akong na-obserbahan nga ang mga tawo nga nag-atang sa fluvial medyo lahi ra sab ang pagtimbaya sa imahen tungod kay nasurpresa sila sa daku nga kausaban.
Ambot kun gituyoba kadto aron ipaambit ang mensahe sa katawhan nga ang Ginoo magpaka-simple gyud.
O ba kaha gitudloan gyud kita sa Simbahan nga bisan unsang replica o imahen ni Se ñor Sto. Ni ño mao ra na.
In fairness sa taga Simbahan dili sab ko maka-ingon nga kuwang sa pangandam sa fluvial tungod kay ang gigamit nga imahin sa solemn foot procession medyo daku gyud ug bongga man gyud ug puno sa dayan-dayan sa mga bulak.
Kami nga nag-cover sa duha ka procession makaingon gyud nga way daghang duda ug kombinsido gyud nga ang gigamit sa foot procession mao gyud ang naandam nga gamiton nga imahen.
Mas mainiton ug mas solemne gyud ang reaction sa mga deboto sa solemn procession kay sa fluvial procession.
Alang nako mas maayong dili gyud usab-usabon sa mga organizers ang gamiton nga imahen aron way motisok nga mga pagduda ang mga deboto sa preparasyon sa simbahan.
* * *
Kagidlay na kadtong walo ka mga pulis sa Mobile Patrol Group nga nagbalik-balik sa pagpangilkil sa usa ka peryahan diha sa barangay Busay ning dakbayan.
Kini tungod kay ang testigo nga sibilyan kinsa maoy nagkuha sa video batok sa mga pulis mitestigo na niadtong Miyerkules ug iyang gikompirmar nga siya gyuy mi-video sa nabalita sa “Balitang Bisdak” sa GMA-7 Cebu.
Ang iyang gikabalak-an mao ang iyang seguridad kay dunay mga pulis nga magsigeg pangita kaniya sa iyang gipuy-an.
Maglaum ko ni Police Regional Office Chief Gen. Marcelo Garbo nga dili mapasubo ang testigo nga igo rang nagpakabana sa paglimpiyo sa Philippine Nationap Police Organization ug pagwagtang sa mga scalawags.
Puwera buyag sab ning ubang mga pulis uy kay kun dili manulis og kuwarta sa mga sugarol modaginot sa paa sa manok sa tigbakayan.
* * *
Useless gyud kaayo ang bag-ong balaud sa pagpasul-ob og standard helmet niadtong mga mag-motor kay luya kaayo ang atong mga tinugyanan sa Land Transportation Office (LTO) sa pagpanakop.
Practically nag-ayo lang sa sinugdanan ang taga-LTO pinanguluhan ni Regional Director Raul Aguilos.
Karon wa nay dinakpanay nga akong naobserbahan sa atong mga kadalanan.
Ambot kun wa ba kini tuyoa sa taga-LTO pag-suspenso kay daghan pa sa atong kapolisan nga mag-motor nga dili magsul-ob og prescribed helmet nga ilang kaabag sa pagpanakop.
Pero si Aguilos nga akong naistorya nagkanayon nga magbantay-bantay ang mga violators kay daghan na siyang gipang-deputize karong bag-o.
Lakip sa iyang gipang-deputized mao ang kontrobersiyal nga “Task Force Alpha.”
