Gikawat ang usa ka camera sa Kapitolyo?

Unsa ka tinuod nga nawala ang usa sa mga camera sa Sugbo TV nga iya sa Cebu provincial government?

Kinsa may manubag kun tinuod nga nawala?

Si Eva Encabo bag-ong miasumer  nga hepe sa Provincial General Services Office (PGSO) miingon nga ila pa gyung gisubay karon kining maong report sa padayon nilang inbentaryo.

Pero in fairness sa usa sa mga kawani sa Sugbo TV miingon nga pangdaut ra kining tanan kay matud pa kompleto ug way na-missing.

Ang gikompimar ni Encabo nga dunay pito ka mga computer units ang gipangtangtangan na sa mga hard disk.

Kun tinuod man kining initial report ni Encabo sa paghimulbol sa mga hard disk nagpasabot nga tulin pas alas kuwatro ang mga kawani sa pagpanghipos sa mga files.

Apil nga gisubay karon ni Encabo ang mga stocks sa bugas, de-lata nga pagkaon ug ubang supply diha sa Provincial Social Welfare and Services nga gidumala  ni Marivic Garces.

Lakip sa pang-inbentaryohon mao ang mga sakyanan, cellular phones  ug ubang mga kabtangan sa provincial government nga ubos sa kustodiya sa mga opisyales sa Kapitolyo.

* * *

Kagahapon human sa paniudto nakadawat ko og kisaw diha duol sa CFI building diin anaa nahimutang ang satellite base aron makalabay og broadcast ang Sugbo TV.

Akong tinubdan nagkanayon nga dunay sakop sa pamilyang Garcia ang mibabag nga maka-operate og balik ang Sugbo TV.

Matud pa giangkon ang container van  ni Ma’am Inday Garcia nga atua didto sa sulod  ang mga equipment sa broadcast.

Gani matud pa sa report mimando si Ma’am Inday sa gwardya sa CFI nga paiilisan og padlock ang container  van.

Si manlalaban Chad Estella usa sa mga sinaligan ni Acting Gov. Agnes Magpale miangkon  nga hangtud karon wa pa gyud sila makaestablisar kun ang probensiya ba gyud maoy tag-iya sa container van nga gi-convert na ngadto sa butanganan sa satellite.

Alang nako dili seguro ni lisud alang nila ni Magpale nga ibalik ang broadcast sa Sugbo TV. Apan sa dili pa, kinahanglang tarungon pagpahimutang ang tanang ekipos nga dili mamiligro ug i-settle ang ownership sa container van.

Kay kun iya sa CFI ug sa mga Garcia, mangitag paagi si Magpale nga dunay laing safe nga lugar nga kabutangan.

* * *

“Do not judge the book by its cover.” Mao gyud unta ni ang insakto nga di kita magpasagad og kompiyansa ngadto sa mga tawo nga di nato kaila.

Apan di gyud malikayan ilabina natong mga Sugbuanon nga sayon ra kaayo kitang ilaron tungod kini sa atong batasan nga ma-abi-abihon ilabina  nga may postura ang tawo nga gikaistorya.

Leksyon kini natong tanan ang pagkasikop kang Joseph Llanes Cua, 25 anyos nga taga Jacinto Exit, Davao City. Dili gyud mailhan sa iyang dagway ug linihokan ang pagka-mangingilad.

Gawas sa natala sa kapulisan duna pay daghang nailad ni Cua kinsa magpaila nga usa ka abogado, pari, doctor ug anak sa mga impluwensyado ug sikat nga pamilya.

Maayo gyud kaayo ang diskarte sa kanahan kay mopuyo og mga mahalon nga puy-anan ug mangabang og mga high-end nga mga sakyanan.

Niadtong Lunes sa gabii nanawag intawon nako sila si Rico Dionson presidente sa mga manglitsonay  ug si Cebu City Councilor Ritchie Osmena.

Si Dionson nagkanayon nga nailad iyang duha ka sakop sa pag-deliver og duha ka litson kang Cua nga gibayran ug peke nga tseke.

Samtang  si Osmena mitug-an nga dunay iyang mga kaila nga negosyante nga nailad usab  ni Cua nga nakasakiyo og duha ka IPhone 5 ug mga high-end nga camera.

* * *

Segurado ko nga wa nay mahitabong kawat diha sa opisina sa Sinulog Foundation karong Sinuloga kay mag-iyahay na man sila og bantay.

Si Ricky Ballesteros, executive director sa maong buhatan, mipabuhagay sa iyang kasagmuyo sa mga pulis kay wa gyud ipresentar ang mga ebidensya ngadto sa piskaliya batok sa gwardya nga maoy ilang gikasohan nga maoy hinungdan nga nalibre sa kaso.

Konbinsido si Ballesteros nga kadtong maong gwardya dunay papel sa krimen apan dili maoy nagkuha sa kuwarta.

Daku hinuon og pagtuo si Ballesteros nga masulbad ra gihapon ang paglungkab sa P1.6 milyones.

Duha ka mga preventive measures ang ilang ipatuman aron dili masubli ang maong krimen.

Una, gawas sa mga blue guards nga magbantay, anaa usab ang kapolisan. Ikaduha, ilang sabotan sa taga-bangko nga mao na lay mo-pick-up sa kuwarta.