Makapanimbawot kaayo sa balhibo ang mga revelations nila ni Vice-Governor Agnes Magpale, Thelma Chiong sa Crusade Against Violence, Atty. Joan Saniel- Amit sa Children’s Legal Bureau ug mga kaubanan kabahin sa alarming na kaayo nga problema sa cyber sex dinhi sa tibuuk Sugbu atul sa among programa’ng “Dialogue On The Air” sa DYSS Super Radyo niadtong Sabado.
Si Cebu City Councilor Lea Ouano Japson mitug-an nga dunay tulo ka mga Barangay dinhi sa dakbayan sa Sugbu ang ilang gitutukan karon pag-ayo tungod sa cyber sex.
Apan pasaylo-a ko nga dili nako puwede’ng itribukar ang mga sensitibo’ng impormasyon kay on-going pa ang ilang mga surveillance.
Ang subo gyud kaayong palandungon kay dunay bata’ng babaye nga nag-edad ug 2 years and one-half nga gilawog na sa mga ginikanan ngadto sa ilang customer nga langyaw nga pedopilya atubangan sa camera.
Salbahis pa kaayo kini’ng ubang mga ginikanan kay human gi-rescue sa gobyerno ang ilang mga anak nga ilang gi-exploit moingon pa dayon nga ang gobyerno maoy daku’ng babag sa ilang pang-warta. Moingon pa ang uban nga dili kini krimen kay total kutob ra man sa pagtan-aw diha sa camera ug way actual nga physical contact.
Ambot lang kun normal pa ba ang pangutok sa mga klaseng ginikanan nga ingon ani.
Usa ka operator ug internet café diha sa Labangon nga akong na-estorya mitug-an nga makadaghan na’ng higayon nga dunay mga ginikanan nga nagdala sa ilang mga anak nga bag-o pa’ng namukol ug ipa-atubang sa camera nga abli ang dughan.
Sa mao gihapo’ng operator, nakasaksi siya nga dunay buntis nga babaye nga naghubo atubangan sa camera. Ang buntis gikuyugan ug laing duha ka dagku’ng babaye unya nagdala pa ug habol aron itabil sa buntis aron dili makit-an sa uban nga nag-computer.
Samtang dunay laing internet operator diha sa Barangay Lahug ang mipadayag nga ang angay’ng tutukan sa taga gobyerno mao ang mga panimay nga dunay linya sa internet kay segurado’ng dunay mahitabong cyber sex ug dili sila.
Sa iyang bahin si Atty. Alan Francis Macaraya sa National Telecommunication Commission NTC miangkon nga lisud gyud kaayong mapugngan ang mga porno sites sa mga internet café.
Matud niya nga dunay software sa internet nga puwede’ng i-install sa computer aron pag-block apan dili gyud makasulbad sa hingpit ikomparar niadtong mga commercial nga software.
Gani ang pipila ka mga operators mi-angkon nga duna gyu’y mga experto nga maka-abli gihapon sa mga porno sites.
* * *
Nasumpay namo pagtuki ang kaso nila’ng Bella Ruby Santos. Sila si Vice Governor Magpale, Thelma Chiong ug Assistant City Prosecutor Aida Sanchez mikuyog sa panawagan nga kinahanglang mobolontaryo pag-surrender si Bella Ruby Santos.
Alang nila mas maayong atubangon ni Bella ang kasong kidnapping with homicide kana kun tinuud man nga inosente siya sa pagdagit ug pagpatay sa bata nga si Ellah Joy Pique.
Alang ni Chiong nga dilikado kaayo si Bella nga nagsigeg tago-tago.
Samtang giklaro ni Vice governor Magpale nga usa ra ka komedya ang giingon ni Capitol Consultant Col. Cesar Veloso nga himoong star dancer si Bella sa sikat na kaayo nga Cebu dancing inmates.
Pero nalingaw ko nga naminaw nila’ng Ma’am Thelma ug piskal Aida Sanchez diha’ng nagka-init ang diskusyon sa kaso nila’ng Bella nga mihagit na si Chiong sa mga piskal nga mang-resign kun dili na motoo ug hustisya sa Pilipinas.
Magpasalamat sab diay ko sa presensiya sa uban nako’ng guests nga nakatampo sab ug daku sa mga mabungahong ponto sa diskusyon sa isyu sa trafficking in person ug child pornography sama nila’ng Ma’am Jaybee Binghay ug Clavel Saycon sa DSWD-7, Inayagan Barangay Captain Boy Tablate ug kang Inspector Mary Grace Pertez sa Police Regional Office-7.
* * *
Sayop diay kini’ng pangangkon sa ubang mga huwes nga wa nay mga personnel sa korte karong bag-o ang nalambigit sa “marriage scam” ug peke nga “annulment of marriage”.
Dunay mga trabahante sa korte ang mipadayag kanako nga nagpabilin kini’ng mga kabuang. Gani matud pa sa akong mga sources nga dunay mga opisyal ang nalambigit.
Kadtong ilang kauban nga si Ramir Balbona nga mi-AWOL kay nahadlok sa imbestigasyon nila’ng kanhi Judge Geraldine Ycong ug sa mga personnel sa Korte Suprema sa isyu sa paggama ug peke nga desisyon giingong usa lang ka “sacrificial lamb” sa pundok sa mga badlungon.
Si Balbona giingong nahiubos na karon sa iyang mga kauban sa mga tinunto kay dili na gani makamao motagad kaniya kun sila magsugat sa gawas.
Matud sa akong tinubdan nga nahadlok lang gyud si Balbona pagpakita sa imbestigasyon kay nakadawat kadto ug grabeng mga pagpanghulga ug gani gihatdan pa ug mga buhi’ng bala aron dili motunga sa imbestigasyon.
Kun tinuud man kini mas maayong mopakita si Balbona sa mga labaw sa korte aron iyang itribukar ang kutob sa iyang nahibaw-an aron mas mobilib pa kaniya ang katawhan nga lain na ug perception ngadto kaniya.